އަތުހަރު ފުލުހުންގެ ބަންދުގައި ހުއްޓާ އަމިއްލައަށް މަރުވާން އުޅެގެން ހޮސްޕިޓަލުގައި ފަރުވާ ދެނީ

މާލޭގައި މިދިޔަ ބުރާސްފަތި ދުވަހުގެ ރޭ އަންހެނަކު ރަހީނުކޮށް، ވަޅިން ބިރުދައްކައި ފުލުހުންނަށް އިންޒާރު ދިން އާދަމް އަތުހަރު ފުލުހުންގެ ބަންދުގައި ހުއްޓާ އަމިއްލައަށް މަރުވާން އުޅެފި އެވެ.

ފުލުހުންގެ ތަރުޖަމާނު، އެސިސްޓެންޓް ކޮމިޝަނަރު އޮފް ޕޮލިސް އަހުމަދު ޝިފާން "މިހާރު" އަށް ވިދާޅުވީ އަތުހަރު މަރުވާން މަސައްކަތް ކުރި ކަމަށެވެ.

އެކަމަކު އޭނާ މަރު ނުވާ ކަމަށާއި މަރުވާން އުޅުމުގެ ތެރޭގައި ލިބުނު އަނިޔާތަކަށް މިހާރު އަންނަނީ ހޮސްޕިޓަލުގައި ފަރުވާދެމުން ކަމަށް ވެސް ޝިފާން ވިދާޅުވި އެވެ.

އައިޖީއެމްއެޗް އިން މައުލޫމާތު ލިބޭ ގޮތުގައި، އަތުހަރު އަށް ދަނީ އެމެޖެންސީގައި ފަރުވާ ދެމުންނެވެ.

އެނގިފައިވާ ގޮތުގައި އަތުހަރު މަރުވާން މަސައްކަތްކޮށްފައިވަނީ އަމިއްލައަށް ދަންޖެހިގެންނެވެ.

ށ. މިލަންދޫ، ހެޕީސައިޑް އަތުހަރު ވަނީ އޭނާގެ ލޯބިވެރިޔާ ރަހީނުކޮށް އަނިޔާކޮށްފަ އެވެ. އަންހެން މީހާ ސަލާމަތްކުރަން އުޅުމުން، އޭނާ މަރާލާނެ ކަމަށް ބުނެ ކަރުގައި ވަޅި ޖައްސައިގެން ހުރެ ގެއިން ނެރެ، ސައިކަލަށް އަރައިގެން ފިލަން މަސައްކަތްކުރި އެވެ. އެކަމަކު އޭނާ ސައިކަލު މަޑުކޮށްލި ދަނޑިވަޅުގައި ފުލުހަކު ވަނީ އަތުހަރުގެ ބޮލުގައި މުގުރުން ޖަހައި އަންހެން މީހާ ސަލާމަތްކޮށްފަ އެެވެ. އެ ހާދިސާގައި އަންހެން މީހާއަށް މާބޮޑު އަނިޔާއެއް ނުވެ އެވެ.

އަތުހަރު ހުރީ ޝަރީއަތް ނިމެންދެން ބަންދުކޮށްފަ އެވެ.