ހޯރަފުށި ކައުންސިލްގެ ރައީސް ވަހީދު ތިން މަސް ދުވަހަށް ސަސްޕެންޑުކޮށްފި

ހއ. ހޯރަފުށި ކައުންސިލުން ލާމަރުކަޒީ ގާނޫނާއި ލޯކަލް ކައުންސިލުގެ އާންމު އިޖުރާއީ ގަވާއިދާއި މާލިއްޔަތު ގަވާއިދާ ހިލާފަށް ކަންކަން ކޮށްފައިވާކަން ފާހަގަވެފައިވާތީ އެ ކައުންސިލްގެ ރައީސް މުހައްމަދު ވަހީދު މުސާރަ އާއި އިނާޔަތްތައް ލިބިވަޑައިނުގަންނަވާ ގޮތަށް ތިން މަސް ދުވަހަށް އެލްޖީއޭ އިން މިއަދުން ފެށިގެން ސަސްޕެންޑުކޮށްފި އެވެ.

ހޯރަފުށި ކައުންސިލާ ގުޅޭ ގޮތުން އެލްޖީއޭ އަށް ހުށަހެޅި ޝަކުވާއަކާ ގުޅިގެން 8 މައްސަލައެއް ބަލާފައިވާއިރު، ކައުންސިލްގެ ރައީސް ވަހީދާ މެދު ފިޔަވަޅު އެޅީ އެ ކައުންސިލުން ގާނޫނާއި ގަވާއިދުތަކާ އެއްގޮތަށް ކަންކަން ކުރާ ކަން ކަށަވަރު ކުރުމުގެ އެންމެ އިސް ޒިންމާ މަތިކޮށްފައިވާ ބޭފުޅަކީ ކައުންސިލުގެ ރައީސް ކަމަށް ވާތީ ކަމަށް އެލްޖީއޭގެ ރިޕޯޓުގައި ވެ އެވެ.

ހޯރަފުށި ކައުންސިލްގެ ރައީސް ވަހީދަށް މުސާރަ އާއި އިނާޔަތްތައް ނުލިބޭ ގޮތަށް ތިން މަސް ދުވަހަށް ސަސްޕެންޑު ކުރިއިރު، މައްސަލަތަކުގެ ކުޑަބޮޑުމިނަށް ބަލައި އެލްޖީއޭ އިން ނިންމީ އެހެން ކައުންސިލަރުންނަށް ނަސޭހަތް ދޭށެވެ.

އޭގެ ތެރޭގައި ހިމެނެނީ ކައުންސިލްގެ ނައިބު ރައީސް އަހުމަދު އިމްދާހުގެ އިތުރުން ކައުންސިލް މެމްބަރުން ކަމަށްވާ އިބްރާހިމް ޝާކިރާއި މަރިޔަމް ވަކީލާ އާއި އާމިނަތު ވިސާމާ އާއި އާމިނަތު ނާސިހާ އަދި އަހުމަދު ރައޫފެވެ.

ހޯރަފުށި ކައުންސިލްގެ ރައީސް ވަހީދު ހިމެނޭ ގޮތަށް އެ ހުރިހާ ކައުންސިލަރުން ވެސް ނިސްބަތްވަނީ އިދިކޮޅު އެމްޑީޕީއަށެވެ.

ހޯރަފުށި ކައުންސިލާ ގުޅޭ ގޮތުން ބެލި މައްސަލަތައް:

1- ތިލަ އުތުރު އަންހެނުންގެ ވޮލީ މުބާރާތް 2025 ބޭއްވުމުގައި މާލިއްޔަތު ގަވާއިދާ ހިލާފާށް ހަރަދު ކޮށްފައިވުން.

2- ރަށުގެ ގޯތިތަކާ އިންވެގެން އޮންނަ ހުސް ބިންތައް ލޭންޑް ޔޫޒްޑް ޕްލޭނާ ހިލާފަށް އެ ގޯތިތަކަށް އިތުރު ކޮށްދިނުން.

3- މާލިއްޔަތު ގަވާއިދާ ހިލާފަށް 2023 ގައި ރަށުގެ ބަނދަރު ސަރަހައްދުގައި އިންދުމަށް ކަދުރު ރުއްތަކެއް ގަނެފައިވާ މައްސަލަ.

