ޝިފާންގެ ރެކޯޑުތަކަކަށް އެހެން އޭސީޕީއަކު ބަދަލު ގެނައި މައްސަލައެއް ބަލައިދޭން ހުށަހަޅައިފި

ފުލުހުންގެ އެސިސްޓެންޓް ކޮމިޝަނަރު އޮފް ޕޮލިސް އަހުމަދު ޝިފާންއާ ގުޅޭ ޒާތީ މައުލޫމާތުތަކެއް ޕްރޮފެޝަނަލް ސްޓޭންޑާޑް ކޮމާންޑު (ޕީއެސްސީ) ގައި ރެކޯޑް ކޮށްފައި ވަނިކޮށް، އެ މައުލޫމާތުތަކަށް އެހެން އޭސީޕީއަކު ބަދަލު ގެނެސްފައިވާ މައްސަލައެއް ޝިފާން ފެންމަތިކުރައްވައި، އެ މައްސަލަ ބަލައިދޭން މިއަދު ހުށަހަޅުއްވައިފި އެވެ.

ޕޮލިސް ކޮމިޝަނަރު އިސްމާއިލް ނަވީނަށް ފޮނުއްވި ސިޓީއެއްގައި ޝިފާން ވިދާޅުވީ، އޭނާއާ ބެހޭ ޒާތީ މައުލޫމާތުތަކެއް މި އަހަރުގެ މޭ މަހު ޕީއެސްސީގައި ރެކޯޑް ކޮށްފައިވާއިރު، އެހެން އޭސީޕީއަކު އެ ރެކޯޑުތަކަށް ބަދަލު ގެނެސްފައިވާކަން ޑިޖިޓަލް ޑޭޓާ އަދި ޓެކްނޮލޮޖީގެ ފަރާތުން މައުލޫމާތު ދީފައިވާ ކަމަށެވެ. އަދި މޭ 29 ގައި ރަސްމީކޮށް ފުލުހުންގެ ސަމާލުކަމަށް އެ މައްސަލަ ގެނެސްފައިވާނެ ކަމަށް އެ ސިޓީގައި ޝިފާން ވިދާޅުވި އެވެ.

"އަދި ހަމަ މިއާ އެކު، އަޅުގަނޑާ ބެހޭ ގޮތުން، މި ހިދުމަތުގައި ޕީއެސްސީގެ ނިޒާމުގައި ރައްކާ ކުރެވިފައިވާ ބައެއް މައުލޫމާތާއި އަދި ހަގީގަތާ ހިލާފު އެތައް މައުލޫމާތެއް، ބައެއް ރަސްމީ އިދާރާތަކާއި ލޯކަލް ބައެއް ނޫސް އެޖެންސީތަކަށް، މި ނިޒާމަށް އެކްސެސް އޮތް ފަރާތްތަކުން، 8 ނޮވެމްބަރުގައި ހިއްސާ ކޮށްފައިވާކަން ވަނީ ފާހަގަކުރެވިފަ އެވެ،" ޝިފާން ވިދާޅުވި އެވެ.

އެހެންވެ، ފުލުހުންގެ ހިދުމަތުގައި އެކަށަައަޅާފައިވާ ނިޒާމުގެ ތެރެއިން އެ މައްސަލަ ބަލައި ދިނުމަށް ސީޕީ ނަވީންގެ އަރިހުން ޝިފާން އެދިވަޑައިގަތެވެ.

އެ ކަމަށް ޝިފާން އެދިވަޑައިގެންނެވިއިރު، އޭނާއާ ގުޅޭ ގޮތުން ކުރާ ތުހުމަތުތަކެއްގެ މައްސަލައެއް ރައްޔިތުންގެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް 11 އޮފިސަރަކު ވަނީ ހުށަހަޅައިފަ އެވެ. ޗީފް ސުޕްރިންޓެންޑެންޓުން ފެށިގެން މަތީގެ ރޭންކުގައި ތިއްބެވި އެ 11 އޮފިސަރުން އެ މައްސަލަ އެ ކޮމިޓީގެ ސަމާލުކަމަށް ގެނައީ ވިސްލްބްލޯވަރުންގެ ގޮތުގަ އެވެ.