މިފްކޯއަށް ފުވައްމުލަކުން މަސް ގަންނަން ފަށައި ފުރަތަމަ ދުވަހު ހަ ޓަނު ކިރުވައިފި

މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޓެޑް (މިފްކޯ) އިން ފުވައްމުލަކު ބަނދަރުން މަސްގަންނަން ފަށައިފި އެވެ.

ފުވައްމުލަކުން މިފްކޯއަށް މަސް ކިރަން ފެށީ އިއްޔެ ކަމަށް މިފްކޯ އިން ބުންޏެވެ.

ފުވައްމުލަކު ބަނދަރުގައި އޮތް 30 މެޓްރިކް ޓަނުގެ "ރަނދި 19" އަށް އިއްޔެ ހަ ޓަނުގެ މަސް ކިރުވާފައިވާ ކަމަށް މިފްކޯއިން ބުންޏެވެ.

އެ ކުންފުނިން ބުނީ 30 ޓަނު ހަމަވުމުން އައްޑޫގައި ހުންނަ ކޯލްޑް ސްޓޯރޭޖަށް މަސްތައް ގެންގޮސް އަނެއްކާ ވެސް މަސް ކިރުވުމަށް ފުވައްމުލަކު ބަނދަރަށް ދާނެ ކަމަށެވެ.

މިފްކޯއިން ވަނީ ފުވައްމުލަކުގެ އެއްގަމުގައި ހަދަން ފަށާފައިވާ މަސްޕްރޮސްސްކުރާ މަރުކަޒު މިއަހަރުގެ ތެރޭގައި އޮޕްރޭޝަނަލައިޒްކޮށް، ޕްރޮސެސް ކޮށްފައިހުރި މަސް އެތަނުން ގަންނަން ލިބޭނެ އިންތިޒާމް ހަމަޖައްސަން ވެސް ނިންމައިފަ އެވެ.