ޖަޕާނުގެ މަޖިލީހަށް ރެކޯޑް އަދަދަކަށް އަންހެނުން އިންތިހާބުވެއްޖެ

ޖަޕާނުގެ ގާނޫނު ހަދާ މަޖިލީހަށް މީގެ ކުރިން ދުވަހަކު ވެސް އަންހެނުން އިންތިހާބު ނުވާހާ ގިނައިން މިފަހަރު އިންތިހާބުވެއްޖެ އެވެ.

ހޯމަ ދުވަހު ބޭއްވި އިންތިހާބުގައި މަޖިލީހުގެ 465 ގޮނޑީގެ ތެރެއިން 73 ގޮނޑި އަންހެން ކެންޑިޑޭޓުން ކާމިޔާބުކޮށްފައިވާ ކަމަށް މިހާ ހިސާބަށް ސާފުކޮށްފައިވާ ނަތީޖާއިން ދައްކަ އެވެ. މިއީ ރެކޯޑް އަދަދެއް ނަމަވެސް މިއީ މަޖިލީހުގެ 16 ޕަސެންޓަށްވުރެ މަދު އަދަދެކެވެ.

މީގެ ކުރިން 2021 ވަނަ އަހަރުގެ އާންމު އިންތިހާބުގައި 45 އަންހެން މެންބަރުން މަޖިލީހަށް ހޮވުނެވެ.

މި އިންތިހާބުގެ ކެންޑިޑޭޓުންގެ ތެރެއިން ހަތަރުބައިކުޅަ އެއްބަޔަކީ އަންހެނުން ކަމަށް، އެންއެޗްކޭ އާއި އެހެނިހެން މީޑިއާތަކުން ކުރިން ރިޕޯޓުކޮށްފައިވެ އެވެ.

ޖަޕާނަކީ ވިޔަފާރި އާއި ސިޔާސީ ދާއިރާގެ ވެރިންގެ ގޮތުގައި އަންހެނުން ނިސްބަތުން މަދު ގައުމެކެވެ. ވޯލްޑް އިކޮނޮމިކް ފޯރަމްގެ ގްލޯބަލް ޖެންޑަ ގެޕްގެ 2024 ވަނަ އަހަރުގެ ރިޕޯޓުގައި ޖަޕާނު އޮތީ މިކަމުގައި 146 ގައުމުގެ ތެރެއިން 118 ވަނައިގަ އެވެ.

ބޮޑުވަޒީރު ޝިގެރު އިޝިބާގެ 20 މެންބަރުންގެ ކެބިނެޓްގައި ހިމެނެނީ ވެސް އެންމެ ދެ އަންހެނުންނެވެ.

އިޝިބާގެ ކޯލިޝަނަށް އާދިއްތަ ދުވަހުގެ އިންތިހާބުގައި ލިބުނު ދަށް ނަތީޖާގެ ސަބަބުން މަޖިލީހުގެ މެޖޯރިޓީ ގެއްލޭނެ ކަމަށް ވަނީ ލަފާކުރެވިފަ އެވެ. އުމުރުން 67 އަހަރުގެ ބޮޑުވަޒީރު އިންތިހާބު އިއުލާނުކުރެއްވީ މި މަހު 1 ގައި މަގާމާ ހަވާލުވެ ވަޑައިގަތުމަށް ފަހުގަ އެވެ. ނަމަވެސް، ބޮޑުވަޒީރުގެ ލިބަރަލް ޑިމޮކްރެޓިކް ޕާޓީ (އެލްޑީޕީ) އަށް ތާއީދު ކުޑަވީ ކޮރަޕްޝަންގެ މައްސަލަތަކާ މެދު އާންމުންގެ މެދުގައި އޮތް ހިތްހަމަނުޖެހުމުގެ ސަބަބުން ކަމަށް ވަނީ ބެލެވިފަ އެވެ.

ޒުވާނުންނަށް ފުރުސަތު ހޯދައިދިނުމަށް މަސައްކަތްކުރާ "ނޯ ޔޫތު ނޯ ޖަޕާން" ގެ ލީޑަރު މޮމޮކޯ ނޮޖޯ ބުނި ގޮތުގައި، ސިޔާސީ ޕާޓީތަކުން ފިރިހެނުންނަށް އިސްކަންދޭތީ އަންހެން ކެންޑިޑޭޓުން ހޯދަން ދަތިވެ އެވެ.

ޖަޕާނުގެ ކެބިނެޓް އޮފީހުން 2021 ގައި ކުރި ސާވޭއަކުން ހާމަވި ގޮތުގައި، އިންތިހާބުގައި ވާދަކުރި އަންހެން ކެންޑިޑޭޓުންގެ ތެރެއިން ކޮންމެ ހަތަރު މީހަކުން އެކަކަށް ކެމްޕެއިން ތެރޭގައި ވަނީ ޖިންސީ ފުރައްސާރައާ ކުރިމަތިވެފަ އެވެ.