ރާއްޖެ ދޫކޮށް ދާކަށް ނޫޅެން، ފިލުމުގެ ވިސްނުމެއް ނެތް: ގަވަރުނަރު

މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރުސީ)ގެ ހިޔާނާތުގައި ދައުލަތުގެ މުއައްސަސާތަކުން ބައިވެރިވެފައިވާކަމަށް އޮޑިޓް ރިޕޯޓުގައި ބުނެފައިވާ މައްސަލައިގައި ރާއްޖެ ދޫކޮށް ފިއްލަވަންޖެހޭ އެއްވެސް ސަބަބެއް ނެތް ކަމަށާއި އެފަދަ ވިސްނުމެއް ވެސް ނެތް ކަމަށް އެމްއެމްއޭގެ ގަވަރުނަރު އަޒީމާ އާދަމް މިއަދު ވިދާޅުވެއްޖެ އެވެ.

އާޒިމާ "ފިއްލެވުމު"ގެ ކަންކަން ހަމަޖައްސަވަން އޭނާގެ ފިރިކަލުން އަދި ފޮރިން ސެކްރެޓަރީ ޑރ. އަލީ ނަސީރު އުޅުއްވާ ކަމަށް އިދިކޮޅު އިއްތިހާދުން ކުރާ ތުހުމަތުތަކާ ގުޅިގެން "މިހާރު"އާ ވާހަކަ ދައްކަވަމުން އަޒީމާ ވިދާޅުވީ "ރާއްޖެ އިން ބޭރަށް ބަދަލުވުމުގެ ޕްލޭނެއް ވެސް އަދި ނެތް" ކަމަށެވެ.

"އަޅުގަނޑުގެ ފިރިމީހާ ސަފީރުކަމަށް ފޮނުވަން އޮތީ ވެސް އަންނަ އަހަރު. އެހެން ނޫނަސް އަޅުގަނޑު ރާއްޖެ އިން ބޭރަށް ބަދަލުވުމުގެ ވިސްނުމެއް އޮތީކީއެއް ނޫން،" އަޒީމާ ވިދާޅުވި އެވެ.

އދ. ގެ ދާއިމީ މަންދޫބު ކަމަށާއި، އެމެރިކާ އާއި ކެނެޑާ އަށް ކަނޑައަޅާ ސަފީރު ކަމަށް ނަސީރު އައްޔަން ކުރަން ރައްޔިތުންގެ މަޖިލީހަށް ރައީސް އަބްދުﷲ ޔާމީން ވަނީ ހުށަހަޅުއްވައިފަ އެވެ. މަޖިލީހުން އޭނާ އަށް ރުހުން ލިބިއްޖެ ނަމަ ފޮރިން ސެކްރެޓަރީ ކަމުން ވަކިވާނެ އެވެ.

އަޒީމާ މިއަދު ވެސް ވިދާޅުވީ އެމްއެމްޕީއާރުސީގެ ހިޔާނާތުގެ މައްސަލައިގައި އެމްއެމްއޭގެ އަދި އޭނާގެ ވެސް ދައުރެއް ނޯންނާނެ ކަމަށެވެ. މީގެ ކުރިން ވެސް އަޒީމާ ވަނީ ތަކުރާރުކޮށް އެހެން ވިދާޅުވެފަ އެވެ.

"އަޅުގަނޑުގެ ފިރިމީހާ ސަފީރު ކަމަށް ފުރަނީ އަންނަ އަހަރު. އެހެންވީމާ އަޅުގަނޑުގެ މައްޗަށް ތުހުމަތު ކުރަންޏާ ޝަރީއަތް ހިންގާނެހާ ދުވަސް އެބައޮތް ނޫންތޯ؟ އަޅުގަނޑު ނޯންނާނެ މަނީ ލޯންޑަރިންގެ އެއްވެސް ކަމެއްގައި ބައިވެރިވެފައެއް. އެއީ ޔަގީންކަމެއް،" ގަވަރުނަރު ވިދާޅުވި އެވެ.