މިފްކޯގެ ސީއެފްއޯ އިލްޔާސް މަގާމުން އިސްތިއުފާ ދެއްވައިފި

މިފްކޯގެ ޗީފް ފައިނޭންޝަލް އޮފިސަރު (ސީއެފްއޯ) ގެ މަގާމުގައި ހުންނެވި އިލްޔާސް ހަނީފު އެ މަގާމުން އިސްތިއުފާ ދެއްވައިފި އެވެ.

މިފްކޯގައި ތިން އަހަރު ވަންދެން މަސައްކަތް ކުރެއްވި އިލްޔާސް މިދިޔަ މަހުގެ ފަހުކޮޅު އެ މަގާމުން އިސްތިއުފާ ދެއްވީ އަމިއްލަ ސަބަބުތަކާ ހެދި ކަމަށް އޭނާ "މިހާރު" އަށް މިއަދު ވިދާޅުވި އެވެ.

މިފްކޯގެ ކުރީގެ ސީއީއޯ އަހުމަދު ސަމާހު ރަޝީދުގެ މައްސަލަތަކެއް ޕީސީބީން މިދިޔަ އަހަރު ފެންމަތިވެ، އެ ކަންކަން ބަލައި ނިމެންދެން އެ ކުންފުނީގެ ހިންގުން ހަވާލުކޮށްފައި ހުރީ ވެސް އިލްޔާސްއާ އެވެ. އެ މައްސަލަ ބެލުމަށް ފަހު ސަމާހު ވަނީ މަގާމުން ވަކިކޮށްފަ އެވެ.

އިލްޔާސް މަގާމުން އިސްތިއުފާ ދެއްވުމުން މިފްކޯގެ ހިންގުން މިވަގުތު ބަލަހައްޓަވަނީ ޖެނެރަލް މެނޭޖަރު ހާމިދު ނަޒީމެވެ.

މިދިޔަ މަހުގެ ކުރީ ކޮޅު މިފްކޯގެ ސީއީއޯއަކަށް ސްވިޓްޒަލެންޑުގެ ރައްޔިތެއް ކަމަށްވާ ޑރ. ވިޓާލީ ލުބިމޯވް އައްޔަން ކޮށްފައިވީ ނަމަވެސް، އޭނާ އަދި ރަސްމީކޮށް މަސައްކަތާ ހަވާލުވެވަޑައެއް ނުގަންނަވަ އެވެ.

އިލްޔާސް މަގާމުން އިސްތިއުފާ ދެއްވިއިރު، އެ ކުންފުނީގެ ޗެއާޕާސަންގެ މަގާމުގައި ހުންނެވި އަހުމަދު ޝަރީފް އެ މަގާމުން ވަކިކޮށް، މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ކޯޕަރޭޝަން (އެމްފޯމްޕީސީ) ގެ ޑިރެކްޓަރުންގެ ބޯޑަށް ވެސް މިދިޔަ މަހުގެ ފަހުކޮޅު ވަނީ އައްޔަންކޮށްފަ އެވެ.