އެހެން ޒޯންތަކަށް ރަޖިސްޓްރީ ކޮށްފައިވާ އުޅަނދުތަކަށް ހާއްސަކުރި ޕާކިންގައި 250 އަށްވުރެ ގިނަ ވެހިކަލް

އެހެން ޒޯނުތަކަށް ރަޖިސްޓްރީ ކޮށްފައިވާ އުޅަނދުތައް ބެހެއްޓުމަށް ހުޅުމާލެއިން ހާއްސަކުރި ސަރަހައްދުގައި ހަތަރު ފުރޮޅުލީ 250 އަށްވުރެ ގިނަ ވެހިކަލް ޕާކްކޮށްފައިވާ ކަމަށް ޓްރާންސްޕޯޓް މިނިސްޓްރީން ބުނެފި އެވެ.

މާލޭގެ މަގުމަތީގެ ތޮއްޖެހުން ކުޑަކުރުމަށް ޓްރާންސްޕޯޓް މިނިސްޓްރީން ވަނީ ރަޖިސްޓްރީ ނުކުރާ އުޅަނދުތަކާއި އެހެން ޒޯނުތަކަށް ރަޖިސްޓްރީކޮށްގެން މާލޭގައި ދުއްވާ ވެހިކަލްތައް ވަގުތީ ގޮތުން ޕާކްކުރަން ހުޅުމާލޭ 2 އިން 40،000 އަކަފޫޓުގެ ބޮޑު ބިމެއް ހަމަޖައްސައިފަ އެވެ.

ޓްރާންސްޕޯޓް މިނިސްޓްރީން އިއްޔެ ބުނީ ރަޖިސްޓްރީނުކޮށް މަގުމަތީގައި ބަހައްޓާފައި ހުރި ވެހިކަލާއި އެހެން ޒޯނުތަކަށް ރަޖިސްޓްރީ ކޮށްފައިވާ 250 އަށްވުރެ ގިނަ ވެހިކަލް އެ ޕާކިން ޒޯނުގައި މި ވަގުތު އެބައޮތް ކަމަށެވެ.

އެ ޕާކިން ޒޯނަށް ނުގެންދާ އުޅަނދުތަކުގައި ފުލުހުން ދަނީ ސްޓިކާ ޖަހަމުންނެވެ. އަދި އެތަނުގައި ބާއްވައިގެން މާލެ ސަރަހައްދަށް ރަޖިސްޓްރީ ބަދަލު ކުރަން ހަ މަސް ދުވަހުގެ މުއްދަތެއް ލިބޭނެ އެވެ.

އޭގެ އިތުރުން، ހަތަރު ފުރޮޅުލީ އުޅަނދު ވަގުތީ ގޮތުން ޕާކްކުރަން ހުޅުމާލެ ސަހަރާ ކުރިމަތިން ވެސް ބޮޑު ބިމެއް ހަމަޖައްސާފައިވެ އެވެ.

ޕާކިން ބިލްޑިންތައް އެޅުމުގެ އެއްބަސްވުމުގައި އިއްޔެ ސޮއި ކުރެއްވުމަށްފަހު ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ ޖާގައިގެ ގޮތުން މާލެއަށް ވުރެ ވެހިކަލް ގިނަ އެހެން ގައުމެއް ނެތް ކަމަށެވެ.

"މި ދަރަޖައަށް ގެންގޮސްފައިވަނީ ހަމަ ގަސްތުގައި." އަމީން ވިދާޅުވި އެވެ.

އެހެންވެ، ވެހިކަލް ލިމިޓް ކުރުމަށް މިނިސްޓްރީން ވަނީ މިދިޔަ މާޗް މަހު ގަވައިދެއް ހަދައިފަ އެވެ. އަދި ރަށްރަށުގައި އެންމެ ގިނަވެގެން ދުއްވޭނެ ވެހިކަލްތަކުގެ އަދަދާ ބެހޭ އުސޫލު، އެ ރަށެއްގެ ކައުންސިލުން ހަދަން ޖެހޭނީ މިނިސްޓްރީން ހަދާފައިވާ ގަވައިދާ އެއްގޮތަށެވެ.