ތަޖިކިސްތާން ބަލިކޮށް ރާއްޖޭން އެއްވަނަ މަގާމަށް ވާން ކުރަނީ

ރާއްޖޭގައި މިހާރު ކުރިއަށްދާ އޭޝިއަން ސެންޓްރަލް ޒޯން އަންހެން ވޮލީ ޗެލެންޖް ކަޕުގައި ތަޖިކިސްތާނު ބަލިކޮށް ދިވެހި ޓީމުން ފުރަތަމަ ބުރުގެ އެއްވަނަ މަގާމަށް ވާންކޮށްފި އެވެ.

ސޯޝަލް ސެންޓަރުގައި ރޭ ކުޅުނު މެޗު ރާއްޖޭން ކާމިޔާބު ކުރީ 4-1 ސެޓުންނެވެ.

ފުރަތަމަ ދެ ސެޓް، 25-18 އަދި 25-12 އިން ހޯދި އެވެ. ތިންވަނަ ސެޓް ވެސް އިތުބާރާ އެކު ފެށި އެވެ.

އެ ސެޓުން މޮޅުވި ނަމަ ރާއްޖެއަށް މެޗު ނިންމާލެވޭނެ އެވެ. އެކަމަކު ތަޖިކިސްތާނުން މުބާރާތުގައި މިހާތަނަށް ހޯދި ހަމައެކަނި ސެޓުން، ރާއްޖެ އަށް އިތުރު އިންތިޒާރެއް ކުރަން ޖެހުނެވެ. އެ ސެޓް ތަޖިކިސްތާނުން ހޯދީ 25-21 ންނެވެ.

ހަތަރު ވަނަ ސެޓް 25-16 އިން ގެނެސް، ރާއްޖޭން މެޗު ކާމިޔާބު ކުރި އެވެ.

ހަތަރު ޓީމު ވާދަކުރާ މުބާރާތުގެ ފުރަތަމަ ބުރު ކުރިއަށް ދަނީ ރައުންޑް ރޮބިން އުސޫލުންނެވެ. ސެމީގެ ފުރަތަމަ މެޗުގައި އެއްވަނަ އަށް ދާ ޓީމަށް ޖެހޭނީ އެންމެ ފުލަށްދާ ޓީމާ ކުޅޭށެވެ. ގުރޫޕްގެ އެއްވަނަ ހޯދައިގެން ފަސޭހަ ސެމީއަކަށް އެ މެޗު ވެދާނެ އެވެ.

އެއްވަނަ އަށް ދިއުމަށް ދެން ވާދަކުރާ ޓީމަކީ ޕޮއިންޓް ތަރުތީބުން މި ވަގުތު އެންމެ ކުރީގައި އޮތް ކިރިގިސްތާނެވެ. އިއްޔެ ހަވީރު އަފްޣާނިސްތާނާ ދެކޮޅަށް ކުޅުނު މެޗު ސީދާ ތިން ސެޓުން ކިރިގިސްތާން މޮޅުވި އެވެ.

ކިރިގިސްތާނުން މެޗު ކާމިޔާބު ކުރީ 25-14، 25-12 އަދި 25-14 އިންނެވެ. ކުޅުނު ދެ މެޗުގައި ވެސް އެއް ވެސް ސެޓެއް އެ ޓީމު އަތުން ދޫވެގެން ނުދެ އެވެ. މުބާރާތުގެ މިވަގުތު ފޭވަރިޓަކީ އެ ޓީމަށް ރާއްޖޭގެ ވޮލީގެ ތަޖުރިބާކާރުން ވެސް ބުނެ އެވެ.

އާދިއްތަ ދުވަހުގެ ނިޔަލަށް ގުރޫޕް ސްޓޭޖް ނިންމާލުމަށް ފަހު ސެމީ ފައިނަލް އަންގާރަ ދުވަހު ފަށާނެ އެވެ. ފުރަތަމަ ސެމީގައި ވާދަކުރާނީ ހަތަރު ޓީމުގެ ތެރެއިން އެއްވަނަ ހޯދާ ޓީމާއި ހަތަރުވަނަ އަށް ދާ ޓީމެވެ. ދެވަނަ ސެމީ ފައިނަލުގައި ދެވަނަ އާއި ތިންވަނަ ވާދަކުރާނެ އެވެ. ބްރޯންޒް މެޑަލް މެޗާއި ފައިނަލް މެޗު އޮންނާނީ ބުދަ ދުވަހު އެވެ.