މިދިޔަ އަހަރު 73،953 އުޅަނދު ޗެކްކޮށް، 7،606 އުޅަނދަށް ފިޔަވަޅު އެޅި

މަގުމަތީގެ ރައްކާތެރިކަން ކަށަވަރުކުރުމަށް މިދިޔަ އަހަރު ފުލުހުން ހިންގި އޮޕަރޭޝަންތަކުގައި 73،953 އުޅަނދު ޗެކްކޮށް، 7،606 އުޅަނދާ މެދު ފިޔަވަޅު އަޅާފައިވާ ކަމަށް ފުލުހުން ބުނެފި އެވެ.

ފުލުހުންގެ ޓްރެފިކް އަދި ޓޯވިން ތަފާސްހިސާބުތަކުން ދައްކާ ގޮތުގައި މިދިޔަ އަހަރު ފުލުހުން ވަނީ 66،347 މީހަކަށް ނަސޭހަތްދީފަ އެވެ. ވަޔަލޭޝަން ސްލިޕް ދިނީ 7،606 މީހަކަށެވެ.

ފިޔަވަޅު އެޅި އުޅަނދުތަކުގެ ތެރޭގައި ދެފުރޮޅުލީ 2،005 އުޅަނދާއި ހަތަރު ފުރޮޅުލީ 133 އުޅަނދު ހިމެނެ އެވެ.

ފުލުހުން ބުނި ގޮތުގައި ނުރައްކާތެރިކޮށް ދުއްވުމުގެ 293 މައްސަލައެއް މިދިޔަ އަހަރު ފާހަގަކުރެވުނެވެ. އޭގެ ތެރޭގައި ދެފުރޮޅުލީ 271 އުޅަނދާއި ހަތަރު ފުރޮޅުގެ 22 އުޅަނދު ހިމެނެ އެވެ.

ޓޯކުރި އުޅަނދުތަކުގެ ތަފްސީލު:

- ޖުމްލަ 15،514 އުޅަނދު ޓޯކުރި.

- ޓޯކުރި އުޅަނދުތަކުގެ ތެރޭގައި 11،645 ސައިކަލު

- 2،567 ކާރު ޓޯކުރި

- 478 ޕިކަޕު އަދި 369 ވޭން ޓޯކުރި

- 87 ޓްރަކް ޓޯކުރި

ފުލުހުން ބުނި ގޮތުގައި އެ އުޅަނދުތަކުގެ ތެރެއިން 546 އުޅަނދު ނައްތާލި އެވެ. އަދި 13،562 އުޅަނދެއް ވެރިފަރާތާ ހަވާލުކުރި ކަމަށް ބުންޏެވެ.

ފުލުހުން ބުނީ މަގުމަތީގެ ނުރައްކާތެރި އެކްސިޑެންޓުތައް ހިނގުމަކީ ކަންބޮޑުވާ ކަމެއް ކަމަށާއި އެހެންވެ، އެކްސިޑެންޓު މަދުކުރުމަށް ގިނަ ވަސީލަތްތަކެއް ބޭނުންކޮށްގެން ހަރުދަނާ މަސައްކަތްތަކެއް ކުރެވުނު ކަމަށެވެ. އޭގެ ތެރޭގައި ފުރާނައަށް ނުރައްކާވާ ފަދަ އެކްސިޑެންޓުތައް މަދުކުރުމަށް އެކަމަށް ހާއްސަ މަސައްކަތް ކުރެވުނު ކަމަށް ފުލުހުން ބުންޏެވެ.