އަތުހަރުގެ ސިއްހީ ލިޔުންތައް ނުދޭތީ ކަންބޮޑުވުން، އޮޓޮޕްސީ ހަދަން އާއިލާ އިން ބޭނުމެއް ނުވޭ

މާލޭގައި މިދިޔަ ބުރާސްފަތި ދުވަހުގެ ރޭ ވަޅިން ބިރު ދައްކައި އަންހެނަކު ރަހީނުކުރި މައްސަލައިގައި ފުލުހުން ހައްޔަރުކުރި އާދަމް އަތުހަރު މަރުވީ ދަންޖެހިގެން ލިބުނު އަނިޔާތަކުގައި ކަމަށް ގަބޫލު ނުކުރެވޭ ކަމަށާއި އޭނާގެ ހަށިގަނޑުގެ އޮޓޮޕްސީ ހަދަން ބޭނުން ނުވާ ކަމަށް އާއިލާއިން ބުނެފި އެވެ.

ފުލުހުން ބުނި ގޮތުގައި، ޝަރީއަތް ނިމެންދެން ދޫނިދޫގައި ބަންދުކޮށްފައި ހުރި ގޮޅީގައި އަތުހަރު އަމިއްލައަށް މަރުވާން މަސައްކަތް ކޮށްފައިވަނީ އިއްޔެ އިރު އޮއްސި 7:02 ގަ އެވެ. ދަންޖެހުމުގެ ސަބަބުން ލިބުނު އަނިޔާއަށް ފަރުވާދެމުންދަނިކޮށް މިއަދު ހަވީރު 4:08 ހާއިރު މަރުވެފައިވާ ކަމަށް ފުލުހުން ވަނީ ބުނެފަ އެވެ.

އަތުހަރުގެ މަރާ ގުޅިގެން "މިހާރު"އާ ވާހަކަ ދެއްކި އޭނާގެ އާއިލާގެ މެންބަރަކު ބުނީ އަތުހަރުގެ ސިއްހީ ހާލަތާ ގުޅޭ ޑޮކްޓަރުގެ އެއްވެސް ލިޔުމެއް މިހާތަނަށް އާއިލާއަށް ދީފައިވާ ނުވާ ކަމަށެވެ. ޑޮކްޓަރުގެ ލިޔުންތައް ނުދީ ލަސްކުރުމަކީ އާއިލާއިން ވަރަށް ބޮޑަށް ކަންބޮޑުވާ ކަމެއް ކަމަށް އޭނާ ބުންޏެވެ.

"އާއިލާއަށް އެއްވެސް މައުލޫމާތެއް ނުދޭ. އެމީހުން [ފުލުހުން] ބޭނުންވީމަ ހޮސްޕިޓަލަށް ގެނެސް ގެންގޮސް ހެދީ. އާއިލާއަށް އެއްވެސް ކަމެއް ހިއްސާއެއް ނުކުރޭ،" އޭނާ ބުންޏެވެ.

އަތުހަރު މަރުވެފައިވަނީ ދަންޖެހުމަށް ފަހު ލިބުނު އަނިޔާތަކާ ގުޅިގެން ކަމަށް ފުލުހުން ބުނި ނަމަވެސް، އާއިލާއަށް އެކަން ގަބޫލު ނުކުރެވޭ ކަމަށް އާއިލާ މެންބަރު ބުންޏެވެ. އޭނާ ބުނި ގޮތުގައި އަތުހަރުގެ ކަރުގައި އެހާ ބޮޑަށް ދަންޖެހިފައިހުރި ކަމުގެ ނިޝާނެއް ނެތެވެ.

އޭނާ ބުނި ގޮތުގައި އަތުހަރަށް އެންމެ ފުރަތަމަ އޭޑީކޭގައި ފަރުވާދިނުމަށް ފަހު، ގެންދިޔައިރު އޭނާގެ ހާލަތު ރަނގަޅު ކަމަށާއި ވާހަކަ ވެސް ދެއްކި އެވެ. ނަމަވެސް، ޖަލުގައި ހުއްޓާ ހާލު ގޯސްވެގެން އައިޖީއެމްއެޗްއަށް ގެނައި ފަހުން އަތުހަރުގެ ހާލަތު ރަނގަޅު ނޫން ކަމަށް އޭނާ ބުންޏެވެ.

އެކަމަކު ފުލުހުން ބުނެފައިވަނީ އައިޖީއެމްއެޗްގައި ހެދި މެޑިކަލް ޓެސްޓުތަކާއި ސީޓީ ސްކޭންގެ ނަތީޖާ ވެސް ނޯމަލް ކަމަށެވެ. އަތުހަރު ދަންޖެހިފައި ހުއްޓާ ފެނުނީ އައިޖީއެމްއެޗްގައި ފަރުވާދިނުމަށް ފަހު ދޫނިދޫއަށް ގެންދިޔަ ފަހުންނެވެ. ފުލުހުން ވަނީ އަތުހަރު މަރުވެފައިވާ ގޮތް ކަށަވަރު ކުރަން އޮޓޮޕްސީއެއް ހަދަން ނިންމައިފަ އެވެ.

ނަމަވެސް، އާއިލާއިން އެކަމަށް ބޭނުން ނުވާ ކަމަށާއި ބޭނުން ވަނީ ވީއެންމެ އަވަހަކަށް އަތުހަރުގެ ޖަނާޒާ ބާއްވަން ކަމަށް އާއިލާއިން ބުންޏެވެ.

