އިހުސާން ޖަވާބުދާރީވުމުގެ ވަގުތުގައި ތަކުރާރުކޮށް ނިޒާމީ ނުކުތާ ނެންގެވުމުން މީކާއިލް ތަޅުމުން ނެރެފި

އިދިކޮޅު އެމްޑީޕީން ރައްޔިތުންގެ މަޖިލީހަށް ހުށަހަޅާފައިވާ، ހޯމްލޭންޑް މިނިސްޓަރު އަލީ އިހުސާންގެ އިތުބާރު ނެތްކަމުގެ މައްސަލާގައި މިނިސްޓަރުގެ ޖަވާބުދާރީވުމުގެ ވަގުތުގައި ތަކުރާރުކޮށް ނިޒާމީ ނުކުތާ ނެންގެވުމުން، ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމްގެ ނަން އިއްވައި ތަޅުމުން މިއަދު ނެރެފި އެވެ.

އެމްޑީޕީގެ 12 މެމްބަރުންގެ ސޮޔާ އެކު އިހުސާންގެ އިތުބާރު ނެތް ކަމަށް ހުށަހެޅި މައްސަލަ މިއަދުގެ ޖަލްސާގައި ވަނީ އެޖެންޑާކޮށް ކުރިއަށް ގެންގޮސްފަ އެވެ.

އިހުސާން ވަނީ އޭނާ އަށް ކޮށްފައިވާ ތުހުމަތުތަކަށް ވަކިވަކިން ޖަވާބު ދެއްވައިފަ އެވެ.

އިހުސާން ވާހަކަ ދައްކަވަމުން ގެންދަވަނިކޮށް، މީކާއިލް ވަނީ ތަކުރާރުކޮށް އެކި ފަހަރު މަތިން ނިޒާމީ ނުކުތާ ނަންގަވައި މިނިސްޓަރު ދެއްކެވި ވާހަކަތަކަށް ރައްދު ދެއްވައިފަ އެވެ. ތަޅުމުގައި ނެތް ބައެއް ބޭފުޅުންނާއި ތަޅުމުގައި ތިއްބެވި އެމްޑީޕީގެ މެންބަރުންނަށް ތުހުމަތުތައް އަމާޒުކޮށް އިހުސާން ވާހަކަ ދެއްކެވުމުން އެކަން އެގޮތަށް ކުރިއަށް ނުގެންދެވޭނެ ކަމަށް ނިޒާމީ ނުކުތާ ނަންގަވައި މީކާއިލް ގެންދެވީ ވިދާޅުވަމުންނެވެ.

ފުރަތަމަ ނިޒާމީ ނުކުތާ ނަންގަވައި ތަޅުން ހޫނުވާން ފެށުމުން، ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވަނީ ދެ ފަހަރު މަތިން ނަސޭހަތް ދެއްވައި، އިތުރަށް ތަކުރާރުވާ ނަމަ ތަޅުމުން ނެރޭނެ ކަމުގެ އިންޒާރު ދެއްވައިފަ އެވެ.

އޭގެ ގިނަ އިރުތަކެއް ފަހުން، އިތުރު ނިޒާމީ މައްސަލަތަކަކަށް ފުރުސަތު ދެއްވުމަށް ފަހު، މަޖިލީހުގެ ރައީސް އަބްދުއްރަހީމް ވަނީ ވަރަށް ހިތްހަމަނުޖެހިވަޑައިގެން މީކާއިލްގެ ނަން އިއްވައިފަ އެވެ.

މީކާއިލް ތަޅުމުން ނެރުނީ ސާޖަންޓް އެޓް އާމްސް ތޮލްހަތު ހަސަން ވަޑައިގެން ވާހަކަ ދެއްކެވުމުން ވެސް، އެއްބާރުލުން ނުދެއްވުމުން ހަ ސެކިއުރިޓީންގެ އެހީތެރިކަމާ އެކު އެވެ.

ތަޅުމުން ނެރުމާ ގުޅިގެން މީކާއިލް "އެކްސް" ގައި ވިދާޅުވީ ގޮނޑިން ނުތެދުވެ، ތަކުރާރުކޮށް ނިޒާމާ ބެހޭ މައްސަލައެއް ހުށަހެޅުމުގެ ފުރުސަތަށް އެދިވަޑައިގަންނަވަމުން ގެންދަވަނިކޮށް އޭނާ ތަޅުމުން ނެރުނީ މަޖިލިހުގެ ގަވާއިދާ ހިލާފަށް ކަމަށެވެ.