ބަޔަކު ދަނީ ފުލުހުންގެ ބޮލަށް ސަވާރު ވަމުން: ހޯމް މިނިސްޓަރު

ގައުމު ހަލަބޮލިކޮށް، ނުރައްކާތެރި ރޭވުންތައް ރާވާ މީހުން ދަނީ ވަކިވަކި ފުލުހުންގެ ބޮލަށް "ސަވާރުވަމުން" ކަމަށް ހޯމް މިނިސްޓަރު އަޒްލީން އަހުމަދު މިއަދު ވިދާޅުވެއްޖެ އެވެ.

ވާޖިބު އަދާކުރަމުން ދަނިކޮށް ޝަހީދުވެފައިވާ ފުލުހުންގެ ޒިކުރާ އާކުރުމަށް އިސްކަންދަރު ބިލްޑިންގްގައި ބޭއްވި ޖަލްސާގައި ވާހަކަ ދައްކަވަމުން އަޒްލީން ވިދާޅުވީ ޑިމޮކްރަސީގެ ނަމުގައި ރޭވުންތައް ރާވާ ބަޔަކު، ގައުމުގެ ޒިންމާދާރު ވަޒީފާގައި ތިއްބެވުމަށް ފަހު އިސްތިއުފާ ދެއްވައި ނުވަތަ މަގާމުން ވަކިވެވަޑައިގަތުމަށް ފަހު ފުލުހުންނާ ދިމާކޮށް، ފުރައްސާރަކޮށް ހަދާ ކަމަށެވެ. އަދި އެ މީހުންގެ އަމާޒަކީ ފުލުހުންގެ މަސައްކަތް ހުއްޓުވައި، ސިކުނޑިތަކަށް ސަވާރުވެ، ގައުމީ، ދީނީ ވާޖިބުން އެކަހެރިކުރުން ކަމުގައި އޭނާ ވިދާޅުވި އެވެ.

އަޒްލީން ވިދާޅުވި ގޮތުގައި އެ ފަދަ މީހުން "ފުލުހުންނާ ތަޅަން މީހުން ނެރުން" ފަދަ ރޭވުންތައް ރާވަ އެވެ. އަދި މި ގޮތަށް އަމަލު ކުރަނީ ޑިމޮކްރަސީގެ ނަމުގައި ދުނިޔަވީ ބޭނުންތައް ހާސިލް ކުރުމަށް ކަމަށް ވިދާޅުވި އެވެ.

ޝަހީދުވި ފުލުހުންގެ އާއިލާތަކާއެކު ބޭއްވި މި ޖަލްސާގައި އަޒްލީންގެ ވާހަކަ ނުސީދާކޮށް އަމާޒު ކުރެއްވީ ރާއްޖޭގެ ސިޔާސީ މަސްރަހާއި އެކަން ފުލުހުންނާ ގުޅިދާނެ ގޮތްތަކާ ގުޅޭގޮތުންނެވެ.

މިނިސްޓަރު ވިދާޅުވީ އެންމެ ފުލުހެއްގެ ބޮލަށް ސަވާރުވެވުމަކީ ވެސް މުޅި ފުލުހުންގެ މުއައްސަސާ އަށް ލިބޭ ހިތްދަތި ކަމެއް ކަމަށެވެ. އެހެންވެ، އެ ފަދަ މުއާމަލާތުތަކާ ދުރުވުމަށް އޭނާ އިލްތިމާސް ކުރެއްވި އެވެ.

އަޒްލީން ވިދާޅުވީ "ބޮލަށް ސަވާރުވުމަށް" ވާހަކަތައް ދައްކާނީ ރަނގަޅު ނިޔަތެއްގައި ރަހުމަތްތެރިކަން ބަދަހިކުރުމުގެ މާނައިގައި ކަމަށާއި އެކަމަކު ވަކި ހިސާބަކުން، ބޭނުންވާ ގޮތަށް ފުލުހުން ފްރޭމް ކޮށްލުމަށް ފަހު އަގުވައްޓާލުމަށް މަސައްކަތް ކުރާނެ ކަމަށެވެ.

އެހެންވެ، މިއީ ވަރަށް ނުރައްކާތެރި ކަމެއް ކަން ސިފަ ކުރައްވައި ހުރިހާ ފުލުހުން ވެސް އެ ފަދަ ކަންކަމާ ދުރުހެލިވުމަށް އޭނާ ގޮވާލެއްވި އެވެ.

މިނިސްޓަރު ވިދާޅުވީ ފުލުހުންނަށް ހަމަލާ ދެވޭ ފަދަ ހާލަތަކަށް ގައުމެއްގެ ރައްޔިތުންގެ ސިކުނޑިތައް ތަޣައްޔަރު ކުރުމުގެ ބޭނުމުގައި ބޭރުގެ އެކި ޖަމާއަތްތަކުންނާއި ރާއްޖޭގެ ބަޔަކު ކަންކަން ރާވަމުންދާ ކަމަށެވެ. އަދި ފުލުހުންގެ މުހިއްމުކަން އެނގެން އޮތްއިރު ވެސް، ފުލުހުންނަށާއި އެ މީހުންގެ އާއިލާތަކަށް ގެއްލުންދޭ މީހުންނަށް ގާނޫނީ ގޮތުން އަދަބު ލިބެން ޖެހޭނެ ކަމަށް ވިދާޅުވި އެވެ.

އަޒްލީން ވިދާޅުވީ ގައުމު ހަލަބޮލިކޮށް އަބަދު ވެސް މައްސަަލަގަނޑެއްގެ ތެރޭގައި ބޭއްވުމުން ބައެއް މީހުންނަށް ލިބޭ އުފަލެއް ކަމަށެވެ. އަދި އެ ފަދަ މީހުން ގިނަ ފަހަރަށް މިކަންކަން ރާވަނީ ރާއްޖޭން ބޭރުގައި ކަމަށާއި އެ މީހުންގެ އަޒާމަކީ ރައްޔިތުންނަށް ގެއްލުން ދިނުން ކަމުގައި ވިދާޅުވި އެވެ.

"މި މީހުންގެ ފިކުރުގައި އޮންނަނީ ގައުމު ކޮންމެ ފަދަ ހާލަތެއްގައި ބާއްވާފައި ވެސް ތިމާމެންގެ ބޭނުންތައް ފުއްދުން. މި ފަދަ ކަންކަމުން ފުލުހުންނަށް ބޮޑެތި ގެއްލުންތަކެއް ލިބޭ،" އިދިކޮޅު ފަރާތްތަކުން ކުރިއަށް ގެންގޮސްފައިވާ ބައެއް މުޒާހަރާތަކުގައި ފުލުހުންނަށް ބޮޑެތި އަނިޔާތައް ލިބިފައިވާކަން ފާހަގަ ކުރައްވަމުން އޭނާ ވިދާޅުވި އެވެ.

މިނިސްޓަރު ވިދާޅުވީ ވެރިކަން ކުރުމަށް ޑިމޮކްރަސީގައި ވަކި މުއްދަތެއް ހަމަޖެހިފައިވާ ކަަމަށާއި އެ މުއްދަތުގެ މެދުތެރެއިން، ސިޔާސީ ބޭނުންތަކަށް ބަޔަކު ގައުމު ހަލަބޮލި ކުރަމުން ދާ ކަމަށެވެ. އަދި މި ކަންކަމަށް ދިވެހި އެއްވެސް ރައްޔިތަކު އިޖާބަ ނުދިނުމަށް އަޒްލީން ގޮވާލެއްވި އެވެ.