ބާސްކެޓްކޯޓު ދޫކޮށްލީ ކަރުނައާ އެކު، އެކަމަކު ކާމިޔާބު މާޒީން ގެނެސްދިނީ ހިނިތުންވުން

ބާސްކެޓްބޯޅަ ކިޓުގައި ފާތިމަތު ރިޝްމާ ރޭ ކޯޓަށް ނުކުތީ ބޯޅަ ހިފައިގެނެއް ނޫނެވެ. އޭނާ އަތުގައި އޮތީ މައިކެވެ. މުހިންމު ވާހަކައެއް އިއުލާން ކުރަނީ ކަމަށް ހީކުރެވުނެވެ.

"ވަރަށް އުނދަގޫ ކަމެއް ކުރަން މި އުޅެނީ،" ރިޝްމާ އެންމެ ފުރަތަމަ ވާހަކައަކަށް ބުންޏެވެ.

އޭނާ އެހެން ބުނުމުން ހީކުރެވުނީ، ސޯޝަލް ސެންޓަރުގެ އިންޑޯ ހޯލަށް ޖަމާވެފައި އޮތް އޯޑިއަންސާ މުހާތަބުކޮށް ވާހަކަ ދައްކަން ޖެހިލުންވި ކަމަށް ބުނީހެންނެވެ.

އެކަމަކު ވީ އެހެނެއް ނޫނެވެ. ރާއްޖޭގެ ބާސްކެޓްބޯޅައިގައި އުފެއްދި އެންމެ ކާމިޔާބު އަންހެން ކުޅުންތެރިޔާ، 22 އަހަރަށް ފަހު ކުޅުން ހުއްޓާލަން ނިންމާލިކަން އިއުލާން ކުރަނީ އެވެ.

"އަބަދުވެސް އެނގޭ މި ދުވަސް އަންނާނެކަން. އެކަމަކު ދުވަހަކު ވެސް ބޭނުމެއް ނުވޭ މި ދުވަސް އަންނާކަށް. ބޭނުންވަނީ އަބަދުވެސް ބާސްކެޓްބޯޅަ ކުޅެކުޅެ ހުންނަން. އެކަމަކު އެނގޭ ކޮންމެވެސް ދުވަހަކުން މި ދުވަސް އަންނާނެކަން،" 2002 ގައި ބާސްކެޓްބޯޅަ ކުޅެން ފެށި ރިޝްމާ ރޭ ބުންޏެވެ.

ނެޓްބޯޅަ އާއި ހޭންޑްބޯޅަ އަދި މިނީ ފުޓްބޯޅަ ވެސް ރިޝްމާ ކުޅުނެވެ. އޭގެ ތެރެއިން ނެޓްބޯޅަ އާއި ހޭންޑްބޯޅަ ގައުމީ ޓީމަށް ވެސް ކުޅުނެވެ.

އެކަމަކު ރިޝްމާގެ ހިތާއި ސިކުނޑި ގުޅިފައި އޮތީ ބާސްކެޓްބޯޅައާ އެވެ. ކުޅިވަރުގައި އޭނާގެ އެންމެ ކާމިޔާބު ދުވަސްތަސް އޭނާ ހޭދަ ކުރީ އެ ކުޅިވަރުގަ އެވެ.

ފެންކަޅި ވެފައި ހުރެ ރިޝްމާ ބުނީ ރުޅި އަޔަސް، ދެރަވިޔަސް، އުފާވިޔަސް އެ ހުރިހާ ކަމެއް ހިއްސާކުރަނީ ބޯޅައާ ކަމަށާއި، އެއީ އަބަދުވެސް އޭނާއާ އެކުގައިވާ އެއްޗެއް ކަމަށެވެ.

