އަތުހަރު އިނީ އަމިއްލަ ކަރުގައި ވެސް ވަޅި ޖައްސައިގެން

މާލޭގައި މިދިޔަ ބުރާސްފަތި ދުވަހުގެ ރޭ އާދަމް އަތުހަރު އޭނާގެ ލޯބިވެރިޔާ ރަހީނު ކޮށްގެން އުޅުނު އިރު، އެންމެންގެ ސަމާލުކަން ހުރީ އަންހެން މީހާގެ ކަރުގައި އަތުހަރު ޖައްސައިގެން އިން ވަޅިއަށެވެ. އަތުހަރުގެ އަމިއްލަ ކަރުގައި ވަޅިޖައްސައިގެން އުޅުނުކަން އެހާ ބޮޑަށް އޮތީ ފާހަގަ ނުވެ އެވެ.

އާންމުވެފައިވާ ވީޑިއޯތަކުން ފެންނަ ގޮތުގައި އަތުހަރު އޭނާގެ ލޯބިވެރިޔާއާ އެކު ހުރި ގެއިން ނުކުމެގެން ގޮސް ލޯބިވެރިޔާގެ ކަރުގައި ވަޅި ޖައްސައި ސައިކަލަށް އަރުވަން ދާއިރު ވެސް އޭނާގެ އަނެއް އަތުން އަމިއްލަ ކަރާ ދިމާލަށް ކުޑަ ވަޅިއެއް ކަހަލަ އެއްޗެއް ދިއްކުރެ އެވެ.

އެއްވެސް މީހަކު ކައިރިވެއްޖެ ނަމަ ލޯބިވެރިޔާ މަރާލާނެ ކަމުގެ އިންޒާރު ތަކުރާރުކޮށް ދެމުން ގޮސް ސައިކަލްގައި އެ މީހުން މަޑުކުރާ ހިސާބުން އަތުހަރު އަނެއްކާވެސް އަމިއްލަ ކަރުގައި ވަޅިއެއް ޖައްސާތަން ވީޑިއޯއިން ފެނެ އެވެ.

އަންހެން މީހާ ސައިކަލް ދުއްވަން އިން އިރު، އަތުހަރު ފަހަތުގައި އިންނަނީ ކަނާއަތުން، އަންހެން މީހާގެ ކަރުގައި ވަޅި ޖައްސައިގެންނެވެ. ފުލުހުންގެ ހިދުމަތާ ދާދި ފަހުން ގުޅުނު އަންހެން މީހާ ސަލާމަތްކުރުމަށް ފުލުހުން އަތުހަރަށް ހަމަލާ ދިނުމުގެ ސިކުންތުކޮޅެއް ކުރިން އަތުހަރު އަނެއް އަތުން އަނެއްކާވެސް އަމިއްލަ ކަރުގައި ވަޅި ޖައްސައިގެން އިނދެ އެވެ.

އަންހެން މީހާ ސަލާމަތްކުރުމަށް އެ ތަނަށް ދިޔަ ފުލުހަކު އަތުހަރުގެ ބޮލުގައި މުގުރުން ޖެހި ވަގުތު އަތް ވިއްސައިގެން ދާއިރު، އަތުހަރު އަތުގައި އޮތް ވަޅި ވެސް ފެނެ އެވެ. އަންހެން މީހާ ސަލާމަތްކުރަން އުޅުނު ފުލުހަކަސް ވެސް ވަޅިން ޒަހަމްތަކެއް ވެފައި ވާއިރު މިއީ އަތުހަރު އަމިއްލަ ކަރުގައި ޖެއްސި ވަޅިން ވެފައިވާ އަނިޔާ ކަމަށް ބެލެވެ އެވެ.

އަންހެން މީހާ ސަލާމަތްކުރަން އަތުހަރުގެ ބޮލުގައި މުގުރުން ޖެހުމުން، އޭނާ ސައިކަލާ އެކު ވެއްޓެން ދަމުން އަންހެން މީހާގެ ކަރުގައި ވަޅި އަޅަން މަސައްކަތްކުރާ ކަހަލަ ގޮތަކަށް ވީޑިއޯއިން ފެނެ އެވެ. އޭނާ ވެއްޓުމުގެ ކުރިން ދެތިން ފަހަރު މުގުރުން ޖަހަ އެވެ.

އަންހެން މީހާ ސަލާމަތްކުރަން އަތުހަރަށް ފުލުހުން ދިން ހަމަލާގައި ލިބުނު އަނިޔާތަކަށް ހޮސްޕިޓަލްގައި ފަރުވާ ދިނުމަށް ފަހު، ޝަރީއަތް ނިމެންދެން ބަންދުގައި ބަހައްޓާފައި ހުއްޓާ އިއްޔެ ވަނީ އަމިއްލަ މަރުވާން މަސައްކަތްކޮށްފަ އެވެ.

އަތުހަރު ޑޮކްޓަރަށް ދައްކައި ހަދާފައިވާ ޓެސްޓްތަކާއި ސީޓީ ސްކޭނުން ވެސް ނަތީޖާ ނޯމަލް ކަމަށާއި އަދި ނަފްސާނީ ޑޮކްޓަރާއި ނާރުގެ ހާއްސަ ޑޮކްޓަރަށް ދެއްކުމުން ވެސް މައްސަލައެއް ނެތް ކަމަށް ފުލުހުން ކުރިން ވަނީ ބުނެފަ އެވެ.

އަތުހަރު ދަންޖެހުނީ ކިހިނެއް ކަމެއް ފުލުހުން އަދި ނުބުނެ އެވެ. އެކަމަކު ދަންޖެހިފައި ހުއްޓާ ފެނުނީ ޖަލުގެ ކެމެރާތައް މޮނިޓަކުރަނިކޮށް، ރޭގެ އިރާކޮޅު 7:02 ގައި ކަމަށް، ފުލުހުން އާންމުކުރި ޓައިމްލައިންގައި ވެ އެވެ. އެކަމަކު، އޭނާ ސަލާމަތުން ހުއްޓާ އެންމެ ފަހުން ފެނުނީ ކިހާ އިރަކު ކަމެއް ނުބުނެ އެވެ.

ދަންޖެހުމުން ހާލު ބޮޑުވެ މިހާރު އޭނާއަށް ފަރުވާ ދެމުން ގެންދަނީ އައިޖީއެމްއެޗްގެ އައިސީޔޫގަ އެވެ. ހާލު ސީރިއަސްކަމުން އޮތީ ވެންޓިލޭޓަރު ގުޅައިފަ އެވެ.

އަތުހަރު އޭނާގެ ލޯބިވެރިޔާ ރަހީނުކުރީ، މާލޭގައި އެ މީހުން އެކުގައި ދިރިއުޅެމުންދިޔަ ގޭގެ ކުލީގެ މައްސަލައެއްގައި އުފެދުނު ދެބަސްވުމެއްގައި ވަޅިން ބިރު ދައްކައި ހަމަނުޖެހުން ހިންގަން ފެށުމުން އެތަނަށް ފުލުހުން ދިއުމުންނެވެ. އޭނާގެ ލޯބިވެރިޔާއަކީ ޕޮލިސް ރެކްރޫޓެކެވެ.