ރައްޔިތުންގެ ހިޔާލު ހޯދުމުގެ ވޯޓުގެ ބިލަށް މަޝްވަރާ ކުރުމަށް ބޭއްވި ކޮމިޓީ އަށް އެމްޑީޕީ އާއި ޕީއެންއެފުން ނުދޭ

ރިޔާސީ އިންތިހާބާއި ރައްޔިތުންގެ މަޖިލިހުގެ އިންތިހާބު އެއްކޮށް ބޭއްވުމުގެ އިތުރުން ރިޔާސީ އިންތިހާބުގެ ދެވަނަ ބުރު އުވާލުމާ މެދު އާންމުންގެ ފެންނަ/ނުފެންނަ ވޯޓަކަށް ދިއުމާ ގުޅޭ ގޮތުން ސިޔާސީ ޕާޓީތަކާ އެކު މަޝްވަރާކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ހެނދުނު ބައްދަލުވުމެއް ބޭއްވި ނަމަވެސް އެ ބައްދަލުވުމަށް އެންމެ ބޮޑު އިދިކޮޅު ޕާޓީ އެމްޑީޕީން ނުދާ ކަމަށް ބުނެފި އެވެ.

ކޮމިޓީގެ ބައްދަލުވުމަށް ހުރިހާ ސިޔާސީ ޕާޓީއަކަށް ދައުވަތު ދިންއިރު، އެމްޑީޕީ އާއި ޕީއެންއެފްގެ ބޭފުޅުން ވަޑައނުގަންނަވަ އެވެ. އެ ބައްދަލުވުމަށް އެ ދެ ޕާޓީއަށް ވެސް ދައުވަތު ދީފައިވެ އެވެ.

އެ ބައްދަލުވުމަށް ދިޔައީ ސަރުކާރު ހިންގާ ޕާޓީ ޕީއެންސީ އާއި ޖުމްހޫރީ ޕާޓީ އާއި އެމްޑީއޭ އާއި އެމްއެންޕީ އަދި އަދާލަތު ޕާޓީންނެވެ.

"ޕީއެންއެފާއި އެމްޑީޕީ އަށް ވެސް އަޅުގަނޑުމެން ދައުވަތު ދިިނިން. އަޅުގަނޑުމެން އުންމީދު ކުރަނީ މިއަދު އަދި އެ ބޭފުޅުންނަށް ކަން ދިމާކުރި ގޮތުން ވަޑައިނުގެންނެވުނު ކަމުގައި ވިޔަސް، އަޅުގަނޑުމެންގެ މި ބިލު ދިރާސާކުރުމުގައި މި ދާ ދުވަސްތަކުގައި ކޮންމެވެސް ދުވަހެއްގައި ވަޑައިގެން މައުލޫމާތު ހިއްސާ ކުރައްވާނެ ކަމަށް،" ކޮމިޓީގެ މުގައްރިރު މާފުށީ ދާއިރާގެ މެމްބަރު ހުސެއިން ރިޒާ އާދަމް ވިދާޅުވި އެވެ.

ކޮމިޓީއަށް ވަޑައިގެންނެވި ޕާޓީތަކުގެ ބޭފުޅުން ހުށަހެޅުއްވި ހިޔާލުތައް ކޮމިޓީގެ މެމްބަރުން ވަނީ އަޑުއައްސަވައިފަ އެވެ.

ސަރުކާރުގެ ފަރާތުން އިނގުރައިދޫގެ ދާއިރާގެ މެމްބަރު އިބްރާހިމް ފަލާހު ރައްޔިތުންގެ މަޖިލީހަށް ހުށަހެޅުއްވި ބިލުގައި ވަނީ ގާނޫނުއަސާސީގައި އަސާސީ ހައްގުތަކާއި މިނިވަންކަމުގެ ބަޔަށް އިސްލާހު ގެނައުމާއި ރައްޔިތުންގެ މަޖިލީހުގެ އުމުރާ ގުޅޭ ބަދަލުތަކާއި ރިޔާސަތުގެ ދައުރާއި ރައީސުލްޖުމްހޫރިއްޔާ އިންތިހާބު ކުރާ ގޮތާއި ރައީސް ބިލްތައް ތަސްދީގުކުރުމާއި ރާއްޖޭގެ ސަރަަހައްދާ ގުޅޭ ކަންކަމުގައި އާންމުން ފެންނަ ނުފެންނަ ގޮތެއް ހޯދަން އެހުމަށެވެ.

އެ ބިލުގައި ބުނީ އާންމުންގެ ހިޔާލު ހޯދުމުގެ ވޯޓަށް އެދި ހުށަހަޅާ ތާރީހާއި ވޯޓު ނަގާ ތާރީހާ ދެމެދު މަދުވެގެން 45 ދުވަސް އަދި ގިނަވެގެން ހޭދަވާން ޖެހޭ މުއްދަތަކީ 90 ދުވަސް ކަމަށެވެ.

އެ ބިލަށް މަޝްވަރާ ހޯދުމަށް އިލެކްޝަންސް ކޮމިޝަން (އީސީ)ގެ ބޭފުޅުން ވެސް އިއްޔެގެ ކޮމިޓީގެ ބައްދަލުވުމަށް ދައުވަތު ދީގެން ގެންދެވި އެވެ.

އެކަމާ ގުޅޭގޮތުން އީސީގެ ރައީސް މުހައްމަދު ޒާހިދު ވިދާޅުވީ ރެފަރެންޑް ނުވަތަ ފެންނަ/ނުފެންނަ ވޯޓެއް ކުރިއަށް ގެންދެވޭނީ އާންމުން ހޭލުންތެރިކުރުމަށް ފަހުގައި ކަމަށެވެ. އެހެންވެ، އިންތިހާބު ބާއްވަން މިހާރު ދީފައިވާ މުއްދަތުގައި އެކަން ކުރުމަށް ދަތިވާނެ ކަމަށް އޭނާ ވިދާޅުވި އެވެ.

އޭނާ ވިދާޅުވީ، އެހެން އިންތިހާބުތައް ބާއްވަން ދީފައިވާ މުއްދަތުތަކެކޭ އެއްގޮތަށް 45-120 ދުވަހުގެ މުއްދަތެއް ދީފި ނަމަ ފަސޭހަވާނެ ކަމަށެވެ.

ޖުމްހޫރީ ދުވަސް ފާހަގަކުރަން މިދިޔަ އަހަރު ބޭއްވި ޖަލްސާގައި ރައީސް ޑރ. މުހައްމަދު މުއިއްޒު ވަނީ ރައްޔިތުންގެ ފެންނަ/ނުފެންނަ ވޯޓަކަށް އަހަން ނިންމާފައިވާ އިއުލާންކުރައްވައިފަ އެވެ. އަދި އެ ބަދަލުތައް ގެންނާނީ ރައްޔިތުންގެ ވޯޓަކަށް ގޮސް ރައްޔިތުންގެ ހިޔާލާއެކުގައި ކަމަށް އެމަނިކުފާނު ވިދާޅުވެފައިވެ އެވެ.