ވަގަށް ނެގި ފައިސާއާ ބެހޭ މިނިވަން ތަހުގީގަށް އަޒީމާ އެއްބާރުލުން ދެއްވަން ނަޝީދު ގޮވާލައްވައިފި

އެމްއެމްޕީއާރުސީން ވަގަށް ނެގި ފައިސާއާ ބެހޭ މިނިވަން ތަހުގީގަށް ގަވަރުނަރު ޑރ. އަޒީމާ އާދަމް އެއްބާރުލުން ދެއްވަން ކުރީގެ ރައީސް މުހައްމަދު ނަޝީދު މިއަދު ގޮވާލައްވައިފި އެވެ.

ރައީސް ނަޝީދު ކުރެއްވި ޓްވީޓެއްގައި ވިދާޅުވެފައި ވަނީ ގަވަރުނަރު އަޒީމާ އިސްތިއުފާ ދެއްވީ މަނީ ލޯންޑްރިންގެ ތެރެއިން ފައިސާ ލިބިވަޑައިގެންނެވި ކަމަށް ރައީސް އަބްދުﷲ ޔާމީން އިއުތިރާފްވެޑައިގެންނެވިތާ އެއް ދުވަސްފަހުން ކަމަށެވެ. އަދި އެ ފައިސާއާ ގުޅޭ ގޮތުން ހިންގާ މިނިވަން ތަހުގީގަށް އަޒީމާ އަމިއްލަފުޅަށް އިސްނަންގަވައިގެން ބަޔާނެއް ދެއްވަން ޖެހޭ ކަމަށް ވެސް ނަޝީދު ވިދާޅުވި އެވެ.

ރައީސް ނަޝީދުގެ އޮފީހުން މިއަދު ބުނީ ޔޫއެސް ޑޮލަރު ބޭނުންކޮށްގެން މަނީ ލޯންޑްރިންގެ ހަރަކާތެއް ހިންގުމަކީ އެމެރިކާގައި ވަރަށް ބޮޑު ކުށެއް ކަމަށެވެ. އަދި ރާއްޖޭގައި ހިންގި މަނީ ލޯންޑްރިންގެ ހަރަކާތްތަކާ ގުޅޭ މައުލޫމާތު އެމެރިކާގެ ކަމާ ގުޅޭ އިދާރާތަކަށް އެނގިފައިވާ ކަމުގެ މައުލޫމާތު ލިބިފައިވާ ކަމަށް ވެސް އެ އޮފީހުން ބުންޏެވެ.

ގަވަރުނަރުކަމުގެ މުއްދަތު ހަމަވުމުގެ ތިން އަހަރު ކުރިން އަޒީމާ އިސްތިއުފާ ދެއްވީ ފިރިކަލުން އަލީ ނަސީރު (އަލިނީ) އދ. ގައި ހުންނަވާ ރާއްޖޭގެ މަންދޫބަކަށް ހަމަޖެއްސުމުން ނިއު ޔޯކަށް ދިރިއުޅުން ބަދަލުކުރެއްވުމުންނެވެ.

ތިން އަހަރެއްހާ ދުވަހު ގަވަރުނަރުކަމުގެ މަގާމުގައި ހުންނެވުމަށް ފަހު އަޒީމާ އިސްތިއުފާ ދެއްވިއިރު، ރާއްޖޭގައި މިހާތަނަށް ހިންގި އެންމެ ބޮޑު ކޮރަޕްޝަން ކަމަށްވާ އެމްއެމްޕީއާރުސީ މެދުވެރިކޮށް ކުރީގެ ނައިބު ރައީސް އަހުމަދު އަދީބު ކުރެއްވި ބޮޑު ވައްކަމުގައި އެމްއެމްއޭ "ނިދާފައި" އޮތުމުގެ ތުހުމަތު އަޒީމާގެ މައްޗަށް އެތައް ބަޔަކު ކުރެ އެވެ.

އެގޮތުން ސަރުކާރުގެ އޮފީހަކުން އެތައް މިލިއަން ރުފިޔާއެއްގެ މައާމަލާތްތައް ގާނޫނާއި ގަވާއިދާ ހިލާފަށް ހިންގާކަން އެމްއެމްއޭ އަށް އެނގޭ އިރު ވެސް ފިޔަވަޅެއް އެޅުން ލަސްވުމުގެ ޒިންމާ އަޒީމާ ނަންގަވަން ޖެހޭނެ ކަމަށް، ބައެއް މީހުން ބުނެ އެވެ.

މިއަދު ހެނދުނު އެމްއެމްއޭގައި އަޒީމާ ދެއްވި ވަދާއީ ބަޔާނުގައި އެމްއެމްޕީއާރުސީގެ ކޮރަޕްޝަނާ ގުޅޭ އެއްވެސް ވާހަކައެއް ދައްކަވާފައެއްނުވެ އެވެ. އަދި އެމްއެމްޕީއާރުސީގެ ހިނާޔާތުގައި އެމްއެމްއޭ ފެއިލްވެފައި އޮތް ކަމަކަށް އެއްވެސް އިރަކު ވިދާޅުވެފައެއް ނުވެ އެވެ.