ޓޫރިޒަމްގެ ދެ ބާނީ، އުއްޗު އާއި ޗަމްޕާ އަފީފާ ސާޓާގެ ހާއްސަ އެވޯޑު ހަވާލުކޮށްފި

ރާއްޖެ އަށް ޓޫރިޒަމް ތައާރަފު ކުރުމުގެ ދެ މޭސްތިރިން ކަމަށްވާ ޗަމްޕާ ބްރަދާސްގެ ޗެއާމަން މުހައްމަދު މޫސާ (އުއްޗު) އާއި ކްރައުން ކުންފުނީގެ ޗެއާމަން ހުސެއިން އަފީފަށް ސައުތު އޭޝިއަން ޓްރެވަލް އެވޯޑްސް (ސާޓާ) އިން ހާއްސަ އެވޯޑެއް މިއަދު ދީފި އެވެ.

އަފީފުގެ ރިސޯޓު މީރު މޯލްޑިވްސްގައި ބޭއްވި ރަސްމިއްޔާތެގައި އެ އެވޯޑު އެ ދެބޭފުޅުންނާ ހަވާލު ކޮށްދެއްވީ ސަޓާގެ ނައިބު ރައީސް ސޫރަޖް ހާން އެވެ.

އުއްޗު އާއި އޭނާގެ ކޮއްކޮ އަފީފަށް ހާއްސަ އެވޯޑު ދިނީ "ފޭސް އޮފް ސައުތު އޭޝިއާ" ގެ ނަމުގަ އެވެ. އެ އެވޯޑު ދިނީ، ރާއްޖޭގެ ޓޫރިޒަމް ދާއިރާ ކުރިއެރުވުމަށް އެ ދެ ބޭފުޅުން ކުރެއްވި މަސައްކަތުގެ އަގު ވަޒަން ކުރުމުގެ ގޮތުންނެވެ.

މި އަހަރުގެ ސާޓާ އެވޯޑު ބޭއްވީ ނޭޕާލްގަ އެވެ. އެއީ އެވޯޑު ދޭން ފެށިތާ ނުވަ ވަނަ އަހަރެވެ.

ޗަމްޕާ ބްރަދާސް އަކީ ރާއްޖޭގެ ޓޫރިޒަމް ދާއިރާގައި އެންމެ ފުޅާ ދާއިރާއެއްގައި ހިންގާ ކުންފުންޏެވެ. އުއްޗު ގެންދަވަނީ ޓޫރިޒަމް ދާއިރާގެ އިތުރުން ދަނޑުވެރިކަމާއި މަސްވެރިކަމާއި ރިއަލް އެސްޓޭޓް އަދި ފައިނޭންޝަލް ދާއިރާގައި ވެސް ވިޔަފާރިތައް ހިންގަމުންނެވެ.