ދިރާގަށް 36 އަހަރު، ރާއްޖެ ގުޅުވައިލުމުގައި އެންމެ އުހުގައި!

އެއީ ރާއްޖޭގެ ޖަޒީރާ ރަށްތަކުގެ އޮތް ދުރުމިން ބޫތުތަކުންނާއި ޓެލެފޯނުތަކުން ކައިރި ކޮށްދިން ކުންފުންޏެވެ. ރާއްޖެ އަށް މުވާސަލާތީ ހިދުމަތް ތައާރަފު ކޮށްދިނީ އެ ކުންފުނީގެ މުވައްޒަފުންގެ ބުރަ މަސައްކަތުންނެވެ. ލައިން ފޯނުތަކާއި ބޫތުތަކުން ދިރާގުން ދޭން ފެށި ހިދުމަތަށް މިއަދު 36 އަހަރު ފުރުނުއިރު އެއީ އެންމެ ފަހުގެ ޓެކްނޮލަޖީއާ އެކު ފުޅާ ދާއިރާއެއްގައި ރާއްޖެ އަށް 5ޖީގެ ހިދުމަތް ދޭ ކުންފުނި ވެސް މެ އެވެ.

ދިރާގުގެ ތާރީހީ ހިދުމަތްތަކަށް މަރުހަބާ އެވެ. މިދިޔަ 36 އަހަރު ދިވެހި ޓެކޮނޮލޮޖީގެ ޒަމާނަށް ހޭލުންތެރި ކުރުވަން ކޮށްދިން ކަންކަމަށް މަރުހަބާ އެވެ. މުވާސަލާތީ ހިދުމަތުގައި އެންމެ "އުހުގައި" އަދިވެސް ދިރާގު ހިފަހައްޓާލަނީ ޒަމާނީ ކުރިއެރުމަށް އިސްކަންދޭތީ އެވެ.

ދިރާގުން އަންނަނީ ދިވެހިން އެންމެ ފުރިހަމަ އަށް ގުޅުވައި ދިނުމަށް މުވާސަލާތުގެ ދާއިރާ އިން ގިނަ މަސައްކަތްތަކެއް ކުރަމުންނެވެ. ހަމައެކަނި މިދިޔަ އަހަރަށް ބެލިޔަސް ފެންނަނީ އެ ގުޅުން ވަރުގަދަ ކުރުމުގެ ފިޔަވަޅުތަކެވެ. މިދިޔަ އަހަރު ދިރާގުން ވަނީ އެ ކުންފުނީގެ ޑޮމެސްޓިކް ސަބްމެރިން ކޭބަލް އާ ހަތަރު ސެގްމަންޓު އިތުރުކޮށް، އަޕްގްރޭޑުކޮށްފަ އެވެ. މުޅިން އާ ސެކިއުރިޓީ އޮޕަރޭޝަން ސެންޓަރެއް ގާއިމުކޮށް، ނެޓްވޯކް އޮޕަރޭޝަން ސެންޓަރުގެ ހިދުމަތްތައް ވަނީ އިތުރަށް ހަރުދަނާ ކޮށްފަ އެވެ.

ދިރާގުން ރާއްޖޭގައި ދެމުންދާ ހިދުމަތްތައް ފުޅާކުރުމުގެ ގޮތުން އެންމެ ފަހުގެ ގްލޯބަލް ސުޕަ ހައިވޭ ކަމަށްވާ ބައިނަލްއަގުވާމީ ސީ-މީ-ވީ 6 ސަބްމެރިން ކޭބަލް މި އަހަރު ރާއްޖެ އަށް ވަނީ އިފްތިތާހު ކޮށްފަ އެވެ. ސީ-މީ-ވީ 6 ސަބްމެރިން ކޭބަލް އިން ދުނިޔޭގެ އެކި މައި އިންޓަނެޓް އެކްސްޖޭންޖް ޕޮއިންޓްތަކަށް ރާއްޖެ އަށް އެކްސެސް ލިބޭނެ އެވެ. އިތުރު ގައުމުތަކަށް ބަރޯސާ ނުވެ، ދުނިޔޭގެ ޑިޖިޓަލް ނެޓްވޯކާ ރާއްޖެއާ ސީދާ ގުޅާލެވޭނެ އެވެ. މިއީ ރާއްޖޭގެ މުވާސަލާތީ ހިދުމަތަށް އިންގިލާބީ ބަދަލެއް ގެންނާނެ މަޝްރޫއެކެވެ.

