ޒުވާނުންގެ އެވޯޑަށް ކުރިމަތިލާން ހުޅުވާލައިފި

މުޖުތަމައަށް ފައިދާ ހުރި މަސައްކަތްތައް ކުރަމުން އަންނަ ޒުވާނުންނަށް ދެމުން އަންނަ އެވޯޑަށް ކުރިމަތިލުމަށް ޔޫތު މިނިސްޓްރީން ހުޅުވާލައިފި އެވެ.

އެ މިނިސްޓްރީން ބުނީ އަންނަ މަހުގެ 22 ވަނަ ދުވަހާ ހަމައަށް "ޒުވާނުންގެ އެވޯޑު" އަށް ކުރިމަތިލެވޭނެ ކަމަށެވެ.

މި އަހަރުގެ އެވޯޑު ދޭން ހަމަޖައްސާފައި ވަނީ 10 ދާއިރާއަކުންނެވެ. އެއީ ކުޅިވަރާއި އިޖުތިމާއީ ފަދަ ދާއިރާތަކުންނެވެ. އެ ދާއިރާތަކުގެ އިތުރުން ޝަހީދު ޖަވާދު އުމަރުގެ ހަނދާނީ ފިލާ ވެސް ދޭން ވަނީ ހަމަޖައްސައިފަ އެެވެ.

އެވޯޑު ލިބޭ ފަރާތްތައް ހަމަޖައްސާނީ، ހުށަހަޅާ ފޯމުތައް ބެލުމަށް ފަހުގައި އެކަމަށް ހާއްސަ ކޮމެޓީއަކުންނެވެ.

ޔޫތު މިނިސްޓްރީން ބުނީ ޒުވާނުންގެ އެވޯޑު ދިނުމުގެ މަގުސަދު ހާސިލްވަމުންދާ ކަމަށާއި އެކަމުގެ ފައިދާތައް ގައުމަށް ކުރަމުން އަންނަ ކަމަށެވެ.

ޒުވާނުންގެ އެވޯޑާއި ސެޓްފިކެޓާ އެކު 25،000ރ. ގެ ފައިސާގެ އިނާމެއް ވެސް ވަނީ ދޭން ނިންމައިފަ އެވެ. އެ ހަފުލާ ބާއްވަން ހަމަޖައްސާފައި ވަނީ އަންނަ ނޮވެމްބަރު 17 ވަނަ ދުވަހުގެ ރޭ ބާއްވާ ޒުވާނުންގެ ދުވަހުގެ ހަފުލާގަ އެވެ.