ހއ. ތުރާކުނުން ފެށިގެން އައްޑޫ ގަމާ ހަމައަށް ފީނައިގެން ދުނިޔޭގެ ރެކޯޑެއް ހަދަނީ

ދުނިޔޭގެ ރެކޯޑު ގާއިމް ކުރުމަށް، އެންމެ ދިގު "ސިންގަލް އޯޕަން ވޯޓާ ޑައިވް" ހެދުމުގެ މަސައްކަތް ރާއްޖެއިން ފަށައިފި އެވެ.

އޯޝަން ސިކްސް ފިފްޓީގެ ފަރާތުން އިންތިޒާމު ކޮށްގެން ކުރިއަށް ގެންދާ "އެކްރޮސް މޯލްޑިވްސް ޑައިވް" ހަރަކާތް ބާއްވަނީ ދެ ފިޔަވައްސަކަށް ބަހާލައިގެންނެވެ.

ފުރަތަމަ ފިޔަވަހި މިއަދު ހުޅުމާލެ ބީޗުގައި އިފުތިތާހު ކޮށްދެއްވީ ފިޝަރީޒް މިނިސްޓަރު އަހުމަދު ޝިޔާމެވެ.

އެ ރަސްމިއްޔާތުގައި ޝިޔާމް ވިދާޅުވީ، އާ އީޖާދީ ވަސީލަތްތަކާ އެކު، ކަނޑުގެ ބޭނުން ހިފާ ތަން ފެންނަމުން އަންނަ ކަމަށެވެ. އެއީ ސަރުކާރުން އުފާކުރާ ކަމެއް ކަމަށާއި އެ ފަދަ ކަންކަމަށް ސަރުކާރުގެ ފުރިހަމަ އެއްބާރުލުން ލިބޭނެ ކަމަށް ވެސް މިނިސްޓަރު ވިދާޅުވި އެވެ.

ދުނިޔޭގެ ރެކޯޑް ގާއިމްކުރަން ބާއްވާ ހަރަކާތް ނިމޭއިރު، ޓޫރިޒަމުން ރާއްޖެ ތައާރަފު ނުވާ އެތައް ބަޔަކަށް ރާއްޖެ ތައާރަފުވެ، އެނގޭނެ ކަމަށް ވެސް އޭނާ ވިދާޅުވި އެވެ.

އެ ހަރަކާތް އިންތިޒާމު ކުރާ އޯޝަން ސިކްސް ފިފްޓީ އިން ބުނީ ފުރަތަމަ ރެކޯޑު އަންނަ ބުދަ ދުވަހު ހަދާނެ ކަމަށެވެ. އެއީ ހުޅުމާލެ އާއި ހުޅެލެ ވަށައިގެން 17 ކިލޯމީޓަރު ފީނައިގެން ހަދާ ރެކޯޑެކެވެ.

ދެވަނަ ރެކޯޑު ހެދުމަށް ނިންމާފައި ވަނީ ރާއްޖޭގެ އެއްކޮޅުން އަނެއްކޮޅަށް ފީނައިގެންނެވެ. އެއީ ހއ. ތުރާކުނުން ފެށިގެން އައްޑޫ ގަމަށް ފީނައިގެން ހުރަސްކޮށްގެންނެވެ.

ޖުމްލަ 460 ކިލޯ މީޓަރު ޑައިވް ކުރާއިރު އެއީ ދުނިޔޭގެ އެންމެ ދިގު ޑައިވަށް ވާނެ އެވެ.