ރޫޕޭ ކާޑުން މާލީ މުއާމަލާތްތައް ވަރުގަދަވެ، ވިޔަފާރި ކުރުމުގައި ލުއިތައް ލިބޭނެ: މިނިސްޓްރީ

ރާއްޖޭގައި މިއަދު ބޭނުންކުރަން ފެށި އިންޑިއާގެ ރޫޕޭ ކާޑާ އެކު ދެ ގައުމުގެ މާލީ މުއާމަލާތްތައް އިތުރަށް ވަރުގަދަވެ، އިންޑިއާއާ އެކު ވިޔަފާރިކުރުމުގައި ލުއިތަކެއް ލިބޭނެ ކަމަށް އިކޮނޮމިކް ޑިވެލޮޕްމަންޓް މިނިސްޓްރީން މިއަދު ބުނެފި އެވެ.

އެ ގައުމުގެ އިންސްޓެންޓް ޕޭމެންޓް ސިސްޓަމް، ޔުނިފައިޑް ޕޭމެންޓްސް އިންޓަފޭސް (ޔޫޕީއައި) ގެ ދަށުން ރޫޕޭ ކާޑު މިއަދު ވަނީ ރާއްޖެއަށް ތައާރަފްކޮށްފަ އެވެ. މި ކާޑު ތައާރަފްކުރީ، ރައީސް ޑރ. މުހައްމަދު މުއިއްޒު އިންޑިއާއަށް ކުރައްވާ ރަސްމީ ދަތުރުފުޅުގައި އެ ގައުމުގެ ބޮޑުވަޒީރު ނަރެންދުރަ މޯދީއާ އެކު ބޭއްވެވި ރަސްމީ ބައްދަލުވުމަށް ފަހު ދެ ބޭފުޅުން އެކުގައި ސްޓޭޓްމަންޓެއް ދެއްވުމުގެ ކުރިން ބޭއްވި ރަސްމިއްޔާތުގަ އެވެ.

ރޫޕޭ ކާޑުގެ ހިދުމަތާ ގުޅޭ ގޮތުން، އިކޮނޮމިކް މިނިސްޓްރީން ނެރުނު ބަޔާނުގައި ބުނީ އެ ހިދުމަތަކީ ޒަމާނީ ޓެކްނޮލޮޖީގައި ރާއްޖޭގެ މާލީ ނިޒާމް ހަރުދަނާކޮށް، ވިޔަފާރީގެ މުއާމަލާތްތަކުގައި ބޭނުންކޮށް އަދި ވިޔަފާރީގެ ރޮނގުން އިތުރަށް ގުޅުން ބަދަހިކުރަން އެޅުނު މުހިއްމު ފިޔަވަޅެއް ކަމަށެވެ.

އިންޑިއާގެ ޓޫރިސްޓުންނަކީ ރާއްޖޭގެ ޓޫރިޒަމްގައި މުހިއްމު ދައުރެއް އަދާކުރާ ބަޔަކަށް ވާތީ މި ތަނުގައި ފަސޭހަކަމާ އެކު މުއާމަލާތްތައް ހިންގަން ރޫޕޭ ކާޑު ބޭނުންކުރެވޭނެ ކަމަށް މިނިސްޓްރީން ބުންޏެވެ.

"އިންޑިއާއަކީ ދިވެހިރާއްޖޭގެ ވިޔަފާރީގެ މުހިއްމު ބައިވެރިއަކަށްވެފައި ރޫޕޭ ކާޑުގެ ހިދުމަތުގެ ސަބަބުން ދެ ގައުމުގެ ދެމެދު ކުރެވޭ މާލީ މުއާމަލާތްތައް ފަސޭހަކުރެވި، ވިޔަފާރި އިތުރަށް ފުޅާކުރުމަށް މަގުފަހިވެ، ވަކިން ހާއްސަކޮށް ކުދި އަދި މެދު ފަންތީގެ ވިޔަފާރިތަކުން އިންޑިއާއާ އެކު ވިޔަފާރިކުރުމުގައި ލުއިތަކެއް ލިބޭނެކަން ފާހަގަކުރަމެވެ،" ބަޔާނުގައި ބުންޏެވެ.

މިނިސްޓްރީން ބުނީ ރޫޕޭ ކާޑުގެ ހިދުމަތަކީ ޕޭމަންޓް ވޮލެޓުތައް އަދި އާ ޑިޖިޓަލް ފައިނޭންސް ސިސްޓަމްތައް ރާއްޖެއަށް ގެނައުމާއި ތައާރަފްކުރުމަށް ރައީސް ޑރ. މުހައްމަދު މުއިއްޒު ކުރައްވާ މަސައްކަތުގެ ތެރެއިން އެއް ކަންތައް ކަމަށެވެ.

ރާއްޖޭގައި ރޫޕޭ ތައާރަފްކުރިއަސް، އެ ކާޑުން މުއާމަލާތްކުރެވޭނީ އިންޑިއާ މީހުންނަށް އެކަންޏެވެ. އެ ގައުމަކީ ގިނަ ދިވެހިން ބޭސްފަރުވާއަށް ގޮސް އުޅޭ ގައުމަކަށް ވިއަސް، ދިވެހިންނަށް އިންޑިއާގައި މި ކާޑު އަދި ބޭނުމެއް ނުކުރެވޭނެ އެވެ.