ސައްހަ ނޫން ކްލަބްތައް މެދުވެރިކޮށް އެމްބީއޭގެ ނިންމުންތަކަށް ޖީއެސް ނުފޫޒު ފޯރުވާ މައްސަލަ

ރަޖިސްޓަރީނުކުރާ ކްލަބްތައް މުބާރާތުގައި ވާދަކޮށް، އެ ކްލަބްތައް މެދުވެރިކޮށް، ބާސްކެޓްބޯޅަ އެސޯސިއޭޝަން (އެމްބީއޭގެ) ޖެނަރަލް ސެކްރެޓަރީ ވިޝާމް ރަޝީދު (ވިޒުއްޕެ) ނުފޫޒު ފޯރުވާފައިވާ މައްސަލަ ފެންމަތިވެއްޖެ އެވެ.

ފެބްރުއަރީ އަދި މާޗް 2022 ގައި ބޭއްވި ގައުމީ ބާސްކެޓްބޯޅަ ލީގުގައި ވިޝާމްގެ ހިއްސާ އޮންނަ ދެ ކްލަބެއް ބައިވެރި ކުރި އިރު ސައްހަ ރަޖިސްޓްރޭޝަނެއް އެ ދެ ކްލަބްތަކުގައި ނެތްކަން "މިހާރު" އަށް ލިބުނު ލިޔުންތަކުގައިވެ އެވެ.

އެ އަހަރުގެ ގައުމީ މުބާރާތުގައި ބައިވެރިވުމުގެ ސުންގަނޑި ހަމަވެފައި ވަނީ އެ އަހަރުގެ ޖެނުއަރީ 10 ވަނަ ދުވަހު އެވެ.

ކަރުދާސް ކްލަބްތަކެއް ހަދައިގެން އެސޯސިއޭޝަންގެ ނިންމުންތަކަށް ނުފޫޒު ފޯރުވުމުގައި އެމްބީއޭގެ އަކީ މަޝްހޫރު އެސޯސިއޭޝަނެކެވެ. އެކެއްގެ ނަމުގައި ހަދާފައިވާ ގިނަ ކްލަބްތަކުން އެސޯސިއޭޝަންގެ ކޮންގްރެސްގައި ވޯޓް ލާ މައްސަލަ، ކުރިން ވެސް "މިހާރު" އިން ފެންމަތިކޮށްފައި ވާނެ އެވެ.

ގައުމީ ލީގުގެ 2022 ގެ މުބާރާތުގައި ރަޖިސްޓަރީނުކޮށް ބައިވެރި ކުރި ދެ ކްލަބަކީ ނައިޓްސް ބާސެކްޓްބޯޅަ ކްލަބާއި ވައިކިންގްސް ބާސްކެޓްބޯޅަ ކްލަބެވެ.

ސައްހަ ރަޖިސްޓްރޭޝަނެއް ނެތި އެ ދެ ކްލަބް މުބާރާތުގައި ބައިވެރި ކުރި ސަބަބާ ބެހޭގޮތުން ވިޝާމްއާ ސުވާލު ކުރުމުން އޭނާ ވިދާޅުވީ އެ ކްލަބްތައް މުބާރާތުގައި ވާދަކޮށްފައި ވަނީ ރަޖިސްޓްރޭޝަން މައްސަލަ ހައްލު ކުރުމަށް ފަހު ކަމަށެވެ.

"ތި ދެންނެވި ކުލަބްތައް މުބާރާތުގައި ވާދަކޮށްފައިވަނީ ރަޖިސްޓްރޭޝަން މަރުހަލާތައް ފުރިހަމަ ކޮށް ނިންމާފައި ކަމަށް ރެކޯޑްތަކުން ފެންނަން ހުރީ،" ވިޝާމް ވިދާޅުވި އެވެ.

