ރައީސްގެ އަސަރުގަދަ މެސެޖެއް: ފުރާނައަކީ އަގުހުރި އެއްޗެއް، ރައްކާތެރިކޮށް ދުއްވާ!

އެކްސިޑެންޓްތަކުގައި ހިތާމަވެރި ހާދިސާތައް މި ފަހުން ހިނގާފައި ވަނިކޮށް ރައީސް ޑރ. މުހައްމަދު މުއިއްޒު މިއަދު ހެނދުނު ދެއްވީ ވަރަށް އަސަރުގަދަ މެސެޖެކެވެ؛ އެއީ، މުޖުތަމައު މިހާރު އޮތް ހާލަތަށް ބަލައި ވަރަށް މުހިންމު ވެސް މެސެޖެކެވެ.

"ފުރާނައަކީ އަގުހުރި އެއްޗެއް، ރައްކާތެރިކޮށް ދުއްވާ،" ރައީސް ވިދާޅުވި އެވެ.

މި މެސެޖު ރައީސް ދެއްވީ މަގުމަތީގެ ރައްކާތެރިކަމާ ގުޅޭ ގޮތުން ހަދާފައިވާ ހާއްސަ އެނިމޭޓެޑް ވީޑިއޯއެއް ސޯޝަލް މީޑިއާގައި ހިއްސާކުރައްވައިފަ އެވެ.

އެ ވީޑިއޯގައި ދައްކަނީ ބައްޕައަކު އޭނާގެ ދަރިފުޅަށް ހަދިޔާއަކަށް ގަޑިއެއް ދިނުމަށް ދަރިފުޅު ދިރިއުޅޭ ގެއަށް ދިއުމަށް ސައިކަލެއްގައި ދާ ތަނެވެ. އޭނާ ސައިކަލެއްގައި އެ ގެއަށް ދަނިކޮށް ވަންވޭއެއް ފަޅައި، ވަރަށް ބާރަށް ދުއްވި ކާރަކުން ސައިކަލުގައި ޖެހި ނުރައްކާތެރި އެކްސިޑެންޓެއް ހިނގަ އެވެ. އެ ކާރު ދުއްވަން އިނީ އޭނާގެ ދަރިފުޅެވެ. އެކްސިޑެންޓުގައި ބައްޕައަށް ވަރަށް ބޮޑަށް އަނިޔާވި އެވެ.

އެ އަސަރުގަދަ ވީޑިއޯ ހިއްސާކޮށް ރައީސް ވަނީ މަގުތަކަކީ އެންމެންނަށް ރައްކާތެރި ތަނަކަށް ހެދުމަށް މަސައްކަތްކުރުމަށް އެދިވަޑައިގެންފަ އެވެ.

"އަހަރެމެންގެ އަމިއްލަ އަތުން ހެދޭ ގޯހެއް ރަނގަޅުކުރަން ދެވަނަ ފުރުސަތެއް ނުލިބިދާނެ،" ރައީސް ވިދާޅުވި އެވެ.

މި ވީޑިއޯއަކީ މަޝްހޫރު "މާކަނާ" ޝޯ ގެނެސްދިން ޔާމީން ރަޝީދުގެ މަސައްކަތެކެވެ. އޭނާއަށް ވަނީ ވިޒުއަލް އާޓްސްގެ ދާއިރާއިން ހިތްވަރު ދިނުމުގެ ގައުމީ އިނާމް 2015 ވަނަ އަހަރު ލިބިފަ އެވެ.

ރައީސް މި މެސެޖު މި ދެއްވީ ރާއްޖޭގައި ނުރައްކާތެރި އެކްސިޑެންޓުތައް ހިނގުން ވަރަށް އާންމުވެފައިވާ ދަނޑިވަޅެއްގަ އެވެ. މި މަހު ހުޅުމާލޭގައި ހިނގި އެކްސިޑެންޓެއްގައި ވަނީ މީހަކު މަރުވެފަ އެވެ. އަދި އޭގެ އިތުރުން ވެސް ނުރައްކާތެރި އެތައް އެކްސިޑެންޓެއް ހިނގައި، އެތައް ބަޔަކު އަންނަނީ ފުރާނައާ ހަނގުރާމަކުރަމުންނެވެ.

އެކްސިޑެންޓުތައް ގިނަވުމާ ގުޅިގެން ރައީސް މުއިއްޒުގެ ހާއްސަ އިރުޝާދުގެ ދަށުން ސަރުކާރުން ވަނީ ގިނަ ފިޔަވަޅުތަކެއް ވެސް އަޅަން ފަށައިފަ އެވެ. ގަވާއިދާ ހިލާފަށް ދުއްވާ މީހުން ހުއްޓުވުމަށް ފުލުހުން މިހާރު އަންނަނީ 24 ގަޑިއިރު މާލެ ސަރަހައްދުގެ މަގުތަކުގައި ފޯރިމަރަމުންނެވެ.