ޔުނައިޓެޑުގެ ޓީމުން ރަޝްފޯޑް ދެން ނުފެނިދާނެ

މެންޗެސްޓާ ޔުނައިޓެޑުގެ ޓީމުން މާކަސް ރަޝްފޯޑް، ދެން ނުފެނިދާނެ ކަމަށް ބެލެވެން ފަށައިފި އެވެ.

ޔުނައިޓެޑްގެ ކޯޗު ރުބެން އަމޯރިމްގެ އިތުބާރު ހޯދުމުގައި ރަޝްފޯޑަށް ވަނީ ގޮންޖެހުން ކުރިމަތިވެފަ އެވެ.

ތަމްރީނުތަކުގައި ވެސް އެކަށީގެންވާ ކުޅުމެއް ނުދެއްކޭތީ އޭނާ ހުރީ ބާކީކޮށްފަ އެވެ. މިހާރު ކުރިއަށްދާ ޓްރާންސްފާ ޕީރިއަޑުގައި އޭނާ އެހެން ކްލަބަކަށް ބަދަލުވުން ވެސް ކައިރިކަމަށް ޓްރާންސްފާގެ ހަބަރުތައް ބުނެ އެވެ.

އިނގިރޭސި އެފްއޭ ކަޕްގައި އާސެނަލް އަތުން މޮޅުވި މެޗަށް ފަހު އަމޯރިމް ބުނ ގޮތުގައި ޔުނައިޓެޑް ތަމްސީލު ކުރުމަކީ ރަޝްފޯޑް ބޭނުންވާ ކަމެކެވެ. އަދި ޔުނައިޓެޑް ދެކެ ރަޝްފޯޑް ލޯބި ވެސް ވާ ކަމަށް ވެސް އަމޯރިމް ބުންޏެވެ.

"އެކަމަކު ނިންމުން ނިންމާނީ އަހަރެން. އަހަރެން ކުރިން ބުނެފަ އޮންނާނީ އަހަރެން ނިންމުން ނިންމަނީ ކޮންކަމަކަށް ބަލާފައިކަން. ކުރިއަށްދާންވީ. އަނެއްކާވެސް އަންނަ މެޗަށް ބަލަން ހިނގާ. ކުރިންވެސް ބުނިހެން އަހަރެން ޓީމު ނަގާނީ،" އަމޯރިމް ބުންޏެވެ.

އަންނަ މެޗުގައި ރަޝްފޯޑަށް ފުރުސަތު ދޭނަންތޯ ސުވާލު ކުރުމުން އަމޯރިމް ބުނީ އެކަން ނޭނގޭ ކަމަށެވެ.

"އަހަންނަކަށް ނޭނގެ. އަހަރެމެން ބަލާނަން. އޭނާއަކީ މެންޗެސްޓާ ޔުނައިޓެޑްގެ ކުޅުންތެރިޔެއް. އޭނާ ޖެހޭނެ މަސައްކަތް ކުރަން،" މިދިޔަ ނޮވެމްބަރު މަހު ޔުނައިޓެޑާ ހަވާލުވި ކޯޗު ބުންޏެވެ.

ޓްރާންސްފާގެ ހަބަރުތައް ބުނާގޮތުން ރަޝްފޯޑް ގެންދަން އޭސީ މިލާނުން ޝައުގުވެރިވެ އެވެ.