ރޯދަ މަހު މަޖިލިސް ޗުއްޓީއަށް ދާން ނިންމި ނިންމުން ބަދަލުކުރަނީ

ކުރިއަށް އޮތް ރޯދަމަހު ރައްޔިތުންގެ މަޖިލިސް ޗުއްޓީ އަށް ދާން ނިންމި ނިންމުން ބަދަލުކުރަން މިހާރު ނިންމާފައިވާ ކަމަށް މަޖިލިހުގެ މެޖޯރިޓީ ލީޑަރު އަދި ޕީއެންސީގެ ޕީޖީ ލީޑަރު އިބްރާހިމް ފަލާހު މިއަދު ވިދާޅުވެއްޖެ އެވެ.

ރޯދަމަހު މަޖިލިސް ޗުއްޓީ އަށް ދިއުމަށާއި އަދި ކޮންމެ އަހަރެއްގެ ވެސް މަޖިލީހުގެ ފުރަތަމަ ދައުރު ފެށުން އަވަސް ކުރަން މަޖިލީހުގެ ގަވާއިދު ބަދަލުކުރަން މަޖިލީހުގެ އާންމު ކޮމިޓީން މިދިޔަ ހަފުތާގައި ނިންމީ މާފަންނު ދެކުނު ދާއިރާގެ ޕީއެންސީގެ މެމްބަރު އަބްދުﷲ ރިފާއު (ބޮޗޭ) ހުށަހެޅުއްވުމުންނެވެ.

މަޖިލީހުގެ އާންމު ކޮމިޓީން އެގޮތަށް ފާސްކުރީ މަޖިލިހުގެ ސުޕަ މެޖޯރިޓީ ޕާޓީ ޕީއެންސީގެ މެމްބަރުންގެ ވޯޓުންނެވެ. އެ ހުށަހެޅުމަށް އިދިކޮޅު އެމްޑީޕީގެ މެމްބަރުން ދެކޮޅެވެ.

އެކަމަކު، ފަލާހު "މިހާރު" އަށް މިއަދު ވިދާޅުވީ، ރޯދަމަސް އެއްކޮށް މަޖިލިސް ޗުއްޓީ އަށް ދާން ޕީއެންސީގެ ޕީޖީ ގުރޫޕުން މިހާރު ބޭނުން ނުވާ ކަމަށެވެ.

އޭނާ ވިދާޅުވީ ރޯދަމަހު ޗުއްޓީ އަށް ދާން ކުރިން ނިންމީ އެ މަހުގެ ފަހު 10 ގައި ސަރުކާރު ބަަންދުވާތީ، ރޯދަ މަހު މަޖިލީހުގައި މަސައްކަތަށް ލިބޭ މުއްދަތު ކުޑަވުމުން ކަމަށެވެ.

"އަޅުގަނޑުމެން އުޅުނީ އަޅުގަނޑުމެންނަށް ލިބޭ އެހެން ޗުއްޓީއެއް ނުނަގައި ގިނައިން މަސައްކަތް ކުރެވޭނެ ގޮތެއް ހޯދަން. ރޯދަމަހު މަސައްކަތް ކުރާ ނަމަ މަޖިލިސް ޖަލްސާ އަށް މި ލިބެނީ ދެ ގަޑިއިރު. އަނެއްކޮޅުން ރޯދަމަހުގެ ފަހު 10 ގައި ސަރުކާރު ބަންދުވާތީ މަޖިލިސް އަށް ވެސް ޗުއްޓީ ލިބޭނެ. އެހެންވެ، ރޯދަމަހު އެހާ ގިނަ ވަގުތު މަސައްކަތް ނުކުރެވޭނެތީ އަޅުގަނޑުމެން އުޅުނީ މިކަން ރަނގަޅަށް ގެންދަން،" ފަލާހު ވިދާޅުވި އެވެ.

އެކަމަކު، އޭނާ ވިދާޅުވީ މީޑިއާތަކުން ޚަބަރު ގެނައީ އޮޅުން އަރާ ގޮތަށް ކަމަށާއި އެހެންވެ، ބައެއް މީހުންނަށް އަރާފައިވާ އެ އޮޅުމާ ގުޅިގެން ރޯދަމަހު ޗުއްޓީ އަށް ދާން މިހާރު ބޭނުން ނުވާ ކަމަށެވެ.