ޖަރުމަނުގެ ޗާންސެލަރަށް އިތުބާރު އޮތްތޯ ބަލަން ވޯޓެއް ނަގަނީ

ބާލިން (ނޮވެމްބަރު 14) - ޖަރުމަނުގެ ވެރިކަން ކުރާ ކޯލިޝަން ޕާޓީތަކުގެ އިއްތިހާދު ރޫޅުމާ އެކު، އެ ގައުމުގެ ޗާންސެލާ އޯލަފް ޝޯލްޓްސް އަށް އިތުބާރު އޮތްތޯ ބަލަން ވޯޓެއް ނަގަން ހުށަހަޅައިފި އެވެ.

ވޯޓް ނަގަން، މަޖިލީހަށް ހުށަހެޅުއްވީ ޝޯލްޓްސް އަމިއްލަ ފުޅަށެވެ. އަންނަ އަހަރު ފެބްރުއަރީ މަހު، ޖަރުމަނުގެ އިންތިހާބު އޮންނާނެ އެވެ. އެކަމަކު އަންނަ މަހު 16 ގައި، އޭނާ އަށް އިތުބާރު އޮތްތޯ ބެލުމަށް ވޯޓެއް ނަގަނީ ކޯލިޝަން ރޫޅުމުން އޭނާ އަށް ކުރިމަތިވި ފާޑުކިޔުންތަކާ ގުޅިގެންންނެވެ.

ތިން ޕާޓީ ހިމެނޭ އިއްތިހާދު ރޫޅުނީ، ޖަރުމަނުގެ މާލީ ވަޒީރު ކްރިސްޓިއަން ލިންޑްނާ މަގާމުން ވަކި ކުރުމުންނެވެ. އޭނާ އަކީ ކޯލިޝަންގައި ހިމެނޭ ޕްރީ ޑިމޮކްރެޓްސް ޕާޓީގެ ލީޑަރެވެ. ކޯލިޝަންގައި ދެން ހިމެނެނީ ޝޯލްޓްސްގެ ސޯޝަލް ޑިމޮކްރެޓިކް ޕާޓީ އާއި ގްރީން ޕާޓީ އެވެ.

މާލީ ވަޒީރު މަގާމުން ވަކި ކުރައްވަން، ޝޯލްޓްސް ނިންމެވީ އިގްތިސޯދު ހަރުދަނާ ކުރުމަށް އަޅާނެ ފިޔަވަޅުތަކާ މެދު އެއް ވިސްނުމަކަށް ނާދެވުމުންނެވެ. މި އަހަރަކީ ޖަރުމަނުގެ އިގްތިސޯދަށް ވެސް ގިނަ ގޮންޖެހުންތަކެއް ކުރިމަތިވި އަހަރެކެވެ.

އަންނަ އަހަރުގެ އިންތިހާބުގައި ޗާންސެލަރުކަމަށް ވާދަކުރައްވަން ބޭނުންފުޅުވާ ކަމަށް ޝޯލްޓްސް ވަނީ ވިދާޅުވެފަ އެވެ. އެކަމަކު ވާދަކުރައްވާނީ ކޮން ކެންޑިޑޭޓެއް ކަމެއް، އޭނާ ޕާޓީން އިއުލާން ނުކުރެ އެވެ.

ޖަރުމަނުގެ މައި އިދިކޮޅު ޕާޓީ ކްރިސްޓިއަން ޑިމޮކްރެޓިކްގެ ލީޑަރު ފްރީޑްރިކް މާޓްޒް ވަނީ ޗާންސެލަރުގެ މަގާމަށް ވާދަކުރައްވާނެކަން އިއުލާން ކޮށްފަ އެވެ. ދެން އެ މަގާމަށް ވާދަކުރައްވާނެކަން އިއުލާން ކުރެއްވީ މިހާރުގެ އިކޮނޮމިކް މިނިސްޓަރު އަދި ގްރީން ޕާޓީގެ ލީޑަރު ރޮބަޓް ހާބެކް އެވެ. ވެރިކަން ކުރާ އިއްތިހާދުގެ ބައިވެރިޔަކަށް ވާތީ ވައިސް ޗާންސެލަރުގެ މަގާމު ވެސް އޭނާ އަދާކުރައްވަ އެވެ.