މަޝްރޫއުތަކަށް މިއަހަރު ތިން ބިލިއަން ރުފިޔާގެ ލޯނު ނަގައިފި

މި އަހަރުގެ މިހާތަނަށް ސަރުކާރުން 200 މިލިއަން ޑޮލަރު (ތިން ބިލިއަން ރުފިޔާ) ގެ ލޯނު ނަގައިފި އެވެ.

ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތަކުން އެނގޭ ގޮތުން ސައުދީ ފަންޑް ފޯ ޑިވަލޮޕްމެންޓުން 150 މިލިއަން ޑޮލަރުގެ ލޯނު ނަގާފައިވެ އެވެ. އެއީ ވެލާނާ އިންޓަނޭޝަނަލް އެއާޕޯޓުގެ މަސައްކަތް އަވަސްކުރަން ނެގި ދެ ލޯނެކެވެ.

އޭގެ އިތުރުން ނަގާފައިވަނީ އެސްއެމްއީ އިމްޕެކްޓް ފަންޑަށް ފައިސާ ހޯދުމަށް އިސްލާމިކް ޑިވަލޮޕްމެންޓް ބޭންކުން ނެގި ދެ ލޯނެކެވެ. އެއީ 10.25 މިލިއަން ޑޮލަރުގެ ލޯނަކާއި 30 މިލިއަން ޑޮލަރުގެ ލޯނެކެވެ. އަދި ރަށްރަށުގެ ހޮސްޕިޓަލް ހެދުމަށް ކުވައިތު ފަންޑުން 10 މިލިއަން ޑޮލަރުގެ ލޯނެއް ނަގާފައިވެ އެވެ.

މިއަހަރުގެ މިހާތަނަށް ދެ ލޯނަކަށް ސަރުކާރުން ގެރެންޓީ ދީފައިވެ އެވެ. އެއީ ބޭންކް އޮފް ސިލޯނުން މޯލްޑިވްސް ފަންޑް މެނޭޖްމެންޓް ކޯޕަރޭޝަން (އެމްއެފްއެމްސީ) އަށް ދޫކުރި 230 މިލިއަން ރުފިޔާގެ ދެ ލޯނަކަށެވެ. އެ ދެ ލޯނު ނަގާފައިވަނީ ސަބްމެރިން ކޭބަލްގެ މަޝްރޫއަށެވެ.

ސަރުކާރުން މިހާތަނަށް ހުރިހާ ލޯނެއް ވެސް ނެގީ ތަރައްގީގެ މަޝްރޫއުތަކަށެވެ. އެހެންވެ، އެ ލޯނުތަކުގެ ފައިސާ ދޫކުރާނީ މަޝްރޫއުތައް ކުރިއަށް ދާ މިންވަރަކުން އެކި ބައި ބަޔަށް ބަހާލައިގެންނެވެ. އެހެންކަމުން، ދަރަންޏަށް އެ އަދަދުތައް އިތުރުވާނީ، އެ ފައިސާ މަޝްރޫއުތަކަށް ބޭނުން ކުރުމުންނެވެ.

ކުރީގެ ސަރުކާރުގައި ލޯނާއި ގެރެންޓީގެ ގޮތުގައި 3.5 ބިލިއަން ޑޮލަރު (54 ބިލިއަން ރުފިޔާ) ނަގާފައިވާ ކަން ފިނޭންސް މިނިސްޓްރީގެ ތަފާސްހިސާބުތަކުން ދައްކަ އެވެ. އޭގެ ތެރެއިން 1.4 ބިލިއަން ޑޮލަރު (22 ބިލިއަން ރުފިޔާ) ނެގީ އިންޑިއާގެ އެގްޒިމް ބޭންކުންނެވެ.

އެހެންވެ، މިއަހަރު ރާއްޖޭގެ ދަރަނި 129 ބިލިއަން ރުފިޔާއަށް އަރާނެ ކަމަށް ބަޖެޓްގައި ވަނީ ލަފާކޮށްފަ އެވެ.