ފެނަކައިގެ 6.7 މިލިއަން ރުފިޔާ ހިފަހައްޓަން ކޯޓުން އަމުރުކޮށްފި

ފެނަކަ ކޯޕަރޭޝަނުން ބަޔަކަށް ދައްކަން ޖެހޭ ފައިސާތަކެއް ނުދައްކާތީ، އެ ކުންފުނީގެ އެކައުންޓްތަކުން 6.7 މިލިއަން ރުފިޔާ ހިފަހައްޓަން ސިވިލް ކޯޓުން އަމުރުކޮށްފި އެވެ.

ކޯޓުން އިއްޔެ ވަކިވަކިން ނެރުނު ދެ އަމުރަކުން ހިފަހައްޓާފައި ވަނީ 5.2 މިލިއަން ރުފިޔާ އާއި 1.5 މިލިއަން ރުފިޔާ އެވެ. އެއީ ދެ މައްސަލައެއްގައި ފައިސާ ދައްކަން ކޮށްފައިވާ ހުކުމް ތަންފީޒު ކުރަން ހުށަހަޅާފައިވާތީ ނެރުނު އަމުރުތަކެއް ކަމަށް ސިވިލް ކޯޓުން ބުންޏެވެ.

އެ ދެ މައްސަލާގައި ވެސް ފައިސާ ދައްކަން ފެނަކައިގެ މައްޗަށް ސިވިލް ކޯޓުން ހުކުމްކުރީ މިދިޔަ އަހަރު އެވެ. އެ ދެ މައްސަލަ ވެސް ފެނަކައިން އިސްތިއުނާފް ކޮށްފައި ނުވާއިރު، އެ މައްސަލަތަކުގައި ފައިސާ ދައްކަން ޖެހޭ ކަމަށް އޭރު ފެނަކައިން އޮތީ ކޯޓުގައި އެއްބަސްވެފަ އެވެ.

ބޮޑު ދަރަންޏެއް އޮތް ފެނަކަ ކުންފުނި، އަންނަ ޖެނުއަރީ މަހުން ފެށިގެން އެސްޓީއޯގެ ދަށަށް ބަދަލުކުރަން ސަރުކާރުން މިހާރު އޮތީ ނިންމައިފަ އެވެ. އެއް ކުންފުންޏަކުން އެސްޓީއޯއަށް މިވަގުތު އެންމެ ބޮޑު އަދަދެއްގެ ދަރަނި ދައްކަން ޖެހިފައި އޮތީ ވެސް ފެނަކައިންނެވެ. އެ ކުންފުނިން ތެޔޮ ގަނެގެން އެސްޓީއޯއަށް ދެ ބިލިއަން ރުފިޔާ ދައްކަން އެބަ އޮތެވެ.

މިދިޔަ އޮގަސްޓް މަހުގެ ތެރޭގައި ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ވިދާޅުވި ގޮތުގައި އެސްޓީއޯ އާއި އެހެން ކުންފުނިތަކަށް 800 މިލިއަން ރުފިޔާ ދައްކާފައިވެ އެވެ. އެ ފައިސާ ދެއްކިޔަސް 4.1 ބިލިއަން ރުފިޔާގެ ދަރަނި އަދިވެސް އެބަ އޮތް ކަމަށް އޭނާ އޭރު ވިދާޅުވެފައިވެ އެވެ.

އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި ފެނަކަ ބަދަލު ކުރުމުން އެ ކުންފުނީގެ މާލީ ހާލަތު ރަނގަޅުކޮށް، ފައިދާވާ ކުންފުންޏަކަށް ހެދޭނެ ކަމަށް އެސްޓީއޯގެ ސީއީއޯ ޝިމާދު އިބްރާހިމް ކުރިން ވިދާޅުވެފައިވެ އެވެ.