އެފްއޭއެމްގެ ހިޔާނާތުގައި އަމިން ކޮންސްޓްރަކްޝަން ވެސް ބައިވެރިވޭ: ފުލުހުން

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ބައެއް އިސްވެރިން ހިންގި ކޮރަޕްޝަންގައި، ރާއްޖޭގެ މަޝްހޫރު ކޮންސްޓްރަކްޝަން ކުންފުނި އަމިން ކޮންސްޓްރަކްޝަންގެ މައްޗަށް ވެސް ހިޔާނާތާއި މަކަރާއި ހީލަތް ހެދުމާއި މަނީ ލޯންޑަރިންގެ ތުހުމަތުކޮށް، ދައުވާކޮށްދޭން އެދި ޕީޖީ އޮފީހަށް ފުލުހުން ފޮނުވައިފި އެވެ.

ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ބުނިގޮތުގައި އަމިން ކޮންސްޓްރަކްޝަނުން އިމާރާތް ކޮށްފައިވާ އަމިން އެވެނިއުގެ ދެ އެޕާޓްމެންޓެއް އެފްއޭއެމްގެ ފައިސާ ބޭނުން ކޮށްގެން އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް ގަނެފައިވާ މުއާމަލާތުގައި އެ ކުންފުނިން އޮޅުވާލަން މަސައްކަތް ކުރި ކަމަށެވެ.

ފުލުހުން ބުނީ ކޮވިޑް-19 އާ ގުޅިގެން ރާއްޖޭގެ ފުޓްބޯޅަ ކްލަބްތަކަށް މާލީ ދަތިކަން ކުރިމަތިވުމުން އެހީތެރިވުމަށްޓަކައި ފީފާ އިން އެފްއޭއެމަށް ދޫކުރި 1.9 މިލިއަން ޑޮލަރުގެ ލޯނުގެ ފައިސާގެ ތެރެއިން އެއް މިލިއަން ޑޮލަރު އަމިން ކޮންސްޓްރަކްޝަނަށް ބައްސާމް ދެއްކި ކަމަށެވެ.

އެއީ އެޕާޓްމަންޓް ގަތުމަށް ދިން ޑޮލަރު ކަމަށް ވިޔަސް، މަސައްކަތް ކޮށްފައިވަނީ ޑޮލަރު މާރުކުރުމުގެ މުއާމަލާތެއް ކަމުގައި ހެދުމަށް ކަމަށާއި އެއް މިލިއަން ޑޮލަރަށް ވާ ދިވެހި ރުފިޔާ އެފްއޭއެމަށް އަމިން ކޮންސްޓްރަކްޝަނުން ދިން ކަން ދެއްކުމަށް ލިޔުންތައް ހަދާފައިވާ ކަމަށް ފުލުހުން ބުންޏެވެ.

އެފްއޭއެމުން ވެސް އެ ފައިސާ ލިބުނު ކަމަށް ދައްކަން ވެގެން އެހެން ކުންފުންޏަކުން ލޯނެއް ނަގާފައިވާ ކަމަށް ފުލުހުން ބުންޏެވެ. އެ ލޯނުގެ އަދަދާއި އަމިން އިން އެފްއޭއެމަށް ފައިސާ ދެއްކި ކަމަށް ބުނެ ތައްޔާރު ކޮށްފައިވާ ލިޔުންތަކުގެ އަދަދާ ދިމާވާ ކަމަށް ފުލުހުން ބުންޏެވެ.

މި މައްސަލައިގައި އަމިން ކޮންސްޓްރަކްޝަންގެ އިތުރުން ބައްސާމާއި އެފްއޭއެމްގެ އޭރުގެ ފައިނޭންސް ހެޑް މުހައްމަދު އަގީލާއި އެ އެސޯސިއޭޝަނުގައި އޭރު އިސްކޮށް އުޅުނު ހަސަން ވަހީދުގެ މައްޗަށް ވެސް ދައުވާ ކޮށްދޭން ފުލުހުން ވަނީ ޕީޖީގައި އެދިފަ އެވެ. އެ ހުރިހާ އެންމެންގެ މައްޗަށް ކުރަނީ ހިޔާނާތާއި އޮޅުވާލުމުގެ އިތުރުން މަނީ ލޯންޑަރިންގެ ތުހުމަތެވެ.

އަމިން ކޮންސްޓްރަކްޝަނަކީ ރާއްޖޭގައި އެންމެ ފުޅާ ދާއިރާއެއްގައި ކޮންސްޓްރަކްޝަންގެ މަސައްކަތްކުރާ އެއް ކުންފުންޏެވެ. ވެލާނާ ބިލްޑިންގް ހިމެނޭހެން ސަރުކާރުގެ ވަރަށް ގިނަ އިމާރާތްތައް އެ ކުންފުނިން ވަނީ އިމާރާތްކޮށްފަ އެވެ.

އަމިން ކޮންސްޓްރަކްޝަން ހިމެނޭ މި މައްސަލަ ފުލުހުންނަށް ފާހަގަ ކުރެވުނީ އެފްއޭއެމަށް ބޭރުގެ ފަރާތްތަކުން އެހީގެ ގޮތުގައި ދޭ ޑޮލަރު އެ އެސޯސިއޭޝަނުގެ އިސްވެރިންނާއި އެސޯސިއޭޝަނާ ގުޅުން އޮންނަ ފަރާތްތަކާއި ކުންފުނިތަކުގެ އެކައުންޓަށް ޖަމާކޮށް، ނަހަމަ ގޮތުގައި ބޭނުންކޮށް މަނީ ލޯންޑަރިންގެ އަމަލުތައް ހިންގުމުގެ މައްސަލަތަކެއް މިދިޔަ އަހަރުގެ އޮކްޓޫބަރު ތަހުގީގު ކުރަން ފެށުމުންނެވެ. އެ މައްސަލާގައި އެފްއޭއެމަށް މިދިޔަ އަހަރު ފުލުހުން ވަދެ، ލިޔުންތަކެއް ވެސް ގެންދިޔަ އެވެ.

މި މައްސަލާގައި ހިމެނޭ އެހެން ބައެއް މުއާމަލާތްތަކާ ގުޅިގެން ބައްސާމްގެ މައްޗަށް ދައުލަތުން މިހާރު ވެސް އޮތީ ކްރިމިނަލް ކޯޓުގައި ދައުވާ ކޮށްފަ އެވެ. އެ މައްސަލަތަކުގެ ޝަރީއަތް މިހާރު އަންނަނީ ހިންގަމުންނެވެ.