އަތުހަރުގެ މަރާ ގުޅިގެން އެޗްއާރްސީއެމް އިން ވެސް ތަހުގީގު ފަށާފައިވާއިރު، ހޯމް މިނިސްޓްރީން ވަނީ މިރޭ އަތުހަރުގެ އާއިލާއާ ބައްދަލުކުރަން ނިންމައިފަ އެވެ. އެ ބައްދަލުވުމުގައި އަތުހަރުގެ ސިއްހީ ލިޔެކިޔުންތައް އާއިލާއަށް ރައްދު ކުރާނެ ކަމަށް އުއްމީދު ކުރާ ކަމަށް އާއިލާ މެންބަރު ބުންޏެވެ.

ހޯމް މިނިސްޓްރީން ވަނީ އަތުހަރާ މަރާ ގުޅިގެން މިރޭ 10 ޖަހާއިރު ނޫސްވެރިންގެ ބައްދަލުވުމެއް ވެސް ބާއްވަން ނިންމައިފަ އެވެ.

އަތުހަރު ދަންޖެހުނު ހާދިސާއާ ގުޅޭ ގޮތުން ފުލުހުން މިއަދު އާންމުކުރި ޓައިމްލައިންގައިވާ ގޮތުން އޭނާ ދަންޖެހިފައި ހުއްޓާ ފެނުނީ އިއްޔެ އިރު އޮއްސި 7:02 ގަ އެވެ. ހަމަ އެ ވަގުތު ގޮޅިއަށް ވަދެ އަތުހަރު ނަގައި ބިންމަތީ ބޭއްވި ކަމަށާއި އޭގެ ތިން މިނެޓް ފަހުން ސްޓްރެޗަރުގައި އޭނާ ނެރެގެން އެއް މިނެޓް ތެރޭ ދޫނިދޫ ކްލިނިކަށް ގެންދިޔަ ކަމަށް ވެސް އެ ޓައިމްލައިނުން ދައްކަ އެވެ.

އޭގެ އަށް މިނެޓް ފަހުން 7:14 ވީއިރު އަތުހަރު ލޯންޗެއްގައި މާލެ ގެނައި ކަމަށާއި 7:17 ގައި އެމްބިއުލާންސަށް އަރުވައި 7:25 ވީއިރު އައިޖީއެމްއެޗްގެ އިމަޖެންސީއަށް ގެންދިޔަ ކަމަށް ވެސް ޓައިމްލައިންގައިވެ އެވެ.

އެހެންވެ އަތުހަރު ދަންޖެހިފައި ހުއްޓައި ފެނުމާއި އޭނާ ހޮސްޕިޓަލަށް ގެންދިއުމާ ދެމެދު ހޭދަވީ 23 މިނެޓެވެ. އެކަމަކު، ފުލުހުން އާންމުކުރި ޓައިމްލައިންގައި، އަތުހަރު އެންމެ ފަހުން ސަލާމަތުން ހުއްޓާ ފެނުނު ވަގުތެއް ބުނެފައެއް ނުވެ އެވެ.

އަތުހަރު އޭނާގެ ލޯބިވެރިޔާ ރަހީނުކުރީ އެކުގައި ދިރިއުޅޭ ގޭގެ ކުލީގެ މައްސަލައިގައި އުފެދުނު ދެބަސްވުމެއްގައި ވަޅިން ބިރު ދައްކައި ހަމަނުޖެހުން ހިންގަން ފެށުމުން އެތަނަށް ފުލުހުން ދިއުމުންނެވެ. އަތުހަރުގެ ލޯބިވެރިޔާ އަކީ ޕޮލިސް ރެކްރޫޓެކެވެ. ފުލުހުން ސީނަށް ދިއުމާ އެކު އަތުހަރު ވަނީ ލޯބިވެރިޔާގެ ކަރުގައި ވަޅި ޖައްސައި މަރުގެ އިންޒާރު ދީފަ އެވެ.

މަގުމައްޗަށް ލޯބިވެރިޔާ ނެރެ އެތަނުން ދާން މަސައްކަތް ކުރިއިރު، އަތުހަރު އެއް އަތުން އަމިއްލަ ކަރުގައި ވަޅި ޖައްސައިގެން ހުރި މަންޒަރު އާއްމުވި ވީޑިއޯއަކުން ފެނެ އެވެ. އޭރު އޭނާ ހުރީ އަނެއް އަތުން އަންހެން މީހާގެ ކަރުގައި ވަޅި ޖައްސައިގެންނެވެ.

ކަރުގައި ވަޅި ޖައްސައިގެން ހުރެ ލޯބިވެރިޔާ ސައިކަލަށް އަރުވައި، އަތުހަރު އޭގެ ފަހަތުގައި އިނދެގެން ދަނިކޮށް ސަލާމަތްކުރީ ފުލުހުން އަތުހަރުގެ ބޮލުގައި މުގުރުން ޖަހައި ވައްޓާލައިގެންނެވެ. އޭނާ ޖަލަށް ގެންދިޔައީ ހައްޔަރުކުރަން އުޅުމުގެ ތެރޭގައި ލިބުނު އަނިޔާތަކަށް އޭޑީކޭ ހޮސްޕިޓަލާއި އައިޖީއެޗްގައި ފަރުވާ ދިނުމަށް ފަހު އެވެ.