ފައިސާ ދީގެން ވަގަށް ޕާޓީ އަށް މެމްބަރުން ވައްދަން ފޯމު ފުރާކަށް ނުޖެހޭނެ: އަބްދުއްރަހީމް

ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް މެމްބަރުން އިތުރުކުރުމަށް މީހުންނަށް ފައިސާ ދީގެން ވަގަށް ފޯމު ފުރަން ޖެހޭ ހާލަތެއް އެ ޕާޓީގައި ނެތް ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ މިރޭ ވިދާޅުވެއްޖެ އެވެ.

އެ މަނިކުފާނު އެހެން ވިދާޅުވީ، ސަރުކާރު ހިންގާ ޕާޓީ އަށް މެމްބަރުން އިތުރުކުރުމަށް ދައުލަތުގެ މުދަލާއި ވަސީލަތްތައް ބޭނުންކުރުމާއި މުއައްސަސާތަކަށް ނުފޫޒުފޯރުވަމުންދާ ކަމަށް ބުނެ އިދިކޮޅު ޕާޓީ އެމްޑީޕީން މިއަދު ކަންބޮޑުވުން ފާޅުކޮށްފައި ވަނިކޮށެވެ.

ޕީއެންސީ އަށް މެމްބަރުން އިތުރުކުރުމަށް މާލޭގައި ކުރިއަށް ގެންދިޔަ ހަރަކާތް ނިންމައި، ޕާޓީއާ ފޯމުތައް ހަވާލުކުރުމަށް ބޭއްވި ޖަލްސާގައި އެމްޑީޕީގެ ތުހުމަތުތަކަށް އިޝާރާތް ކުރައްވަމުން އަބްދުއްރަހީމް ވިދާޅުވީ، ފޯޖުކޮށްގެން ސޮއި ހޯދައިގެން މީހުން އެ ޕާޓީ އަށް ވައްދަން ޖެހޭ ހާލަތެއް ނެތް ކަމަށެވެ.

"ޕީއެންސީއަކަށް ނުޖެހޭނެ ވަގަށް ފޯމު ފުރާކަށެއް. ފައިސާ ދީގެން ފޯމު ފުރާކަށެއް. ސޮއި ފޯޖުކޮށްގެން ފޯމު ފުރާކަށެއް. އެއީ ތާޢީދު ނޯންނަ މީހުން ކުރާ ކަމެއް،" އަބްދުއްރަހީމް ވިދާޅުވި އެވެ.

އެ މަނިކުފާނު ވިދާޅުވި ގޮތުގައި އެއީ ތާއީދު ނެތް ސިޔާސީ ލީޑަރުން ޕާޓީތައް ހަދައިގެން ކުރާ ކަމެކެވެ. އޭގެ ބަދަލުގައި ޕީއެންސީއަކީ ރައްޔިތުންގެ ލޯތްބާއި އިތުބާރު ހޯދާފައިވާ ޕާޓީއެއްކަން ފާހަގަކުރައްވައި އަބްދުއްރަހީމް ވިދާޅުވީ އެ ޕާޓީ އަށް ތާއީދު އޮތްކަން ކޮންމެ ރެއަކު ހަވާލުކުރަމުންދާ ފޯމުތަކުގެ އަދަދުން ވެސް ސާފެވެ.

މަޖުބޫރުކޮށްގެން މީހުން ލައްވައި ފޯމުތައް ފުރަމުން ނުދާ ކަމަށް ވިދާޅުވި އެވެ.

ސަރުކާރުގެ އޮފީސްތަކުގައި ވެސް ޕީއެންސީ އަށް މެމްބަރުން ވެއްދުމަށް ފޯމުތައް ފުރަމުންދާ ކަމަށް ދެއްކެވޭ ވާހަކަތަކަށް އިޝާރާތް ކުރައްވަމުން އަބްދުއްރަހީމް ވިދާޅުވީ "މިއީ ޕީއެންސީ ސަރުކާރެއް" ކަމަށެވެ. އެހެންވެ، ސަރުކާރުގެ އެކި ވުޒާރާތަކުގެ އިސްވެރިންނަށް ތިއްބެވީ ޕީއެންސީގެ މެމްބަރުން ކަމަށާއި އެ ޕާޓީ ބޮޑުކުރުމަކީ އެ އެންމެންގެ ޒިންމާއެއް ކަމަށް އަބްދުއްރަހީމް ވިދާޅުވި އެވެ.

"މި ސަރުކާރުގައި ވަޒީރުކަމުގައި ތިއްބަވާނީ ޕީއެންސީގެ މެމްބަރުން. އެމްޑީސްކަމުގައި ތިބޭނީ ޕީއެންސީގެ މެމްބަރުން. ޕީއެންސީ ބޮޑުކުރުމަކީ އެ ބޭފުޅުންގެ ޒިންމާއެއް. އެ ބޭފުޅުން އެ މަގާމުތަކަށް ވަޑައިގަންނަވަނީ ޕާޓީގެ ފަރާތުން،" އަބްދުއްރަހީމް ވިދާޅުވި އެވެ.

"އެހެންވީމާ އެ ބޭފުޅުންގެ ޕާޓީ ބޮޑުކުރަން މަސައްކަތްކުރުމަކީ ދުނިޔޭގެ އެއްވެސް ތަނެއްގައި މަލްޓި ޕާޓީ ޑިމޮކްރަސީ ހުރަސް އަޅާ ކަމެއް ނޫން."

އަބްދުއްރަހީމް އެގޮތަށް ވިދާޅުވިއިރު ރަސްމީ ގަޑީގައި ޕީއެންސީ އަށް މެމްބަރުން އިތުރުކުރުމުގެ މަސައްކަތް ކުރާތީ އޮފީސް މަސައްކަތްތަކަށް ބުރޫއަރާ ކަމުގެ ޝަކުވާ މުވައްޒަފުންގެ ފަރާތުން ލިބޭ ކަމަށް އެމްޑީޕީން މިއަދު ބުންޏެވެ. ސަރުކާރުގެ މުއައްސަސާތަކުގައި ރައްކާކޮށްފައި ހުރި އާންމު ރައްޔިތުންގެ ޒާތީ މައުލޫމާތު ބޭނުންކޮށްގެން ޕީއެންސީ އަށް ފޯމު ފުރައި، މެމްބަޝިޕް އިތުރުކުރުމަށް މަސައްކަތްކުރަމުންދާ މައްސަލަ ސީރިއަސް މައްސަލައެއްގެ ގޮތުގައި އިލެކްޝަންސް ކޮމިޝަނުން ބަލައި ފިޔަވަޅު އެޅުމަށް ވެސް އެ ޕާޓީން ގޮވައިލި އެވެ.

އަބްދުއްރަހީމް ވިދާޅުވި ގޮތުގައި މިސަރުކާރު ވެރިކަމަށް އައިއިރު ޕީއެންސީގައި ތިވީ އެންމެ 3،022 މެމްބަރުންނެވެ. އެކަމަކު މިހާރު އެ ޕާޓީއަކީ ރާއްޖޭގެ އެންމެ މެމްބަރުން ގިނަ ޕާޓީ ކަމަށާއި މިދިޔަ ދެ ދުވަހު އެކަނި ވެސް 8،000 ފޯމު ޕާޓީއަށް ލިބިފައިވާ ކަމަށް އެ މަނިކުފާނު ވިދާޅުވި އެވެ.