ނަމަވެސް، މައުލޫމާތު ހޯދާ ލިބިގަތުމުގެ ހައްގުގެ ދަށުން އަމިއްލަ ފަރާތަކުން އެދިގެން ސްޕޯޓްސް ކޮމިޝަނާގެ އޮފީހުން ދީފައިވާ މައުލޫމާތުގައި ވާގޮތުން އެ ކްލަބްތައް ރަޖިސްޓަރީކޮށްފައި ވަނީ މުބާރާތުގައި ބައިވެރި ކުރުމުގެ މުއްދަތު ފަހަނައަޅައި ދިޔަ ފަހުންނެވެ.

ވިޝާމް އާއި އަލީ ރަޝީދު ކިޔާ މީހެއް މުއައްސިސުކަމުގެ ދަށުން އުފައްދާފައިވާ އެ ކްލަބްތައް ރަޖިސްޓަރީކޮށްފައި ވަނީ 26 ޖެނުއަރީ 2022 ގަ އެވެ.

އެއީ އެ އަހަރުގެ ގައުމީ ލީގާއި އެމްބީއޭ ކަޕުގައި ރަޖިސްޓަރީ ކުރުމުގެ މުއްދަތު ހަމަވިތާ ގާތްގަނޑަކަށް 16 ދުވަސް ފަހުންނެވެ.

އެމްބީއޭގެ އަސާސީ ގަވާއިދުގައި ބުނެފައި ވަނީ އެ އެސޯސިއޭޝަންގެ ފުރިހަމަ މެންބަރުކަން ލިބޭނީ ރާއްޖޭގެ ގާނޫނީ ހަމަތަކުގެ މަތިން އުފައްދާފައިވާ އަދި އެސޯސިއޭޝަނުން ބާއްވާ ގައުމީ ފެންވަރުގެ އެއް މުބާރާތުގައި ބައިވެރިވެފައިވާ ކްލަބްތަކަށް އެކަނި ކަމަށެވެ. ފުރިހަމަ މެންބަރަކަށްވުމުން އެސޯސިއޭޝަންގެ ކޮންގްރެސްގައި ވޯޓް ދިނުމަށް ޝަރުތު ހަމަވެ އެވެ.

ސައްހަ ރަޖިސްޓްރޭޝަނެއް ނެތި އެ އަހަރުގެ މުބާރާތުގައި ޓީމުތައް ބައިވެރި ކުރީ އެމްބީއޭގެ އޭޖީއެމްގައި ވޯޓް ދިނުމަށް ޝަރުތުހަމަ ކުރުމުގެ ގޮތުންނެވެ. އޭގެ ފަހުން ބޭއްވި ކޮންގްރެސްގައި އެ ކްލަބްގެ ނަމުގައި ވޯޓް ދީފައިވާކަން ވެސް "މިހާރު" އަށް ވަނީ އެނގިފަ އެވެ.

ރަޖިސްޓަރީ ނުކުރާ ކްލަބްތައް މުބާރާތުގައި ބައިވެރިކޮށްފައިވާ މައްސަލައިގެ ހުލާސާ

- 2022 ގެ ގައުމީ ލީގާއި އެމްބީއޭ ކަޕުގައި ކްލަބްތައް ބައިވެރިކުރުމުގެ މުއްދަތު ހަމަވެފައި ވަނީ 10 ޖެނުއަރީ 2022 ގައި

- ނައިޓްސް ބީސީ އާއި ވައިކިންގިސް ބީސީ ރަޖިސްޓަރީކޮށްފައި ވަނީ އޭގެ 16 ދުވަސް ފަހުން 26 ޖެނުއަރީ 2022 ގައި

- ވިޝާމް ވިދާޅުވީ އެ ކްލަބްތައް މުބާރާތުގައި ވާދަކުރީ ރަޖިސްޓްރޭޝަން މައްސަލަ ހައްލު ކުރުމަށް ފަހު ކަމަށް

- އެ އަހަރު ބޭއްވި ކޮންގްރެސްގައި އެ ކްލަބުން ބައިވެރިވެ ވޯޓް ދީފައިވޭ