ދިރާގަކީ ރާއްޖޭގައި އެންމެ މަތީ ފަންތީގެ މުވާސަލާތީ ހިދުމަތްދިނުމުގައި ހިމެނޭ ކުންފުނީގެ ގޮތުގައި ބޭރު ދުނިޔެ އިން ވެސް ވަނީ ބަލައިގަނެފަ އެވެ. އޫކްލާ އިން ދޭ ފާސްޓަސްޓް ނެޓްވޯކުގެ އެވޯޑު ޖެހިޖެހިގެން ތިން އަހަރު ދިރާގުން ހޯދި އެވެ. އޭޝިއަން ޓެލެކޮމްސް އެވޯޑްސް 2024ގައި "މޯލްޑިވްސް ބްރޯޑްބޭންޑް ޓެލެކޮމް ކޮމްޕެނީ އޮފް ދަ އިޔާ"ގެ އެވޯޑު ވެސް ދިރާގަށް ވަނީ ލިބިފަ އެވެ.

ރާއްޖޭގެ އެންމެ މަގުބޫލު އެއް ނެޓްވޯކުގެ ގޮތުގައި އޮތް ދިރާގަކީ ކަސްޓަމަރުންނާ ގުޅިގެން ކަސްޓަމަރުން އެދޭ ފަދަ ހިދުމަތްތަކެއް ފޯރުކޮށްދޭ ކުންފުންޏެކެވެ. މި ކުންފުނިން ކަސްޓަމަރުންނަށް ހާއްސަ ޕްރޮމޯޝަންތަކެއް ކެނޑިނޭޅި ފޯރުކޮށްދެމުން އަންނަނީ އަގުހުރި އިނާމުތަކަކާ ވެސް އެކު އެވެ. އެ ކުންފުނިން މި ދިޔަ އަހަރު ހުށަހެޅި ޓެސްލާ ކާރާއި މި އަހަރުގެ އަހަރީ ދުވަހަށް ހުށަހެޅި ލޯންޗަކީ ދިވެހި ކުންފުންޏަކުން މިހާތަނަށް ހުށަހެޅި އެންމެ ބޮޑު އިނާމުތަކެވެ.

ރާއްޖޭގައި ޑިޖިޓަލް ޓްރާންސްފޮމޭޝަނެއް ގެންނަން ދިރާގުން އަންނަނީ މުވާސަލާތީ ހިދުމަތްތަކުގެ އިތުރުން ޒުވާނުންނަށް ބޭނުންތެރި ދާއިރާތަކަށް އިންގިލާބީ ބަދަލަކަށް މަސައްކަތް ކުރަމުންނެވެ. ގޭމަރުންނަށް ހާއްސަކޮށް "ދިރާގު ގޭމާސް ގިލްޑު"ގެ ނަމުގައި މި އަހަރު އިފުތިތާހުކުރި ޕްލެޓްފޯމަކީ މި ފަދަ އެންމެ ވަރުގަދަ ބަދަލެއް ގެނުވި އޮންލައިން ގޭމިން އެރީނާ އެވެ. ދިވެހި ގޭމަރުންނާ ގުޅިގެން ދިވެހި ޑިވަލޮޕަރުން އުފެއްދި މި ޑިޖިޓަލް ޕްލެޓްފޯމަކީ ޒުވާނުންނަށް ޑިޖިޓަލް ދުނިޔެ އިން ހުރި އެކި ފުރުސަތުތައް ފަހިކޮށްދީ, ޒުވާނުންނަށް ގޭމިން ފަދަ ކުޅިވަރުތައް ކުޅޭނެ ތަނަވަސް ޕްލެޓްފޯމެއް ގާއިމު ކުރުމަށް އެ ކުންފުނިން ތައާރަފުކުރި ޕްލެޓްފޯމެކެވެ.

ދިރާގުން އަންނަނީ މި ޕްލެޓްފޯމުގެ އިތުރުން ޒުވާނުންނަށް ތައުލީމީ, އިޖުތިމާއީ އަދި ކުޅިވަރުގެ އެކި ދާއިރާތަކުން ކުރިއަށް ދާނެ ފުރުސަތުތައް އެކި ޖަމިއްޔާތަކާ ގުޅިގެން ފަހިކޮށްދެމުންނެވެ. ކުޑަކުދިންނާއި އަންހެނުންގެ ހައްގުތައް ރައްކާތެރިކުރުމަށާއި އެ މީހުން ބާރުވެރި ކުރުވުމުގައި ވެސް ދިރާގަކީ ނަމޫނާ ކުންފުންޏެވެ.

ދިރާގުން ކުރިއަށް އޮތް އަހަރަށް ވެސް ބޮޑެތި މަސައްކަތްތަކެއް ވަނީ ރާވައިފަ އެވެ. އެ ކުންފުނީގެ އަމާޒަކީ މިހާރަށް ވުރެ ފުރިހަމަ ގުޅުމެއް ގާއިމުކުރުމަށް މުވާސަލާތީ ރޮނގުންނާއި އިޖުތިމާއީ ގޮތުން ކުރަމުންދާ މަސައްކަތްތައް ހަރުދަނާ ކުރުމެވެ.