"ޕުޝްޕާ 2" ރިލީޒްކުރުމުގެ ކުރިން 1،000 ކްރޯޑް ރުޕީސްގެ އާމްދަނީއެއް ހޯދައިފި

ދެކުނު އިންޑިއާގެ ފިލްމު "ޕުޝްޕާ 2" އަށް އެ ފިލްމު ރިލީޒްކުރުމުގެ ކުރިން 1،000 ކްރޯޑް ރުޕީސް (118.9 މިލިއަން ޑޮލަރު)ގެ އާމްދަނީއެއް ލިބިއްޖެ އެވެ.

ރިޕޯޓްތައް ބުނި ގޮތުގައި، ޕުޝްޕާގެ ތިއޭޓްރިކަލް ރައިޓްސް ނުވަތަ ސިނަމާތަކުގައި ފިލްމު ދެއްކުމަށް ޑިސްޓްރިބިއުޝަން ރައިޓްސްގެ ގޮތުގައި މިހާތަނަށް ވަނީ 600 ކްރޯޑް ރުޕީސް (71.4 މިލިއަން ޑޮލަރު) ލިބޭ ގޮތަށް ހަމަޖެހިފަ އެވެ. އެ ފިލްމުގެ ޑިޖިޓަލް ސްޓްރީމިން ރައިޓްސް ވަނީ 275 ކްރޯޑް ރުޕީސް (32.7 މިލިއަން ޑޮލަރު) އަށް ވިއްކާލައިފަ އެވެ.

ފިލްމުގެ ސެޓްލައިޓް ރައިޓްސް ނުވަތަ ޓީވީން ފިލްމު ދެއްކުމަށް ވަނީ 85 ކްރޯޑް ރުޕީސް (10.1 މިލިއަން ޑޮލަރު) އަށް ވިއްކާލައިފަ އެވެ. އަދި މި ފިލްމުގެ މިއުޒިކް ރައިޓްސް ވެސް 65 ކްރޯޑް ރުޕީސް (7.7 މިލިއަން ޑޮލަރު) އަށް ވިއްކާލާފައިވާ ކަމަށް ރިޕޯޓްތައް ބުންޏެވެ.

"ޕުޝްޕާ 2" ހެދީ 500 ކްރޯޑް ރުޕީސް (59.5 މިލިއަން ޑޮލަރު)ގެ ބަޖެޓަކުންނެވެ.

"ފުޝްޕާ"ގެ ޓީމުން މިދިޔަ ބުރާސްފަތި ދުވަހު އިންޑިއާގެ ހައިދަރާބާދުގައި ބޭއްވި ނޫސްވެރިންގެ ބައްދަލުވުމެއްގައި ފިލްމުގެ ޕްރޮޑިއުސަރުން ކަމަށްވާ ނަވީން ޔެރްނެނީ އާއި ރަވީ ވަނީ "ޕުޝްޕާ 2: ދަ ރޫލް" އަންނަ ޑިސެމްބަރު މަހު ފަހެއްގައި ރިލީޒްކުރާނެކަން އިއުލާންކޮށްފަ އެވެ. އަދި އެ ފިލްމުގެ ޕްރީ-ރިލީޒް ވިޔަފާރި 1،000 ކްރޯޑް ރުޕީސްއަށް އަރާފައިވާ ކަމަށް ބުނެ މީޑިއާތަކުގައި ދައުރުވާ ރިޕޯޓުތަކާ ގުޅޭ ގޮތުން ވެސް އެ ދެމީހުން ވާހަކަދެއްކި އެވެ.

ރަވީ ބުނީ ފިލްމުގެ ޕްރީ-ރިލީޒް ވިޔަފާރި ވަރަށް ރަނގަޅު ކަމަށާއި ނޮން-ތިއޭޓްރިކަލް ވިޔަފާރި ނުވަތަ ޑިސްޓްރިބިއުޝަން ރައިޓްސް ވިއްކައިގެން އެ ފިލްމަށް މިހާތަނަށް 425 ކްރޯޑް ރުޕީސް (50.5 މިލިއަން ޑޮލަރު) ލިބިފައިވާ ކަމަށެވެ. އަދި އެހެން ކަހަލަ ވިޔަފާރިތަކާ އެކު އާމްދަނީ 1،000 ކްރޯޑް ރުޕީސްއަށް އަރާނެ ކަމަށް ލަފާކުރެވޭ ކަމަށް އޭނާ ވެސް ބުންޏެވެ.

"ޕުޝްޕާ"ގައި ލީޑު ރޯލު ކުޅެނީ ދެކުނު އިންޑިއާގެ ސިނަމާގައި މަޝްހޫރު އެކްޓަރު އައްލޫ އަރްޖުނެވެ.

ދެވަނަ ފިލްމު ވެސް ޑައިރެކްޓުކުރަނީ ފުރަތަމަ ބައި ގެނެސްދިން ސުކުމާރެވެ. މި ފިލްމުގައި އައްލޫއާ އެކު މުހިންމު ރޯލުތަކުން ފެންނާނީ ފުރަތަމަ ފިލްމުގައި ވެސް އުޅުނު ރަޝްމިކާ މަންދަނާ އާއި ފަހަދު ފާސިލެވެ.

"ޕުޝްޕާ"ގެ ތިންވަނަ ފިލްމެއް ވެސް ގެނެސްދޭނެކަން މި އަހަރު ކުރީކޮޅުގައި ވަނީ އިއުލާންކޮށްފަ އެވެ.

އިންޑިއާގެ އެކި ބަސްތަކުން ނެރުނު ޕުޝްޕާގެ ފުރަތަމަ ފިލްމު "ޕުޝްޕާ؛ ދަ ރައިސް"އަށް ވަނީ ވަރަށް ބޮޑު ތަރުހީބެއް ލިބިފަ އެވެ. މީގެ ތިންވަރަކަށް އަހަރު ކުރިން، 2021 ގައި ނެރުނު އެ ފިލްމަށް ވަނީ ބޮކްސް އޮފީހުގައި 365 ކްރޯޑް ރުޕީސް (43.4 މިލިއަން ޑޮލަރު)ގެ އާމްދަނީއެއް ލިބިފަ އެވެ. އަދި މި ފިލްމަކީ އެ އަހަރު އެންމެ ބޮޑު އާމްދަނީއެއް ވެސް ހޯދި އިންޑިއާގެ ފިލްމެވެ.