ހަ މެޗަށް ފަހު އިންޓަގެ މައްޗަށް މިލާން ކުރި ހޯދައިފި

އިޓާލިއަން ލީގުގައި އޭސީ މިލާނުން ރޭ އިންޓަ މިލާން އަތުން 2-1 އިން މޮޅުވެ، ހަ މެޗަށް ފަހު ވާދަވެރި ޓީމުގެ މައްޗަށް ކުރި ހޯދައިފި އެވެ.

މިލާނަށް ނިސްބަތްވާ މި ދެ ޓީމު ރޭގެ މެޗުގެ ކުރިން ކުޅުނު ހަ މެޗު ވެސް ކާމިޔާބުކުރީ އިންޓަ އެވެ. ރޭގެ މެޗުން މޮޅުވެ އިންޓަ އަށް އެ ސިލްސިލާ ހަތަކަށް އިތުރުކޮށް ރެކޯޑެއް ހެދެން އޮތެވެ.

މި މެޗުން މޮޅުވުމާ އެކު މިލާނުގެ ކޯޗު ޕައޮލޯ ފޮންސެކާގެ ވަޒީފާ ވަނީ ސަލާމަތްވެފަ އެވެ. ލީގުގައި ދަށް ނަތީޖާތަކެއް ނެރެފައިވާތީ އާއި، ޗެމްޕިއަންސް ލީގުގައި ލިވަޕޫލް އަތުން 3-1 އިން ބަލިވެފައިވާތީ ފޮންސެކާ ރޭ މޮޅުނުވި ނަމަ މަގާމުން ވަކިކުރީސް ކަމަށް ރިޕޯޓްތައް ބުނެ އެވެ.

އެކަމަކު އޭނާ ވަނީ، ރޭ އިންޓަގެ ވަރުގަދަ ކުޅުން ހުއްޓުވުމުގައި ޓެކްޓިކަލީ ކާމިޔާބު ހޯދައިފަ އެވެ. ޗެމްޕިއަންސް ލީގުގައި މިދިޔަ ހަފުތާގައި އިނގިރޭސި ޗެމްޕިއަން މެންޗެސްޓާ ސިޓީއާ 0-0 އިން އެއްވަރުކުރި އިންޓަ ކޮޅަށް މިލާނުން ރޭ ލީޑު ނެގީ 10 ވަނަ މިނެޓުގައި ކްރިސްޓިއަން ޕުލިސިކް ޖެހި ގޯލުންނެވެ.

އެކަމަކު 27 ވަނަ މިނެޓުގައި ފެޑެރިކޯ ޑިމާކޯ ވަނީ އިންޓަ އަށް އެއްވަރުކޮށްދީފަ އެވެ. މިލާން މޮޅުވީ 89 ވަނަ މިނެޓުގައި ޑިފެންޑަރު މަޓެއޯ ގަބިއާ ޖެހި ގޯލުންނެވެ. އޭގެ ކުރިން ވެސް މިލާނުގެ ރަފައެލް ލިއާއޯ އާއި ޓެމީ އަބްރަހަމް ވަނީ ރަނުގެ ފުރުސަތުތަކެއް ބޭކާރުކޮށްލައިފަ އެވެ.

މި މޮޅާ އެކު މިލާން ވަނީ އިންޓައާ އެއްވަރަށް، 8 ޕޮއިންޓް ހޯދައި ތާވަލުގެ ހަތް ވަނަ އަށް އަރައިފަ އެވެ. އިންޓަ އޮތީ ލަނޑުގެ ތަފާތުން ހަ ވަނައިގަ އެވެ. ތާވަލުގެ އެއް ވަނައިގައި 11 ޕޮއިންޓާ އެކު ޓޮރިނޯ އެވެ.

އިންޓަގެ ކޯޗު ސިމޯނީ އިންޒާގީ ބުނީ މިއީ މިލާނަށް ހައްގު މޮޅެއް ކަމަށާއި، އޭނާގެ ޓީމަށް އެދެވޭ ކުޅުމެއް ނުދެއްކުނު ކަމަށެވެ.

"އަހަރެމެންގެ ފަރާތުން ވަރަށް ނުވާ ކަމެއް މި ފެނުނީ. ޓީމު ފެނުނީ ވަރަށް ޑިސްއޯގަނައިޒްކޮށް. އަދި ކުޅުންތެރިން މެޗާ ދޭތެރޭ އެންމެ ރަނގަޅު ވިސްނުމެއް ވެސް ނޫން ނަގާފައި އޮތީ،"