ފޮރިން ސެކްރެޓަރީގެ މަގާމަށް ސަރީރު އައްޔަން ކުރައްވައިފި

ރާއްޖޭގެ ފޮރިން ސެކްރެޓަރީގެ މަގާމަށް އަހުމަދު ސަރީރު މިއަދު އައްޔަނު ކުރައްވައިފި އެވެ.

ފޮރިން ސެކްރެޓަރީގެ މަގާމަށް ރައީސް އަބްދުﷲ ޔާމީން، ސަރީރު މި އައްޔަން ކުރެއްވީ ކުރިން އެ މަގާމުގައި ހުންނެވި އަލީ ނަސީރު އދ. ގައި ހުންނަވާ ރާއްޖޭގެ ދާއިމީ މަންދޫބަކަށް ހަމަޖެއްސުމާ ގުޅިގެންނެވެ.

ސަރީރު މިހާތަނަށް ހުންނެވީ އދ. ގައި ހުންނަވާ ރާއްޖޭގެ ދާއިމީ މަންދޫބުގެ މަގާމުގަ އެވެ. އެއީ ޑިސެމްބަރު 10، 2012 އިން ފެށިގެންނެވެ. ރާއްޖެ އިން އެމެރިކާ އަށް ކަނޑައަޅާފައި ހުންނަވާ ސަފީރުގެ މަގާމު ވެސް އޭނާ އެ ދުވަސްކޮޅު ވަނީ ފުރުއްވައިފަ އެވެ.

ރައީސް އޮފީހުން ބުނިގޮތުގައި ފޮރިން ސެކްރެޓަރީގެ މަގާމަށް ސަރީރު އައްޔަން ކުރެއްވީ ސްޓޭޓް މިނިސްޓަރުގެ ފެންވަރުގަ އެވެ.

ސަރީރަކީ 1986 ވަނަ އަހަރުން ފެށިގެން ރާއްޖޭގެ ޚާރިޖީ ދާއިރާގެ އެކި މަގާތަކުގަ އާއި ރާއްޖޭގެ ޑިޕްލޮމެޓިކް މިޝަންތަކުގެ އެކި ފެންވަރުގެ މަގާމުތައް އަދާކުރެއްވި ތަޖުރިބާކާރު ބޭފުޅެއް ކަމަށް ފޮރިން މިނިސްޓްރީން ބުންޏެވެ.

އޭނާ ވަނީ ބަންގްލަދޭޝްގައި ހުންނަވާ ދިވެހި ސަފީރުގެ މަގާމު ވެސް ފުރުއްވައިފަ އެވެ. ޚާރިޖީ ދާއިރާގައި އޭނާ ފުރުއްވާފައިވާ ބައެއް އެހެން މަގާމުތަކުގެ ތެރޭގައި ސްރީ ލަންކާގައި ހުންނަ ރާއްޖޭގެ ހައިކޮމިޝަންގެ 3 ވަނަ ސެކްރެޓަރީ ކަމާއި އދ. ގައި ހުންނަ ރާއްޖޭގެ ޕާމަނަންޓް މިޝަންގެ 2 ވަނަ ސެކްރެޓަރީ ކަމުގެ މަގާމު ހިމެނެ އެވެ. އަދި ފޮރިން މިނިސްޓްރީގެ އެސިސްޓެންޓް އަންޑަ ސެކްރެޓަރީ ކަމާއި އެސިސްޓެންޓް ޑިރެކްޓަ، ފޮރިން ރިލޭޝަންސް ކަމާއި ޑެޕިއުޓީ ޑިރެކްޓަރު ކަމާއި ޑިރެކްޓަރު ކަމާއި އެސިސްޓެންޓް ޑިރެކްޓަ ޖެނެރަލް ކަމާއި ޑިރެކްޓަ ޖެނެރަލްގެ މަގާމު ހިމެނެ އެވެ.

ސަރީރަކީ އޮސްޓްރޭލިއާގެ މޮނާޝް ޔުނިވަސިޓީން ފޮރިން އެފެއާޒް އެންޑް ޓްރޭޑްގެ ރޮނގުން މާސްޓާސް ޑިގްރީ ހާސިލު ކުރައްވާފައިވާ ބޭފުޅެކެވެ.