ބައްސާމްގެ އެޕާޓްމަންޓް ފުލުހުންނާ ހަވާލުކުރަން ދިން މުއްދަތު އިތުރުކޮށްދޭން އެދެފި

ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފައިސާ ބޭނުންކޮށްގެން އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލް ހުޅުމާލެއިން ގަނެފައިވާ ކަމަށް ތުހުމަތު ކުރާ ދެ އެޕާޓްމަންޓް ފުލުހުންނާ ހަވާލުކުރަން ދީފައިވާ މުއްދަތު އިތުރުކުރަން ބައްސާމް އެދިފައިވާ ކަމަށް ފުލުހުން ބުނެފި އެވެ.

އެފްއޭއެމްގެ ހިޔާނާތުގެ ތުހުމަތު ކުރެވޭ ބައްސާމް އަމީން އެވެނިއުއިން ގަނެފައިވާ އެޕާޓްމަންޓުތައް ފުލުހުންނާ ހަވާލުކުރަން ދިން މުއްދަތު މިއަދުގެ ނިޔަލަށް ހަމަވާނެ އެވެ.

ނަމަވެސް، އެ މުއްދަތު މިމަހުގެ ނިޔަލަށް އިތުރުކޮށްދިނުމަށް ބައްސާމްގެ ވަކީލުންގެ ފަރާތުން ސިޓީއެއް ފޮނުވާފައިވާ ކަމަށް ފުލުހުން މިއަދު ބުންޏެވެ.

"މި ސިޓީއަށް ޖަވާބު ދިނުމުގެ މަސައްކަތް ދަނީ ކުރަމުން." އޭނާ ވިދާޅުވި އެވެ.

ފުލުހުން ކުރިން ބުނެފައިވަނީ މިއަދުގެ ނިޔަލަށް އެޕާޓްމެންޓް ހަވާލު ނުކޮށްފިނަމަ ކްރިމިނަލް ކޯޓުން މިިދިޔަ މަހުގެ 28 ވަނަ ދުވަހު ނެރުނު އަމުރާ އެއްގޮތަށް އެ ދެ ތަން ފުލުހުންގެ ބެލުމުގެ ދަށަށް ނެގުމަށް ކުރަންޖެހޭ މަސައްކަތްތައް ކުރަމުންދާނެ ކަމަށެވެ.

ބައްސާމް އެ ދެ ޕެންޓްހައުސް ގަތީ ކޮވިޑް-19 ގެ ދުވަސްވަރު ފުޓްބޯޅަ ކްލަބްތަކަށް ދިމާވި މާލީ ދަތިތަކުން އަރައިގަތުމަށް ފީފާއިން އެފްއޭއެމްއަށް ދޫކުރި ލޯނު ފައިސާއިން ކަމަށް ފުލުހުން ބުނެފައިވެ އެވެ. އަދި އެ މައްސަލާގައި އޭނާގެ މައްޗަށް ދައުވާކޮށްދޭން ފުލުހުން ވަނީ މިދިޔަ މަހު ޕީޖީ އޮފީހުގައި ވެސް އެދިފަ އެވެ.

ފުލުހުން ވަނީ އެ މައްސަލާގައި ބައްސާމުގެ އިތުރުން އެޕާޓްމަންޓް ވިއްކި އަމިން ކޮންސްޓްރަކްޝަނާއި އެފްއޭއެމްގެ އޭރުގެ ފައިނޭންސް ހެޑް މުހައްމަދު އަގީލާއި އެ އެސޯސިއޭޝަނުގައި އޭރު މަސައްކަތް ކުރި ހަސަން ވަހީދުގެ މައްޗަށް ވެސް ދައުވާކޮށްދޭން އެދިފަ އެވެ.

އަމިން ކޮންސްޓްރަކްޝަނުން ތަރައްގީކޮށްފައިވާ އަމީން އެވެނިއު އިން ދެ ޕެންޓްހައުސް ގަތުމަށް އެފްއޭއެމްގެ ފައިސާއިން އެއް މިލިއަން އެމެރިކާ ޑޮލަރު އެ ކުންފުންޏަށް ބައްސާމް ދައްކާފައިވާ ކަމަށް ފުލުހުން ކުރިން ބުނެފައިވެ އެވެ. އަދި އެ ޑޮލަރަށްވާ ދިވެހި ފައިސާ އަމިން އިން އެފްއޭއެމަށް ދައްކާފައިނުވާ ކަމަށާއި ނަމަވެސް ފައިސާ ދެއްކި ކަމަށް ހެދުމަށްޓަކައި ލިޔެކިޔުން ތައްޔާރުކޮށްފައިވާ ކަމަށް ފުލުހުން ބުނެފައިވެ އެވެ.

އެފްއޭއެމުން ވެސް އެ ފައިސާ ލިބުނު ކަމަށް ހެދުމަށްޓަކައި ކުންފުންޏަކުން ލޯނެއް ނަގާފައިވާ ކަމަށާއި އެ އަދަދާއި، އަމިން އިން އެފްއޭއެމަށް ފައިސާ ދެއްކި ކަމަށް ބުނެ ތައްޔާރުކޮށްފައިވާ ރިސިޓްތަކުގެ އަދަދާ ދިމާވާ ކަމަށް ވެސް ފުލުހުން ބުންޏެވެ. އެހެންވެ، ފުލުހުން ބުނި ގޮތުގައި ބެލެވެނީ އެފްއޭއެމުން މަސައްކަތް ކޮށްފައި ވަނީ ބައްސާމް އެޕާޓްމަންޓް ގަތުމަށް އަމީން އަށް ޑޮލަރުން ދެއްކި ފައިސާއަކީ ޑޮލަރު މާރުކުރަން ދިން ފައިސާއެއްކަން ދެއްކުމަށެވެ.

ފުލުހުން ބުނީ އެއް މިލިއަން ޑޮލަރަކީ ކޮވިޑުގައި ކްލަބްތަކަށް ދިމާވި މާލީ ދަތިކަން ހައްލުކޮށްދޭން ކަމަށް ބުނެ ފީފާ އަތުން އެފްއޭއެމްއިން ނެގި 1.9 މިލިއަން ޑޮލަރުގެ ކޮވިޑް ރިލީފް ލޯނުގެ ފައިސާކަން ތަހުގީގަށް ފާހަގަ ވެފައިވާ ކަމަށެވެ.

އެފްއޭއެމްގެ ހިޔާނާތާ ގުޅޭ އެހެން މައްސަލައަކާ ގުޅިގެން ބައްސާމްގެ މައްޗަށް ދައުވާކުރާ އެހެން މައްސަލައެއް ކްރިމިނަލް ކޯޓުގައި މިހާރު ވެސް ދަނީ ހިނގަމުންނެވެ.