އީފާސްގެ ފޭސް ރެކޮގްނިޝަންގެ ވެންޑާއަކަށް ލެޓްވިއާގެ ކުންފުންޏެއް ހަމަޖައްސައިފި

ސަރުކާރުގެ އޮފީސްތަކުގެ އޮންލައިން ޕޯޓަލް ކަމަށްވާ އީފާސްގެ ފޭސް ރެކޮގްނިޝަންގެ އާ ވެންޑާއަކަށް ލެޓްވިއާގެ ކުންފުންޏެއް ސަރުކާރުން ހަމަޖައްސައިފި އެވެ.

އެންސީއައިޓީން މިއަދު ނެރުނު ނޫސްބަޔާނެއްގައި ބުނީ، އީފާސްގެ ފޭސް ރެކޮގްނިޝަން ހިދުމަތް ދިނުމަށް ކުރިން ހަވާލުކޮށްފައިވާ "ސަމް އެންޑް ސަބްސްޓެންސް ޕްރައިވެޑް ލިމިޓެޑް" (ސަމްސަބް) ކުންފުނި އެ މަސައްކަތުން ވަކިކޮށް، އާ ވެންޑާއަކާ މަސައްކަތް ހަވާލުކުރުމަށް ފަހު އަލުން އޮންލައިން ފޭސް ވެރިފިކޭޝަންގެ ހިދުމަތް މިހާރު ފަށާފައިވާ ކަމަށެވެ.

ސަމްސަބް އަކީ އިނގިރޭސިވިލާތުގައި ރަޖިސްޓްރީކޮށްފައި އޮންނަ އިޒްރޭލުގެ ބަޔަކު އުފައްދާފައިވާ ކުންފުންޏެކެވެ. އެހެންވެ، އެކަމުގައި އާންމުންގެ ފާޑުކިޔުން ބޮޑުވުމުން ސަރުކާރުން އެ ކުންފުނި ވަކިކުރީ އެވެ.

އާންމުންގެ ފާޑުކިޔުންތަކާ ގުޅިގެން އެންސީއައިޓީން އޭރު ބުނެފައި ވަނީ ސަމްސަބްއާ އެ ހިދުމަތް ދިނުމަށް ހަވާލުކުރީ އެ ކުންފުންޏަކީ އިނގިރޭސިވިލާތުގެ ގާނޫނުގެ ދަށުން ހިންގާ ބަޔަކަށް ވާތީ ކަމަށެވެ. އަދި ފޮޓޯ ފިޔަވާ އެއްވެސް ދިވެއްސެއްގެ ޒާތީ މައުލޫމާތު އެ ކުންފުންޏަށް ނޭނގޭނެ ކަމަށް އޭރު ބުނެފައިވެ އެވެ.

އެންސީއައިޓީގެ ބަޔާނުގައި ބުނީ އާ ވެންޑާއަކަށް ހަމަޖައްސާފައި ވަނީ ޔޫރަޕުގެ ގައުމެއް ކަމަށްވާ ލެޓްވިއާގައި ރަޖިސްޓަރީކޮށްފައިވާ ރެގިއުލާ ފޮރެންސިކްސް ނަމަކަށް ކިޔާ ކުންފުންޏެއް ކަމަށެވެ. ފޭސް ވެރިފިކޭޝަން ހެދުމަށް މިހާރު ބޭނުންކުރަނީ އެ ކުންފުނީގެ އެޕްލިކޭޝަނެއް ކަމަށް ވެސް އެ ބަޔާނުގައި ބުންޏެވެ.

"އަދި، މިކަން ހިނގާނީ ބޭރުގެ އެއްވެސް ފަރާތަކަށް އެއްވެސް ރައްޔިތެއްގެ ފޮޓޯއެއް ނުވަތަ އެ ނޫން ވެސް އެހެން ޒާތީ މައުލޫމާތެއް ހިއްސާކުރުމަކާ ނުލައި އެންސީއައިޓީގެ އެތެރޭގަ އެވެ،" ބަޔާނުގައި ބުންޏެވެ.

ރެގިއުލާ ފޮރެންސިކްސް އަކީ، އެންސީއައިޓީން ބުނި ގޮތުގައި، 30 އަހަރުގެ ތަޖުރިބާއާ އެކު، ސެކިއުރިޓީގެ ދާއިރާއިން ގިނަ ޑިޖިޓަލް ހިދުމަތްތަކެއް ފޯރުކޮށްދޭ ގާބިލް އަދި ބައިނަލްއަގުވާމީ ބޮޑެތި ކުންފުނިތަކާ ތަފާތު އެކި ގައުމުތަކަށް ވެސް ހިދުމަތްދެމުން އަންނަ އިތުބާރު ހުރި ކުންފުންޏެކެވެ.

އެންސީއައިޓީން ބުނީ މިވަގުތު ފޭސް ރިކޮގްނިޝަންގެ ހިދުމަތް ލިބޭނީ ވެބް ބްރައުޒާއެއް މެދުވެރިކޮށް އީފާސް އަށް ލޮގިންވާއިރު އެކަނި ކަމަށެވެ.