ރާއްޖޭގެ ދެ ޓީމު ބަލިކޮށް ލަންކާގެ އީގަލްސް އިން ސުޕަ ކަޕް ދެ ތަށި ވެސް ގެންގޮސްފި

އަންހެން އަދި ފިރިހެން ޑިވިޝަންގެ ފައިނަލް މެޗު ވެސް ކާމިޔާބުކޮށް، ސްރީލަންކާގެ އީގަލް ކްލަބުން ބާސްކެޓްބޯޅަ ސުޕަ ކަޕްގެ ދެ ތަށި ކާމިޔާބު ކޮށްފި އެވެ.

ސޯޝަލް ސެންޓަރުގެ އިންޑޯ ކޯޓުގައި މިއަދު ކުޅުނު އަންހެން ފައިނަލްގައި އީގަލްސް ކްލަބް މޮޅުވީ ރާއްޖޭގެ ޗެމްޕިއަން ކުއީންސް ބީސީއާ ވާދަކޮށް 74-72 ޕޮއިންޓުންނެވެ.

ފައިނަލް މެޗުގެ މޮޅު ކުޅުންތެރިއަކަށް ހޮވުނީ، މި މެޗަށް ފަހު މިއަދު ރަސްމީކޮށް ކުޅުން ހުއްޓާލި ރާއްޖޭގެ ބާސްކެޓްބޯޅަ ލެޖެންޑް، ފާތިމަތު ރިޝްމާ އެވެ.

މުބާރާތުގެ ރައުންޑް ރޮބިން ބުރުގައި ކުއީންސް ވަނީ 56-50 ޕޮއިންޓުން އީގަލްސް ބަލިކޮށްފަ އެވެ. ރައުންޑް ރޮބިން ބުރުގެ އެއްވަނަ ހޯދީ ވެސް ކުއީންސް އެވެ. އީގަލްސް ފައިނަލަށް ދަތުރު ކުރީ ދެވަނަ ޓީމުގެ ގޮތުގަ އެވެ.

ފިރިހެން ފައިނަލްގައި މިރޭ އީގަލްސް ކްލަބް މޮޅުވީ، ރެޑްވިންގްސް ބީސީއާ ވާދަކޮށް 77-71 ޕޮއިންޓުންނެވެ.

ފުރަތަމަ ކުއާޓަރުގައި ލީޑުގައި ނިންމާލި ނަމަވެސް ދެން ކުޅުނު ދެ ކުއާޓަރުގައި ރެޑްވިންގްސް އަށް އެންމެ އެދެވޭ ކުޅުމެއް ނުދެއްކުނެވެ. ފަހު ކުއާޓަރުގައި އީގަލްސް އަށް މާ ބޮޑު ފުރުސަތެއް ނުދީ ރެޑްވިންގްސް އިން ހިތްވަރު ކުރި އެވެ. އެކަމަކު ތަފާތަކަށް ވީ އީގަލްސް އިން ފަހު ކުއާޓަރުގައި ހޯދި ހަ ޕޮއިންޓެވެ.

ރައުންޑް ރޮބިން ބުރުގައި އީގަލްސް ކްލަބާއި ރެޑްވިންގްސް ބައްދަލުކުރި މެޗު، އީގަލްސް ކާމިޔާބު ކޮށްފައި ވަނީ 101-96 ޕޮއިންޓުންނެވެ.

މިދިޔަ ބުރާސްފަތި ދުވަހު ފެށި ސުޕަ ކަޕްގެ ފިރިހެން ޑިވިޝަނުގައި ލަންކާގެ އީގަލްސް ކްލަބާއި ރާއްޖޭގެ ރެޑްވިންގްސްގެ އިތުރުން ދެން ވާދަކުރީ ޓީރެކްސް ބީސީ އާއި ކިންގްސް ބީސީ އެވެ. އަދި އަންހެން ޑިވިޝަނުގައި އީގަލްސް އާއި ކުއީންސްގެ އިތުރުން އެލީޓް ސްޕޯޓްސް ބީސީ ވާދަކޮށްފައިވެ އެވެ.