ދެ އެކޮމޮޑޭޝަން ބްލޮކް ފާސްކޮށް 8 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފި

ހުޅުމާލޭގެ ދެ އެކޮމޮޑޭޝަން ބްލޮކެއް ބަލައިފާސްކޮށް، 8 ބިދޭސީން އިމިގްރޭޝަނުގެ ބެލުމުގެ ދަށަށް ގެންގޮސްފި އެވެ.

އިމިގްރޭޝަނުން ބުނީ މިއީ މިދިޔަ ބުރާސްފަތި ދުވަހު ހުޅުމާލޭ ފޭސް އެކެއްގައި ކުރިއަށް ގެންދިޔަ އޮޕަރޭޝަނަކުން އެ އިދާރާގެ ބެލުމުގެ ދަށަށް ގެންދިޔަ މީހުން ކަމަށެވެ. އެ ރެއިޑުގައި ބައިވެރިވެފައި ވަނީ އިމިގްރޭޝަންގެ ޓްރެއިނީ އޮފިސަރުންނެވެ.

އިމިގްރޭޝަނާއި ހޯމް މިނިސްޓްރީ ގުޅިގެން ކުރިއަށް ގެންދާ މި އޮޕަރޭޝަނަކީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރަމުން އަންނަ މަސައްކަތެކެވެ. މާލޭ ސަރަހައްދުގެ ކެފޭތަކާއި ރެސްޓޯރަންޓުތަކުގެ އިތުރުން ސެލޫންތަކާއި އެކޮމޮޑޭޝަން ބްލޮކްތަކުގައި ގަވާއިދާ ހިލާފަށް އުޅޭ މީހުންނާއި އެއްވެސް ލިޔެކިޔުމެއް ނެތި ރާއްޖޭގައި އުޅޭ މީހުން ވެސް ވަނީ މި އޮޕަރޭޝަނުގެ ދަށުން ޑީޕޯޓުކޮށްފަ އެވެ.

މިދިޔަ އަށް މަސް ތެރޭގައި އިމިގްރޭޝަނުން ކުރިއަށް ގެންދިޔަ އޮޕަރޭޝަންތަކުގައި މިހާތަނަށް ވަނީ 4054 އަށް ވުރެ ގިނަ ބިދޭސީން ޑީޕޯޓުކޮށްފަ އެވެ. އިމިގްރޭޝަނުގެ ތަފާސްހިސާބުތަކުން ދައްކާ ގޮތުގައި މީގެ ތެރެއިން އެންމެ ގިނަ ބަޔަކު ފޮނުވާލީ މިދިޔަ ޖޫން މަހު އެވެ.

ހޯމް މިނިސްޓްރީން ބުނި ގޮތުގައި ބިދޭސީންގެ މައްސަލައަކީ ސަރުކާރުން ހާއްސަ އިސްކަމެއްދީގެން ހައްލުކުރުމަށް މަސައްކަތް ކުރާ ކަމެކެވެ. އެ މަސައްކަތުގެ ދަށުން މާލޭގެ އިތުރުން މީހުން ދިރިއުޅޭ އެހެން ރަށްރަށާއި ރިސޯޓުތަކާއި ސިނާއީ ރަށްތަކާއި ދަނޑުވެރިކަމަށް ދޫކޮށްފައިވާ ރަށްތަކުގައި ދިރިއުޅޭ ބިދޭސީންގެ މައުލޫމާތު އެއްކުރުމުގެ މަސައްކަތް ކުރަމުން އަންނަ ކަމަށް މިނިސްޓްރީން ބުނެ އެވެ.

މިނިސްޓްރީން ބުނީ އާންމު ސަލާމަތާއި ރައްކާތެރިކަމަށް ނުރައްކާވާ ފަދަ ގޮތަށް ކާބޯތަކެތި ތައްޔާރުކުރާ ތަންތަން ބަލައި ފާސްކުރުމަށް ހާއްސަ އޮޕަރޭޝަނެއް ވެސް ފަށާފައިވާ ކަމަށެވެ.

ހޯމް މިނިސްޓްރީން ބުނީ މި އޮޕަރޭޝަނުގެ ބޭނުމަކީ ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކޮށް، އާންމު ސިއްހަތަށް ނުރައްކާވާ ފަދަ ކަންކަން މަދުކޮށް ރައްޔިތުންނަށް ސަލާމަތާއި ރައްކާތެރިކަން ކަށަވަރުކޮށްދީ، އެފަދަ ކަންކަމުގައި ޝާމިލުވާ މީހުންނަށް ފިޔަވަޅު އެޅުން ކަމަށެވެ.

މިދިޔަ މަހުގެ ފަހުކޮޅު އިމިގްރޭޝަނުން ވަނީ ގަވާއިދާ ހިލާފަށް އުޅޭ ބިދޭސީން ލައްވައި މަސައްކަތްކުރުވާ 92 ދިވެއްސަކަށް ލިއުމުން ނަސޭހަތުގެ ނޯޓިސްދީ އިސްލާހު ނުކޮށްފި ނަމަ، ފިޔަވަޅު އަޅާނެ ކަމުގެ އިންޒާރުދީފަ އެވެ.