އައްޑޫ ކޮންޒަވޭޝަން ޓްރަސްޓް ފަންޑަށް މިދިޔަ އަހަރު 8 ލައްކަ ރުފިޔާ!

އައްޑޫ ކޮންޒަވޭޝަން ޓްރަސްޓް ފަންޑަށް މިިދިޔަ އަހަރު 8 ލައްކަ ރުފިޔާ ލިބިފައިވާ ކަމަށް އައްޑޫ ސިޓީ ކައުންސިލުގެ އަހަރީ ރިޕޯޓުން ދައްކައިފި އެވެ.

އައްޑޫ ކޮންޒަވޭޝަން ޓްރަސްޓް ފަންޑުގެ ނަމުގައި ފަންޑެއް ގާއިމުކުރީ މެއި 15، 2022 ގަ އެވެ.

މިއީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން އައްޑޫގެ އިހުތިސާސްގެ ތެރޭގައި ހިމެނޭ، ހިމާޔަތް ކޮށްފައިވާ އަދި ޔުނެސްކޯ "މޭން އެންޑް ބައޮސްފިއާ ރިޒާވް" ގައި ހިމެނޭ ތަންތަން ބެލެހެއްޓުމަށް ބޭނުންވާ ހަރަދުތައް ކުރުމަށް ހެދި ފަންޑެކެވެ.

އަހަރީ ރިޕޯޓުގައިވާ ގޮތުން އައްޑޫ ނޭޗާ ޕާކުގެ ހިދުމަތްތަކުން ލިބުނީ 377،648ރ. އެވެ. އަދި ގްރީން ފަންޑުން ލިބުނު ފަސް ލައްކަ ރުފިޔާއާ އެކު، އެ ތަނުން ލިބުނު އާމްދަނީ 877،648ރ. އަށް އަރަ އެވެ.

އައްޑޫ ނޭޗާ ޕާކުގެ މެއިންޓަނަންސް އާއި އެހެނިހެން ހަރަދުތަކަށް މިދިޔަ އަހަރު އަރާނެ ކަމަށް ލަފާކުރީ 980،935ރ. އެވެ. އެކަމަކު ރިޕޯޓުގައިވާ ގޮތުން އެކަމަށް ހަރަދުވީ 355،492ރ. އެވެ.

ގްރީން ފަންޑުން ވެސް 862،329ރ. ހަރަދުވާނެ ކަމަށް އަންދާޒާކުރިޔަސް މިިދިޔަ އަހަރު އެ ފަންޑުން ހަރަދުވީ 299،320ރ. އެެވެ. ފަންޑުން ލިބުނު ފައިސާ އިން ވަނީ ދެ ބަގީ އާއި ވިޒިޓާސް ސެންޓަރުގެ ފަންކާތައް ގަނެފަ އެެވެ.

މިދިޔަ އަހަރު، އައްޑޫ ނޭޗާ ޕާކުގެ މަރާމާތަށް ކުރި މަސައްކަތްތަކުގެ ތެރޭގައި އައްޑޫ ނޭޗާ ޕާކުގެ ވިޒިޓާސް ސެންޓަރުގެ ބާޑް އޮބްޒާވާ އާއި ވިޒިޓާސް ސެންޓަރުގެ ފާހާނާ ސަރަހައްދުގައި ޑެކު ޖެހުމާއި އައުޓްޑޯ ކްލާސްރޫމާއި ބެދި ސަރަހައްދުގެ ކެނޯ ޖެޓީ އާއި ކޯއްޓޭ ސަރަަހައްދުގައި ހަދާފައިވާ ބެންޗުތައް މަރާމާތްކުރުން ހިމެނެ އެވެ. ބާބަކިއު ސްޓޭޝަން ނިންމުމާއި އިންފޮމޭޝަން ބޯޑުތައް މަރާމާތު ކުރުމާއި ނޭޗާ ޕާކުގެ އިދާރީ ހިންގުމަށް ބޭނުންވާ ތަކެތި ހޯދުން ހިމެނޭ ކަމަށް ރިޕޯޓުގައި ވެ އެވެ.

އެ ރިޕޯޓުގައިވާ ގޮތުން 2023 ވަނަ އަހަރުގެ ނިޔަލަށް އެ ފަންޑުގައި 1.2 މިލިއަން ރުފިޔާ ބާކީ ހުއްޓެވެ. އަދި 2024 ގައި ލިބުނު ފައިސާއާ އެކު ޖުމްލަ ހުރީ 1.85 މިލިއަން ރުފިޔާ އެވެ.