ދީނީ ހޭލުންތެރިކަމަށް އެޗްޑީސީން ދެ ޖަމިއްޔާއަކާއެކު ވީޑިއޯ ސީރީޒެއް ގެންނަނީ

ކުރިއަށް އޮތް ރޯދަމަހު ދީނީ ހޭލުންތެރިކަން އިތުރުކުރަން ދެ ޖަމިއްޔާއަކާ ގުޅިގެން ހާއްސަ ވީޑިއޯ ސީރީޒެއް ގެނެސްދޭން އެޗްޑީސީން ނިންމައިފި އެވެ.

އެ ކުންފުނިން މިއަދު ބުނީ "އަލް އަސްރު" އަދި "އިލްމު ޖަމިއްޔާ" އާ ގުޅިގެން ވީޑިއޯތައް ގެންނަނީ އެ މާތް ދުވަސްވަރު އިލްމީ މައުލޫމާތާއި އިސްލާމީ ރީތި އާދަތައް، ޝައުގުވެރި އަދި މައުލޫމާތުން ފުރިގެންވާ ގޮތަށް ގެނެސްދިނުމަށް ކަމަށެވެ.

އަލް އަސްރު ޖަމިއްޔާއާ ގުޅިގެން ގެންނަ "ގެއްލޭނެތަ" ވީޑިއޯ ސީރީޒްގައި ރޯދަމަހުގެ ކޮންމެ ދުވަހަކު ރޯދަ ހިފުމުގެ މުހިއްމު ކަމާއި އޭގެ މާތްކަން ކިޔައިދިނުމާއި މުޖުތަމައުގައި ދީނީ ސާބިތުކަން އިތުރުކޮށް ހޭލުންތެރި ކުރުމާ ގުޅޭ ވީޑިއޯއެއް ސޯޝަލް މީޑިއާ ޕްލެޓްފޯމްތަކުން ދައްކާނެ އެވެ.

އެޗްޑީސީން ބުނީ އިލްމު ޖަމިއްޔާއާ ބައިވެރިވެގެން "ވާހަކަޔޯ ވާހަކަޔޯ" ގެ ނަމުގައި ގެންނާނީ ކީރިތި ރަސޫލާގެ ސުންނަތުގެ އަލީގައި ކުޑަކުދިންނަށް ހާއްސަކޮށްގެން ގެނެސްދޭ ވާހަކަ ސީރީޒެއް ކަމަށެވެ. މިއީ، އެ ޖަމިއްޔާގެ އެހީގައި ހިންގާ މި ފަދަ ދެ ވަނަ ސީރީޒެވެ.

އޭގެ ބޭނުމަކީ، އެޗްޑީސީން ބުނިގޮތުގައި އިސްލާމްދީނުގެ އަސްލުތަކުގެ މައްޗަށް ބިނާކޮށްގެން ހަދާފައިވާ އިލްމީ ވާހަކަތައް ޝައުގުވެރި ގޮތަކަށް ކުޑަކުދިންނަށް ފޯރުކޮށްދިނުމެވެ. އެ ސީރީޒްގެ ސަބަބުން ޝައުގުވެރި ގޮތަކަށް ކުޑަކުދިންނަށް ދީން އުނގެނުމަށް ބާރު އެޅޭނެ ކަމަށް ވެސް ބުންޏެވެ.

ރޯދަމަހުގެ ކޮންމެ ހޮނިހިރު ދުވަހަކު އެޗްޑީސީ އަދި އިލްމު ޖަމިއްޔާގެ ސޯޝަލް މީޑިއާ ޕްލެޓްފޯމްތަކުން "ވާހަކަ" އެޕިސޯޑެއް ގެނެސްދޭނެ އެވެ. މިއީ، އެޗްޑީސީން އިލްމް އިންސްޓިޓިއުޓާ ގުޅިގެން މި ސީރީޒް ގެނެސްދޭ ދެވަނަ އަހަރެވެ.

ހުޅުމާލޭގެ ހިތްގައިމު މާހައުލުތަކުން އެ ވާހަކަ ސީރީޒް ގެނެސްދޭނީ ޝައިހް ޖައުފަރު މުހައްމަދު އުސްމާނެވެ.

އެޗްޑީސީން ބުނީ އެ ކުންފުނީގެ އަމާޒަކީ ކުރިއަށް އޮތް ރޯދަމަހު އެކި ދާއިރާތަކުން މީހުން ހޭލުންތެރިކުރުމާއި ރޯދަމަހާ ދިމާކޮށް އާންމުންނަށް ފޯރުކޮށްދޭ މައުލޫމާތުތަކަކީ އެ މަހަށް ބޭނުންތެރި މައުލޫމާތުތަކަކަށް ހެދުން ކަމަށެވެ.