މާރާމާރީ ހުއްޓުވުމުގައި ފުލުހުންނަށް އެހީތެރިވުމަށް ސިފައިންނަށް އަންގައިފި

މާރާމާރީތައް ހުއްޓުވުމަށް ފުލުހުންނާ ގުޅިގެން ސިފައިން މަސައްކަތް ކުރުމަށް ޑިފެންސް މިނިސްޓަރު އާދަމް ޝަރީފް އަންގަވައިފި އެވެ.

ސިފައިންގެ ކަޅުތުއްކަލާ ކޮށީގައި ރޭ ސިފައިންނާ ބައްދަލު ކުރައްވައި ވާހަކަ ދައްކަވަމުން މިނިސްޓަރު އާދަމް ޝަރީފް ވިދާޅުވީ މާލޭގެ މަގުތައް ހަލަބޮލިކޮށް، ޓެރަރިޒަމްގެ އަމަލުތަކާއި މާރާމާރީ ހިންގައި މީހުން މެރުން ފަދަ ކަންކަން ހިނގުމަކީ ކަންބޮޑުވާ ކަމެއް ކަމަށެވެ.

ގޭންގު މާރާމާރީ މަދުކުރުމަކީ އަސްކަރިއްޔާގެ ޒިންމާއާ ސީދާ ގުޅުމެއް ނެތް ކަމެކެވެ. މިނިސްޓަރު ވިދާޅުވީ އެހެން ނަމަވެސް މާލެ އަމާން ތަނަކަށް ހެދުމަށްޓަކައި ފުލުހުން ކުރަމުންގެންދާ މަސައްކަތުގައި ދިވެހި ސިފައިން ގުޅިގެން މަސައްކަތް ކޮށްދިނުމަށް މިހާރު ވާނީ ސިފައިންގެ ލީޑާޝީޕްގައި އެދިވަޑައިގެންފައި ކަމަށެވެ.

މި ފަހަކަށް އައިސް ސިލްސިލާ މާރާމާރީތައް ހިންގުން ވަނީ އާންމުވެފަ އެވެ. އެގޮތުން ވެއަތުވެ ދިޔަ މަހެއްހާ ދުވަހުގެ ތެރޭގައި ވެސް ދެ ޒުވާނަކަށް ތޫނު އެއްޗަކުން ހަމަލާދީ ވަނީ މަރާލައިފަ އެވެ.

މާރާމާރީތައް ހުއްޓުވުމަށްޓަކައި މޮނިކޮން އަމުރު ނުވަ މީހެއްގެ މައްޗަށް ނެރެދިނުމަށް ފުލުހުން މިހާރު ވަނީ ހައި ކޯޓުގައި ވެސް އެދިފަ އެވެ.