އެމްއެމްސީގެ ރައީސް މުސްތަފާގެ ވަޒީފާ ޕީއެސްއެމުން އިޔާދަކޮށްފި

މޯލްޑިވްސް މީޑިއާ ކައުންސިލް (އެމްއެމްސީ) ގެ ރައީސް އަހުމަދު މުސްތަފާ ޕަބްލިކް ސާވިސް މީޑިއާ (ޕީއެސްއެމް) ގައި އަދާކުރައްވަމުން ގެންދެވި ވަޒީފާ އިން ރޭ ވަކިކުރުމަށް ފަހު، އެ ކުންފުނީގެ ބޯޑުން އެ ވަޒީފާ މިއަދު އޭނާ އަށް އިޔާދަކޮށްދީފި އެވެ.

އެ ކުންފުނީގެ ޑެޕިއުޓީ މެނޭޖިން ޑިރެކްޓަރު އަބްދުﷲ ޔާމީން "މިހާރު" އަށް ވިދާޅުވީ، ނިއުސް އޮފަރޭޝަންސްގެ މަގާމު ފުރުއްވަމުން ގެންދެވި މުސްތަފާގެ ވަޒީފާ އިޔާދަކޮށްދިނީ ވަޒީފާ އިން ވަކިކުރި މައްސަލަ މުރާޖައާ ކޮށްދިނުމަށް އެދިވަޑައިގެން މުސްތަފާގެ ފަރާތުން ބޯޑަށް ހުށަހެޅުއްވުމުން ކަމަށެވެ.

"އެ މައްސަލަ މުރާޖައާ ކުރުމަށް ފަހު މިހާރު ވަނީ އެ ވަޒީފާ މުސްތަފާ އަށް އިޔާކޮށްދީފައި،" ޔާމީން ވިދާޅުވި އެވެ.

ޓީވީއެމް/ޕީއެސްއެމްގައި މަސައްކަތް ކުރައްވާތާ 30 އަހަރަށް ވުރެ ގިނަ ދުވަސް ވެފައިވާ މުސްތަފާ ޕީއެސްއެމުން ވަކިކުރި ސަބަބެއް ނުބުނެ އެވެ.

އެކަމަކު، މިދިޔަ ބުދަ ދުވަހުގެ ރޭ ބޭއްވި، އެމްއެމްސީ އެވޯޑު ހަފްލާގައި ތަހުގީގީ ދާއިރާއިން ނޫސްވެރިކަމުގެ އިނާމު ލިބުނު "އަދަދު" އޮންލައިންގެ "ސްކީލާން" ޑޮކިއުމެންޓްރީ ޕީއެސްއެމުން ލައިވްކޮށް ދައްކަން ޖެހުނު މައްސަލަ ވަނީ ބޮޑުވެފަ އެވެ. އެއީ ރައީސް ޑރ. މުހައްމަދު މުއިއްޒުގެ ދޮންމަންމާފުޅު ސްކީލާން އެ މަނިކުފާނަށް ބޮޑެތި ތުހުމަތެއް ކުރައްވާފައިވާ ޑޮކިއުމަންޓްރީއެކެވެ.

މިދިޔަ އަހަރުގެ ރިޔާސީ އިންތިހާބުގެ ކެމްޕެއިން ތެރޭގައި ނެރުނު އެ ޑޮކިއުމެންޓްރީގައި ކުރާ ތުހުމަތުތައް ރައީސް މުއިއްޒުގެ ފަރާތްޕުޅުން އޭރު ވެސް ވަނީ ދޮގު ކުރައްވައިފަ އެވެ.

އެމްއެމްސީގެ އެވޯޑް ހަފްލާ ލައިވްކުރި ވަގުތު އެ ވީޑިއޯ ދައްކާފައި ވާއިރު ޕީއެސްއެމްގެ ކޮންޓެންޓް އުސޫލާ ހިލާފު އެއްޗެއް ޕީއެސްއެމުން ދެއްކުމަކީ ދުރާލައި ރާވައިގެން އެންގުމަކާ ނުލައި އެމްއެމްސީން ކުރި ކަމެއްގެ ގޮތުގައި ތުހުމަތުކޮށް ޕީއެސްއެމުން ރޭ ވަނީ ބަޔާނެއް ނެރެފަ އެވެ.

އެ ބަޔާނުގައި ބުނީ އެ ހަފުލާގެ ތެރޭގައި ޕީއެސްއެމްގެ އެޑިޓޯރިއަލް ކޮންޓެންޓާ ހިލާފަށް އަދި ނޫސްވެރިކަމުގެ އާންމު މިންގަނޑުތަކާ ހިލާފު ވީޑިއޯއެއް ދެއްކި ކަމަށެވެ.

އެވޯޑު ލިބޭ ކެޓަގަރީތަކާއި އެ ކެޓަގަރީތައް ނޮމިނޭޓް ވެފައިވާ ނޫސްވެރިންގެ އެވޯޑު ލިބޭ ނޫސްވެރިން ދުރާލައި އެމްއެމްސީގެ އިސްވެރިންނަށް އެނގޭނެ ކަމަށާއި ޕީއެސްއެމްގެ ލައިވް ކަވަރޭޖްގައި ދައްކާ ވީޑިއޯތަކަކީ އެޑިޓޯރިއަލް އަށް ފެތޭ ކޮންޓެންޓަށް ވާން ޖެހޭނެ ކަމަށް ވެސް ޕީއެސްއެމުން ބުންޏެވެ.

"ޕީއެސްއެމްއަށް ކުރިން އެންގުމެއް ނެތި ކުއްލިއަކަށް ހަފްލާ ތެރޭގައި އިސްވެ ދެންނެވުނު ވީޑިއޯ ދެއްކުމަކީ ގަސްތުގައި ދުރާލާ ރާވައިގެން ޕީއެސްއެމްގެ އެޑިޓޯރިއަލްގެ އުސޫލާ ހިލާފަށް ކޮންޓެންޓް ޕީއެސްއެމްއިން ދެއްކުމަށް އެމްއެމްސީން ކޮށްފައިވާ ކަމެއް ކަމަށް މި ކުންފުނިން ދެކޭތީ އެކަން ހަރުކަށި އިބާރާތުން ކުއްވެރި ކުރަމެވެ،" ބަޔާނުގައިވެ އެވެ.