ތިނަދޫން ސްވައިން ފްލޫއަށް ޝައްކުވާ ތިން ކުއްޖަކާއި މާބަނޑު މީހަކަށް ފަރުވާ ދެނީ

ރާއްޖޭގައި މިހާރު ފެތުރެމުންދާ ސްވައިން ފްލޫއަށް ޝައްކު ކުރެވޭ މާބަނޑު މީހަކާއި ތިން ކުއްޖަކު ގދ. ތިނަަދޫން ފެނި، ޓެސްޓް ހެދުމަށް ސާމްޕަލްތައް މާލެ ފޮނުވައިފި އެވެ.

ތިނަދޫގައި ހުންނަ އަބްދުއްސަމަދު މެމޯރިއަލް ހޮސްޕިޓަލުގެ އޮފިޝަލަކު ވިދާޅުވީ ސްވައިން ފްލޫއަށް ޝައްކު ކުރެވޭ ތިން ކުޑަކުދިންނަށާއި މާބަނޑު މީހާއަށް ފަރުވާ ދެމުން އަންނަ ކަމަށެވެ. އަދި އެއީ ސްވައިން ފްލޫތޯ ޔަގީން ކުރުމަށް އެއް ކުއްޖެއްގެ ސާމްޕަލް މާލެ ފޮނުވާފައިވާއިރު އަށް މަހުގެ މާބަނޑު މީހާ ވެސް މާލެ ފޮނުވުމުގެ މަސައްކަތް ކުރަމުން އަންނަ ކަމަށް ވިދާޅުވި އެވެ.

"އެއީ ސްވައިން ފްލޫކަން ޔަގީން ކުރެވޭނީ ޓެސްޓުތަކަށް ފަހު. އެކަމަކު މާބަނޑު މީހާ މާލެ މި ފޮނުވާލަނީ އޭނާގެ ހާލު ސީރިއަސް ވެދާނެތީ،" އޮފިޝަލް ވިދާޅުވި އެވެ.

އޭނާ ވިދާޅުވީ ރާއްޖޭގެ ދެކުނުގެ އަތޮޅަކުން އަދި ސްވައިން ފްލޫގެ ކޭސްއެއް ނުފެންނަ ކަމަށާއި އެހެންވެ ތިނަދޫން ފެނުނު ޝައްކުވާ ކޭސްތަކާ މެދު އަދި ވަކި ގޮތަކަށް ބުނަން ދަތި ކަމަށެވެ.

ގދ. އަތޮޅުގައި ހަލުއި ކަމާއެކު ވައިރަލް ހުން ފެތުރެމުންދާތާ މިހާރު މަހެއްހާ ދުވަސް ވެއްޖެ އެވެ.

ސްވައިން ފްލޫ ޖެހުމުން ނުރައްކާ އެންމެ ބޮޑީ އުމުރުން ފަސް އަހަރުން ދަށުގެ ކުދިންނާއި އުމުރުން 65 އަހަރުން މަތީގެ މީހުންނާއި މާބަނޑު މީހުންނާއި ފުއްޕާމޭ، ހިތް، ފުރަމޭ، ލޭ، ނާވަސް ސިސްޓަމް، ނިއުރޯމަސްކިއުލާ ނުވަތަ މެޓަބޮލިކް މައްސަލަތައް ހުންނަ ބޮޑެތި މީހުންނާއި ކުޑަކުދިންނަށާއި ދިފާއީ ބާރު ދެރަ ކުޑަކުދިންނާއި މީހުންނަށް އަދި ދާއިމީކޮށް ފަރުވާ ހޯދަންޖެހޭ ބަލިތައް ހުންނަ މީހުންނަށެވެ.

މާލެ އާއި އެކި އަތޮޅުތަކުގައި ވަރަށް ބާރަށް ހުން ފެތުރެމުންދާއިރު ސްވައިން ފްލޫ އަށް ޕޮޒިޓިވްވާ މީހުންގެ އަދަދު ވެސް ދަނީ އިތުރުވަމުންނެވެ. އެ ބަލީގައި މިހާތަނަށް ދެ މީހަކު ވަނީ މަރުވެފަ އެވެ.

ހެލްތު ޕްރޮޓެކްޝަން އޭޖެންސީން އެންމެ ފަހުން އާއްމުކޮށްފައިވާ ހިސާބުތަކުން ދައްކާގޮތުގައި، މިހާތަނަށް 80 އަށް ވުރެ ގިނަ މީހުން ވަނީ ސްވައިން ފްލޫ އަށް ޕޮޒިޓިވްވެފަ އެވެ.