ވޭމަންޑޫގެ ކުޑަކުދިންގެ މަރުކަޒުގައި ހުރި ކުއްޖަކު މުވައްޒަފަކަށް ހަމަލާދިން މައްސަލައެއް ހޫނުވެ، މުޒާހަރާ ކުރަނީ

ތ. ވޭމަންޑޫގައި ފެމިލީ ޑިވެލޮޕްމަންޓް މިނިސްޓްރީން ބަލަހައްޓަމުން އަންނަ ފެމިލީ އެންޑް ޗިލްޑްރަންސް ސާވިސް ސެންޓަރު (އެފްސީއެސްސީ) ހުރި އަންހެން ކުއްޖެއް އެ ތަނުގައި މަސައްކަތް ކުރާ އެ ރަށުގެ މުވައްޒަފަކަށް ހަމަލާދިން ކަމަށް ބުނާ މައްސަލައެއް ހޫނުވެ، ވޭމަނޑޫގެ މީހުން މުޒާހަރާ ކުރަން ފަށައިފި އެވެ.

އެ މުޒާހަރާގެ ބައިވެރިވާ އެ ރަށުގެ މީހަކު "މިހާރު" އަށް ބުނީ އުމުރުން 15 ނުވަތަ 16 އަހަރުގެ އަންހެން ކުއްޖާ، އެހެން ކުދިންނަށް އަނިޔާ ކުރުން ފަދަ ކަންކަމުގައި މީގެ ކުރިން ވެސް ކަމާ ބެހޭ މީހުންނަށް ރަށު ރައްޔިތުންގެ ފަރާތުން ހުށަހެޅި ކަމަށެވެ.

އެ ކުއްޖާ އެ ރަށަށް ގެންދިޔައީ މީގެ މަހެއްހާ ދުވަސް ކުރިން ކަމަށާއި ސްކޫލަށް ފޮނުވުން ހުއްޓާލީ، ކްލާސް ކުއްޖެއްގެ ކަރުގައި ހިފައި، މާރާމާރީ ހިންގި މައްސަލައަކަށް ފަހު ކަމަށް އޭނާ ބުންޏެވެ.

އެކަހަލަ ކަންކަން ރަށުގައި އެ ކުއްޖާގެ ފަރާތުން ތަކުރާރުކޮށް ހިންގަމުން ދިޔަ ކަމަށާއި ހައްލެއް ނުލިބި ހުއްޓާ އެ ކުދިން ތިބޭ ތަނުގެ ބިއްލޫރިތައް މިއަދު ތަޅާލައި ތަނުގައި މަސައްކަތް ކުރާ މުވައްޒަފަކަށް ހަމަލާދިނީ ކަމަށް އޭނާ ބުންޏެވެ.

"މިއަދު ވީގޮތް ކަމަށް އެ ސްޓާފް ބުނަނީ، އެ ކުދިންނަށް ވައިފައި ދީފައި އިންނަނީ ވަކި ގަޑިއެއްގައި ކަމަށް. ރޭގަނޑު ވަކި ގަޑިއެއްގައި ކަމަށް. އެ ވަގުތު ހަމަވުމުން ވައިފައި ކަނޑާލީމަ އެ އަންހެން ކުއްޖާ ރުޅި އައިސްގެން އެ ސްޓާފުގެ ބޮލުގައި ރިހަ އަޅަން ގެންގުޅޭ ކަހަލަ މުށި ބޯތަށްޓަކުން ޖެހީ ކަމަށް. އެ ސްޓާފުގެ ބޮލުގެ އެއްފަޅި އެއްކޮށް ދުޅަވެފައި އޮތީ،" އޭނާ ބުންޏެވެ.

އެ ކުއްޖާގެ ފަރާތުން ރަށު ތެރޭގައި އުޅުމުގައި ވެސް އިތުރު މައްސަލަތަކެއް ފާހަގަވެފައިވާ ކަމަށް ވެސް އޭނާ ބުންޏެވެ.

ރައްޔިތުން މުޒާހަރާ ކުރަން ފެށީ އެ ކުއްޖާ ރަށުގައި ބަހައްޓަން ބޭނުން ނުވާ ކަމަށް ބުނެ އެވެ. ރައްޔިތުން ބޭނުން ވަނީ އެ ކުއްޖާ އެހެން ރަށަކަށް ބަދަލު ކުރަން ކަމަށް ވެސް އޭނާ ބުންޏެވެ.

ފުލުހުން މުޒާރަހާ ކޮންޓްރޯލް ކުރުމަށް މަސައްކަތް ކުރަމުން އަންނައިރު، ފުލުހުންގެ މީޑިއާ އޮފިޝަލް ވިދާޅުވީ ވޭމަންޑޫގެ އެފްސީއެސްސީ ކުރިމަތީގައި ބަޔަކު ހިތްހަމަ ނުޖެހުން ފާޅު ކުރަމުންދާތީ އެ ސަރަހައްދުގައި ފުލުހުން ހަރަކާތްތެރިވަމުން އަންނަ ކަމަށެވެ.

އެކަމާ ގުޅޭގޮތުން ސުވާލު ކުރުމުން މިނިސްޓްރީގެ މީޑިއާ އޮފިޝަލް ވިދާޅުވީ އެ މައްސަލަ ބަލަމުން އަންނަ ކަމަށެވެ. ނަމަވެސް އިތުރު ތަފްސީލެއް ނުދެއްވި އެވެ.