ޔުވެންޓަސް އާއި އިންޓަ އެއްވަރުމުން ހުރިހާ އުފަލެއް ނަޕޯލީ އަށް

މެޗުގެ ފަހުކޮޅު ކެނަން ޔިލްޑިޒް ވައްދާލި ދެ ގޯލާ އެކު ޔުވެންޓަސް އިން ރޭ އިޓާލިއަން ލީގުގައި އިންޓަ މިލާނާ 4-4 އިން އެއްވަރުކުރިއިރު، މި ނަތީޖާގެ ސަބަބުން ނަޕޯލީ އަށް އެއް ވަނައިގައި ހަތަރު ޕޮއިންޓުގެ ލީޑެއް ލިބިއްޖެ އެވެ.

ނަޕޯލީ ވަނީ އިއްޔެ ހަވީރު ރަށުން ބޭރުގައި އެމްޕޮލީ އަތުން 1-0 އިން މޮޅުވެފަ އެވެ. އެ ޓީމު އެއް ވަނަ މަގާމުގައި އޮތީ 22 ޕޮއިންޓާ އެކު އެވެ. ރޭގެ ނަތީޖާއާ އެކު ދެ ވަނައިގައި އޮތީ 18 ޕޮއިންޓާ އެކު އިންޓަ އެވެ. އަދި ޔުވެންޓަސް އޮތީ 17 ޕޮއިންޓާ އެކު ތިން ވަނައިގަ އެވެ. ރޭ އިންޓަ މޮޅުވި ނަމަ އެ ޓީމަށް ނަޕޯލީއާ ދެ ޕޮއިންޓަށް ކައިރިކުރެވޭނެ އެވެ.

ޑާބީ ޑި އިޓާލިއާގެ ގޮތުގައި މަޝްހޫރު އިންޓަ އާއި ޔުވެންޓަސްގެ ކުރިމަތިލުން ފެނިގެން ދިޔައީ ވަރަށް ފޯރިގަދަކޮށެވެ. އިންޓަގެ ސެން ސީރޯގައި ކުޅުނު މި މެޗުގެ 15 ވަނަ މިނެޓުގައި ޕިއޮޓްރޭ ޒިއެލިންސްކީ ޕެނަލްޓީއަކުން ޖެހި ގޯލުން އިންޓަ ކުރި ހޯދާފައިވަނިކޮށް 20 ވަނަ މިނެޓުގައި ޑުސާން ވްލަހޮވިޗް ވަނީ ޔުވެންޓަސް އަށް އެއްވަރުކޮށްދީފަ އެވެ. އޭގެ ހަ މިނެޓު ފަހުން ތިމޮތީ ވެއާގެ ލަނޑުގެ ޔުވެންޓަސް ލީޑު ނެގި އެވެ. އެކަމަކު 35 ވަނަ މިނެޓުގައި ހެންރިކް މިޚްތާރްޔަން ޖެހި ގޯލާއި، 37 ވަނަ މިނެޓުގައި ޕެނަލްޓީއަކުން ޒިއެލިންސްކީ ޖެހި ގޯލުން އިންޓަ އަލުން ކުރި ހޯދި އެވެ.

ދެ ވަނަ ހާފު ފަށައިގެން 53 ވަނަ މިނެޓުގައި އިންޓަގެ ފުލްބެކް ޑެންޒެލް ޑުމްފްރައިސް ޖެހި ގޯލާ އެކު އެ ޓީމަށް 4-2 ގެ ލީޑެއް ލިބުމުން ތިން ޕޮއިންޓް ކަށަވަރުވީ ކަމަށް ބެލެވުނެވެ. އެކަމަކު ޔުވެންޓަސްގެ 10 ނަމްބަރު ޖާޒީގައި ކުޅޭ ތުރުކީ ފޯވާޑް ޔިލްޑްޒް އަރައި ނަތީޖާ އަނބުރާލީ އެވެ. އޭނާ ފުރަތަމަ ގޯލު ޖެހީ 71 ވަނަ މިނެޓުގަ އެވެ. އަދި އެއްވަރުކުރީ 82 ވަނަ މިނެޓުގައި ޖެހި ގޯލުންނެވެ.

މެޗަށް ފަހު ޔިލްޑިޒް ބުނީ އިންޓަ ފަދަ ބޮޑު ޓީމެއް ކޮޅަށް އޭނާގެ އަލަތު ދެ ގޯލު ޖެހުނީތީ އުފާކުރާ ކަމަށާއި އުއްމީދަކީ މިގޮތުގައި ކުރިއަށް ދިއުން ކަމަށެވެ.

"އަހަރެމެންގެ އުއްމީދަކީ ލީގު ޗެމްޕިއަންކަން ހޯދުން. އެކަމަކު ސީޒަން އަދި ކުރިއަށް އޮތީ. އަހަރެމެންނަށް ކުރެވުނު ހިތްވަރެއް ކުރާނަން،" އޭނާ ބުންޏެވެ.

އިންޓަގެ ކޯޗު ސިމޯނީ އިންޒާގީ ބުނީ އޭނާގެ ޓީމަށް ހަތެއް ނޫނީ އަށް ގޯލު ޖަހަން ވެސް ފުރުސަތު ލިބުނު ކަމަށާއި މައްސަލައަކީ އޭގެ ބޭނުން ނުކުރެވުން ކަމަށެވެ.

"އަނެއް ކަމަކީ ޔުވެންޓަސް އިން ގޯލަށް އަމާޒުކޮށް ފޮނުވާލީ ހަތަރު ބޯޅަ. އެ ހަތަރު ބޯޅަ ވެސް އެ ޓީމުން ގޯލަށް ވައްދާލި. އެއީ އެކަން ވާން ޖެހޭ ގޮތެއް ނޫން. މިއީ އަހަރެމެން ޓީމަށް ފިލާވަޅަކަށް ވާނެ،"