ވޯޓާ އެކު އިނގިރޭސިވިލާތުގެ އިދިކޮޅު ޕާޓީގެ ތެރޭގައި މައްސަލަ އުފެދިއްޖެ

ލަންޑަން (ޖޫން 27) - ޔޫރަޕިއަން ޔޫނިއަން އިން އިނގިރޭސިވިލާތް ވަކިވުމަށް ފެނޭތޯ ބެލުމަށް ނެގި ޚިޔާލު ހޯދުމުގެ ވޯޓަށް ފަހު އިދިކޮޅު ޕާޓީގެ ތެރޭގައި ބައިބައިވުން އުފެދި ޝެޑޯ ބައެއް ވަޒީރުންގެ މަގާމު ގެއްލިއްޖެ އެވެ.

އިދިކޮޅު ލޭބާ ޕާޓީގެ ލީޑަރު ޖެރެމީ ކޯބިން އަށް ފާޑުކިޔުންތައް އަމާޒުވެ އޭނާގެ އިސްތިއުފާ އަށް ވަނީ ގޮވާލައިފަ އެވެ. އަދި އޭނާގެ އިތުބާރު ނެތްކަމުގެ ވޯޓެއް ނެގުމަށް ދަނީ ބާރު އަޅަމުންނެވެ. މި ކަމަށް ފާޅުގައި ވަކާލާތު ކުރެއްވި ޝެޑޯ ފޮރިން މިނިސްޓަރު ހިލަރީ ބެން މިހާރު ވަނީ މަގާމުން ވަކިކޮށްފަ އެވެ.

ބެން ވިދާޅުވީ ކޯބިންގެ ލީޑާޝިޕާއި އިންތިޚާބެއް ކާމިޔާބު ކުރުމަށް އޭނާގެ ގާބިލްކަމާ މެދު ކަންބޮޑުވުންތަކެއް އެބަހުރި ކަމަށެވެ. އަދި ޕާޓީގެ ލީޑަރުގެ މަގާމުގައި ޖެރެމީ ހުންނަވައިގެން ކުރިއަށް އޮތް އިންތިޚާބު ކާމިޔާބު ކުރެވިދާނެ ކަމުގެ ޔަގީންކަން ނެތް ކަމަށް ވެސް ބެން ވިދާޅުވި އެވެ.

"ޖެރެމީ އަށް ފޯނުން ގުޅާ އަޅުގަނޑު ވާނީ އޭނާގެ ލީޑަޝިޕުގެ ދަށުން އިންތިޚާބެއް ކާމިޔާބު ނުކުރެވޭނެ ކަމަށް ދަންނަވާފައި. އެހެންވެ މަގާމުން ދުރުކުރީ،" ބެން ވިދާޅުވި އެވެ.

ލޭބާ ޕާޓީގެ ބައެއް ފަރާތްތަކުން ބުނީ އީޔޫގެ ވޯޓާ ގުޅިގެން އަމާޒުވަމުންދާ ފާޑުކިޔުންތަކަށް ކޯބިން އިޖާބާ ނުދެއްވައިފި ނަމަ ޝެޑޯ ވަރަށް ގިނަ ވަޒީރުން އިސްތިއުފާ ދެއްވާނެ ކަމަށެވެ.

ލޭބާ ޕާޓީގެ ބައެއް ޕާލަމެންޓް މެންބަރުން މިހާރު ވަނީ ކޯބިންގެ އިތުބާރު ނެތް ކަމަށް ހުށަހަޅައިފަ އެވެ. ބެން މަގާމުން ވަކި ކުރުމުން ލޭބާ ޕާޓީގެ ސީނިއާ އެހެން މެންބަރުން ވެސް ވަނީ ފާޑު ކިޔަން ފަށައިފަ އެވެ

ޕާޓީގެ ތެރޭގައި މައްސަލަތައް އުފެދުމުން ޕާޓީ ސަލާމަތް ކުރުމަށް ބައެއް މެންބަރުން މިހާރު ވަނީ މަސައްކަތް ފަށައިފަ އެވެ.