ރާއްޖޭގައި އުފެދުނު އެންމެ ކާމިޔާބު ފިރިހެން ކުޅުންތެރިޔާ މުހައްމަދު ޒިލާލްގެ އަންހެނުން، ރިޝްމާ ބުނީ ކުޅުން ހުއްޓާލަން ޖެހުމުން ދެރަ ވިޔަސް އޭނާ އަށް އުއްމީދު ލިބެނީ ބާސްކެޓްބޯޅައިގެ އާ ޖީލަށް އޮތް އިތުބާރު ބޮޑުވުމުން ކަމަށެވެ. ރާއްޖޭގެ ބާސްކެޓްބޯޅަ އެހެން ހަރުފަތަކަށް ގެންދެވޭނެވަރުގެ ހުނަރުވެރި ކުޅުންތެރިން މިހާރުގެ ޖީލުގައި އެބަތިބި ކަމަށް ރިޝްމާ ބުންޏެވެ.

ރާއްޖޭގެ ބާސްކެޓްބޯޅަ، މިހާރު އޮތް ހަރުފަތަށް ގެންގޮސް ދިނުމުގައި އެންމެ ބޮޑު ހިއްސާއެއް ވި އެއް ކުޅުންތެރިޔަކީ ރިޝްމާ އެވެ. އޭނާގެ ކެޕްޓަންކަމުގެ ދަށުން ސަރަހައްދީ ދެ މުބާރާތަކުން ރާއްޖެ އަށް ރިހި މެޑަލް ހޯދައި ދިނެވެ.

ރާއްޖޭގައި ރޭ ނިމިގެން ދިޔަ ބާސްކެޓްބޯޅައިގެ އިންޓަނޭޝަނަލް ކްލަބް މުބާރާތުގެ އަންހެން ޑިވިޝަނުގެ ފައިނަލުގައި ކުއީންސް ބީސީގެ ޖޯޒީގައި ބާސްކެޓްބޯޅައިގެ އެންމެ ފަހު މުބާރާތް ނިންމާލީ ވެސް ރިހި މެޑެއްޔާ އެކު އެވެ.

އާ ޖީލަށް އިތުބާރު ހޯދައި ދިނުމަށް ފަހު ބާސްކެޓް ކޯޓުން ރިޝްމާ ފައިބައިގެން ދިޔައީ ހިތްވަރު ހޯދައި ދީފަ އެވެ. ކުޅިވަރުގެ ގިނަ އިރުޝާދުތަކެއް ވެސް ދެމުންނެވެ.

"މި ކްލަބް ޓޯނަމަންޓް ވެސް، ސްކޫލް ޓޯނަމަންޓް ވެސް ބާލަފައި ވަރަށް އުފާވޭ. އިންޝާ ﷲ،" މިހާރުގެ ޖީލަށް ކާމިޔާބު ހޯދޭނެ ކަމުގެ ޔަގީންކަމާ އެކު ރިޝްމާ ބުންޏެވެ.

ބާސްކެޓްބޯލް ކޯޗިން ލައިސެންސް ވެސް ހާސިލުކޮށްފައިވާ ރިޝްމާގެ ރިޓަޔާމެންޓާ ގުޅިގެން ކުޅިވަރުގެ އެކި ފަރާތްތަކުން އޭނާ އަށް ހެޔޮ އެދުންތައް ފޮނުވަމުން ދިޔަ އެވެ.

ސްޕޯޓްސް މިނިސްޓަރު އަބްދުﷲ ރާފިއު ވިދާޅުވީ ރިޝްމާ ވަކިވެގެން އެ ދިޔައީ ކުޅިވަރުގެ ގިނަ ފިލާވަޅުތަކެއް ނަގައިދިނުމަށްފަހު ކަމަށެވެ.

"ފާހަގަކޮށްލެވޭ 20 އަހަރު. ކުޅިވަރުގައި އެތައް ފިލާވަޅުތަކެއް އެތައް ހަނދާންތަކެއް ގެނެސް ދިން. ކުޅިވަރުގައި ނަމޫނާ ޝަހުސިއްޔަތެއް،" ރާފިއު ވިދާޅުވި އެވެ.