އިންތިހާބު ކާމިޔާބު ކުރާނީ އެއްވެސް މީހެއްގެ މަހާއި ކައްޓާ ކައިގެނެއް ނޫން: އާދަމް އާޒިމް

ކުރިއަށް އޮތް ލޯކަލް ކައުންސިލްގެ އިންތިހާބުގެ ކެމްޕެއިންގައި "އެއްވެސް މީހެއްގެ މަހާއި ކައްޓާ ކައިގެން" އެ އިންތިހާބު ކާމިޔާބު ކުރައްވަން ބޭނުން ނުވާ ކަމަށް މާލޭގެ މޭޔަރު އާދަމް އާޒިމް ރޭ ވިދާޅުވެއްޖެ އެވެ.

އޭނާ އެހެން ވިދާޅުވީ، އަންނަ އަހަރުގެ އޭޕްރީލް ހަތަރުވަނަ ދުވަހު ބާއްވާ ލޯކަލް ކައުންސިލްތަކުގެ އިންތިހާބަށް އެމްޑީޕީގެ މާލޭގެ މޭޔަރުގެ ޓިކެޓު ހޯއްދަވަން މިހާރު ފަށާފައިވާ އެ ޕާޓީގެ ޕްރައިމަރީ ކެމްޕެއިނަށް ހުޅުމާލޭގައި ބޭއްވި ޖަލްސާގަ އެވެ.

މަގާމު ދިފާއު ކުރައްވަން ނުކުންނެވި އާދަމް އާޒިމް، އެމްޑީޕީގެ ޕްރައިމަރީގައި އޭނާގެ ވާދަވެރި ކެންޑިޑޭޓް އަލީ އާޒިމަށް ނުސީދާ ރައްދެއް ދެއްވަމުން ވިދާޅުވީ، އިންތިހާބު ކާމިޔާބު ކުރައްވާނީ އިހުތިރާމާއި ލޯތްބާ އެކު ކުރާ ކެމްޕެއިނަކުން ކަމަށެވެ.

އަޅުގަނޑެއް އަޅުނަޑަށް ތާއީދުކުރާ މީހުންނަކަށެއް އިންސާނުންގެ މަހާއި ކައްޓާ ކައިގެންނެއް އިންތިހާބުތައް ކާމިޔާބު ކުރުމަކީ ދަންނަ ކަމެއް ނޫން. އަޅުގަނޑު ދަންނަ ކަމަކީ ހުރި މައްސަލަތަކާ ވާދަކޮށްގެން އެ މައްސަލަތައް ހައްލު ކޮށްދީގެން، ހައްލު ކުރާނެ ގޮތްތައް ކިޔައިދީގެން އިންތިހާބު ކާމިޔާބުކޮށް އެ މައްސަލަތަކުގެ އަލީގައި އެ ރައްޔިތުންނަށް ފަސޭހަތައް ހޯދައިދިނުން. އެއީ އަޅުގަނޑުމެން ދަންނަ ކަމަކީ،" މިހާރު ވެސް އެމްޑީޕީގެ ޓިކެޓުގައި މާލޭގެ މޭޔަރުގެ މަގާމުގައި ހުންނެވި އާދަމް އާޒިމް ވިދާޅުވި އެވެ.

އޭނާ އެ މޭރުމުން ވާހަކަ ދެެއްކެވީ ޕްރައިމަރީގެ ވާދަވެރި ކެންޑިޑޭޓު އަލީ އާޒިމްގެ ކެމްޕެއިން ހަފުލާތަކުގައި ބަހުގެ އަދި ޒާތީ ހަމަލާތައް ދެއްވާތީ ކަމަށް ބެލެވެ އެވެ.

އާދަމް އާޒިމް ވިދާޅުވީ، އޭނާ މި ކެމްޕެއިނަށް އެކި ގޭގެ އަށް ވަޑައިގަންނަވާއިރު، އިސްތިގުބާލު ކުރަން މާ ކުރިން މީހުން ނުކުމެ ތިބޭ ކަމަށާއި އެއީ އެމްޑީޕީގެ ރޫހު ކަމަށެވެ. އެއީ އެމްޑީޕީގެ އަޒުމް ކަމަށާއި އެ މީހުން ތިބީ އޭނާ އިންތިހާބު ކުރަން ކެތްމަދުވެފައި ކަމަށް އާދަމް އާޒިމް ވިދާޅުވި އެވެ.

އޭނާ ވިދާޅުވި ގޮތުގައި، އެ އަޒުމުގައި އެމްޑީޕީގެ މެމްބަރުން ތިބި ނަމަ މިހާރުގެ ސަރުކާރަށް އެ ޕާޓީ ބައްޔެއް ނުކުރެވޭނެ އެވެ.