4- މި އަހަރުގެ އަޟްހާ އީދު ކުޅިވަރާއި ސްޓޭޖުލައިޓް އަދި ސްޓޭޖުގެ ކަންކަން ކުރުމަށް މާލިއްޔަތު ގަވާއިދާ ހިލާފަށް ކައުންސިލުން ހަރަދު ކުރުން.

5- ކައުންސިލުގެ ޕްރޮކިއުމަންޓް ކަންތަކުގައި އުޅޭ މުވައްޒަފުން ބިޑް ކޮމިޓީގައި ތިބޭ ކަމަށް ބުނެ ހުށަހެޅި މައްސަލަ.

6- މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ހޯދުމަށް އެދޭ މައުލޫމާތު ކައުންސިލުން ނުދިނުން.

7- މި އަހަރުގެ އަޟްހާ އީދަށް ރަށުތެރެ ދިއްލާ ޒީނަތްތެރި ކުރުމަށް ބޭނުންވާ ލައިޓް ގަތުމަށް ސްޕްލިޓް ކޮށްގެން ގިނަ އަދަދެއްގެ ފައިސާތަކެއް މާލިއްޔަތު ގާނޫނާއި ގަވާއިދާއި ހިލާފަށް ދޫކޮށްފައިވާ ކަމާއި އަދި އެ ތަކެތި ކައުންސިލަށް ލިބިފައި ނުވާ މައްސަލަ.

8- ހޯކްސް އަށް 5،000 އަކަފޫޓުގެ ބިމެއް ދޫކުރި ކަމަށް ބުނާ މައްސަލަ.

އެލްޖީއޭ އިން މިއަދު ބުނީ، ހޯރަފުށީ ކައުންސިލާ ގުޅޭގޮތުން އެ އިދާރާާ އަށް ލިބުނު ޝަކުވާތަކާ ގުޅިގެން އިންކުއަރީއެއް ހެދި ކަމަށެވެ.

އެ އިންކުއަރީ އިން ފާހަގަވީ އެލްޖީއޭ އިން ބުނި ގޮތުގައި، ލާމަރުކަޒީ ގާނޫނުގައި ބަޔާންކޮށްފައިވާ މަސްއޫލިއްޔަތާއި ވާޖިބު އެކަށީގެންވާ ގޮތަކަށް އަދާނުކުރާ ކަމާއި ކައުންސިލަރުންގެ ސުލޫކީ މިންގަނޑާ ހިލާފަށް އެ ބޭފުޅުން އަމަލުތައް ގެންގުޅޭ ކަމެވެ. އަދި އެލްޖީއޭގެ އެންގުމަށް އަމަލު ނުކުރަން ކައުންސިލްގެ ޖަލްސާއަކުން ނިންމާފައިވާކަން އެނގޭތީއާ އެކު، އޭގެ ސަބަބުން ހޯރަފުށި ކައުންސިލަށާއި ލާމަރުކަޒީ ނިޒާމަށް ނުހަނު ގެއްލުން ލިބޭނެ ކަމަށް ފެންނަ ކަމަށް ވެސް އެލްޖީއޭ އިން ބުންޏެވެ.

ހޯރަފުށި ކައުންސިލް އިދާރާގެ ސެކްރެޓަރީ ޖެނެރަލާއި އިދާރީ އެހެން މުވައްޒަފެއްގެ އިހުމާލެއް އެ 8 މައްސަލާގައި ހިމެނޭ ނަމަ އެ ކަންކަމަށް ޒިންމާވާ މުވައްޒަފަށް ފިޔަވަޅު އެޅުމަށްޓަކައި އެ މައްސަލައަކާ ގުޅުން ހުރި ދައުލަތުގެ އިދާރާތަކަށް ހުށަހެޅުމަށް ވެސް އެލްޖީއޭ އިން މިއަދު ނިންމި އެވެ.

އެލްޖީއޭ އިން ބުނި ގޮތުގައި އެ އިދާރާ އިން ބެލި މައްސަލަތަކާ ގުޅޭ ގޮތުން ލިޔުމުން ޖަވާބުދާރީވާން ހަތް ދުވަހުގެ މުއްދަތެއް ދިނެވެ. އަދި އެ މައްސަލަތަކާ ގުޅޭ ލިޔެކިޔުންތައް އެ ކައުންސިލް އިދާރާ އިން ހޯދި ކަމަށް ވެސް އެލްޖީއޭ އިން ބުންޏެވެ.