އަޅުގަނޑަށް ދައުވާކުރަން އިތުރު ދެ މައްސަލަ ޕީޖީ އަށް ފޮނުވައިފި: ރިޔާޒް

ޖުމްހޫރީ ޕާޓީގެ ނައިބު ލީޑަރު އަބްދުﷲ ރިޔާޒަށް ދައުވާ އުފުލައި، ޝަރީއަތް ހިނގަމުން ދަނިކޮށް އިތުރު ދެ މައްސަލައެއްގައި އޭނާ އަށް ދައުވާކުރަން ޕްރޮސެކިއުޓާ ޖެނެރަލްގެެ އޮފީހަށް ފޮނުވާފައިވާ ކަން ފުލުހުން އަންގާފައިވާ ކަމަށް ރިޔާޒް މިއަދު ވިދާޅުވެއްޖެ އެވެ.

ފޯނެއް ހުޅުވައި ނުދިން ކަމަށް ބުނެ ރިޔާޒަށް ދައުވާ އުފުލައި، ޝަރީއަތް ނިމުމަކާ ގާތުގައި ވަނިކޮށް ރިޔާޒް މިރޭ ކުރެއްވި ޓްވީޓެއްގައިވަނީ އިތުރު ދެ މައްސަލައެއްގައި އޭނާއަށް ދައުވާ ކުރަން ޕީޖީ އަށް ފޮނުވާފައިވާ ކަމަށް ފުލުހުންގެ ރެކޯޑް އެބައޮތް ކަމަށެވެ.

ރިިޔާޒް ވިދާޅުވީ އިތުރު ދެ މައްސަލައެއް ޕީޖީ އަށް ފޮނުވި ކަން ފުލުހުން އޭނާ އަށް އެންގީ މިހާރު އޭނާ އަށް ދައުވާކުރާ މައްސަލަ އަނބުރާ ގެންދަން ޕީޖީ ގައި އެދުމަށް ކުށުގެ ރެކޯޑް ފުލުހުންގެ ކިބައިން ސާފު ކުރަން އޭނާ ހުށަހެޅުމުންނެވެ. ފުލުހުން އެގޮތަށް އެންގިޔަސް އެކަން އިތުރަށް ކަށަވަރު ކުރަން ޕީޖީގައި އެދޭނެ ކަމަށް ރިޔާޒް ވިދާޅުވި އެވެ.

"އަޅުގަނޑުމެން މިއުޅެނީ ލިޔަންވެގެން ޕީޖީ އޮފީހަށް އެ މައްސަލަތަކުގެ މައުލޫމާތު ހޯދަން،" ރިޔާޒް ވިދާޅުވި އެވެ.

ރިޔާޒް ފުލުހުން އޭނާއާ ހިއްސާ ކުރި ކުށުގެ ރެކޯޑް މައުލޫމާތު ފޯމްގައިވާ ގޮތުން ރިޔާޒަށް މިހާރު ދައުވާކުރާ މައްސަލައިގެ އިތުރުން ދައުވާ ކުރަން ޕީޖީ އަށް ފޮނުވާފައިވަނީ ފިތުނަ އުފެދޭ ޒާތުގެ ވާހަކަތައް ދެއްކި ކަމަށް ބުނާ ދެ މައްސަލައެކެވެ.

އެކަމުގައި ފުލުހުން އަދި ޕީޖީ އޮފީހުގެ ބަހެއް އަދި ނުލިބެ އެވެ.

ރިޔާޒަށް މިހާރު ދައުވާކުރާ މައްސަލައިގެ އަޑުއެހުންތައް ކޯޓުން މިއަދު ނިންމާލާފައިވާއިރު އެ މައްސަލާގައި ދެން އޮންނާނީ ހުކުމް ކުރުމެވެ. އެކަމަކު އިތުރު ފުރުސަތު ޕްރޮގްރާމްގެ ދަށުން އެ ދައުވާ އަނބުރާ ގެންދަން ޕީޖީ އޮފީހުގައި ރިޔާޒް މިހާރު ވަނީ އެދިވަޑައިގެންފަ އެވެ. އެކަމުގައި ޕީޖީން އަދި ގޮތެއް ނުނިންމަ އެވެ.