"ﷲގެ ރަހުމަތްފުޅާއި ތިޔަބޭފުޅުންގެ ތާއީދާ އެކީގައި އެމްޑީޕީ މި އިންތިހާބު ކާމިޔާބު ކުރާނީ އިރާދަކުރެއްވިއްޔާ މަސައްކަތް ކޮށްގެން، މަސައްކަތް ކޮށްގެން، މަސައްކަތް ކޮށްގެން ހިތްވަރާ އެކު،" އާދަމް އާޒިމް ވިދާޅުވި އެވެ.

އޭނާ ވިދާޅުވީ، އެންމެ އިންޗިއެއް ވެސް އެމްޑީޕީ ފަހަތަކަށް ނުޖެއްސޭނެ ކަމަށާއި ކޮންމެ ދުވަހަކު އިންޗިއެއް ޖެހޭނީ ކުރިއަށް ކަމަށެވެ.

ރޭގެ ޖަލްސާގައި އާދަމް އާޒިމް ވިދާޅުވީ، އޭނާ ވާދަކުރައްވަނީ މައްސަލަތަކާކަން މިހާރު ފެންނާނެ ކަަމަށެވެ.

"[މާލޭގެ މަގުތަކުގައި] ފެން ބޮޑުވާތީ އެކަމާ ވާދަކުރީ. އަޅުގަނޑުމެން އިރާދަކުރެއްވިއްޔާ ރަނގަޅު ކާމިޔާބީއެއް ހޯދިން. އަޅުގަނޑުގެ ކޯލް ސެންޓަރުގެ ކަންތައްތަކާއި ކެމްޕެއިން ހަރަކާތްތައް ހިންގައި ދެއްވަނީ ތިޔަބޭފުޅުން. އެމްޑީޕީގެ ތަޖުރިބާކާރު ކެމްޕެއިން ޓީމުގެ މެމްބަރުން. އަބަދުމެ ތިއްބަވަނީ ގުޅާލަގުޅާލާ،" އާދަމް އާޒިމް ވިދާޅުވި އެވެ.

އޭނާ ވިދާޅުވި ގޮތުގައި ރާއްޖެ އާއި މުޅި މާލެ އަށް ރަނގަޅު ދުވަހެއް ފެންނާނީ އެމްޑީޕީ އަށް ވޯޓު އަޅައި ފުރުވާލަދިން ދުވަހަކުންނެވެ. މިހާތަނަށް ކަންކަން ވެފައި އޮތީ އެެހެންވެ ކަމަަށް އާދަމް އާޒިމް ވިދާޅުވި އެވެ.

ވިދާޅުވީ، އޭނާއާ އެކު މާލޭގެ އެހެން ދާއިރާތަކަށް ނުކުންނަވާ ކެންޑިޑޭޓުން ބޮޑު ތަފާތަކުން އިންތިހާބު ކޮށްދީފި ނަމަ އުފާވެރި ދުވަސްތަކެއް ގެނެސްދޭނެ ކަމަށެވެ.

"ޓީމެއްގެ ގޮތުގައި އަޅުގަނޑުމެން މަސައްކަތް މި ކުރަނީ އެންމެ ގޮނޑިއެއް ވެސް އެހެން ބަޔަކަށް ނުދޭން. އަޅުގަނޑުމެން މަސައްކަތް މި ކުރަނީ ހުރިހާ ގޮނޑިއެއް އެމްޑީޕީ ކާމިޔާބު ކުރަން. އަޅުގަނޑުގެ ހުރިހާ މަސައްކަތެއް، ހުރިހާ ވަގުތެއް އިރާދަކުރެއްވިއްޔާ އެމްޑީޕީގެ ކެންޑިޑޭޓުންނަށް ހޯދައި ދިނުމަށް މަސައްކަތް ކޮށްދޭނެ ކަމުގެ ފުރިހަމަ ޔަގީންކަން އަޅުގަނޑު ދެން،" އާދަމް އާޒިމް ވިދާޅުވި އެވެ.

ތާރީހު ހަނދާން ކޮށްދެއްވަމުން އާދަމް އާޒިމް ވިދާޅުވީ، އޭނާ މޭޔަރުގެ މަގާމު މިހާރު ފުރުއްވަނީ ބައި އިލެކްޝަނެއް ކާމިޔާބު ކުރައްވައިގެން ކަމަށާއި މަގާމުގައި އަދި މިވީ އެންމެ ދޮޅު އަހަރު ކަމަށެވެ. އެކަމަކު، އެ ދޮޅު އަހަރު ކުރެއްވި މަސައްކަތްތައް ގިނަ ކަމުން މަގާމުގައި ފަސް އަހަރު ހޭދަވެއްޖެ ކަމަށް ބައެއް މީހުންނަށް ހީވާ ކަމަށް އޭނާ ވިދާޅުވި އެވެ.

ރޭގެ ޖަލްސާގައި އާދަމް އާޒިމް ވަނީ އޭނާގެ މަގާމުގެ ދޮޅު އަހަރުގައި މާލެ އަށް ކޮށްދެއްވި ކަންކަން ވިދާޅުވެދެއްވައިފަ އެވެ.