ޝީޝާ އިން ކުޅުދުއްފުށީގައި އައުޓްލެޓެއް ހުޅުވައިފި

އަތޮޅުތެރޭގައި ޝީޝާ އިން ގާއިމުކުރި ދެވަނަ އައުޓްލެޓް ހދ. ކުޅުދުއްފުށީގައި ހުޅުވައިފި އެވެ.

ރާއްޖޭގައި ފުޅާ ދާއިރާއެެއްގައި ސައިކަލުގެ ވިޔަފާރިކުރާ ކުންފުނިން މީގެ ކުރިން ވަނީ ސ. ހިތަދޫގައި ވެސް އައުޓްލެޓެއް ހުޅުވައިފަ އެވެ. މި އައުޓްލެޓުން ވެސް ސައިކަލް މަރާމާތުކޮށްދިނުމާއި ސްޕެއާޕާޓްސް ވިއްކާނެ ކަމަށް އެ ކުންފުނިން ބުންޏެވެ.

ކުޅުދުއްފުށީގައި މިއަދު ބޭއްވި ހާއްސަ ރަސްމިއްޔާތެއްގައި ޝީޝާގެ ދެވަނަ އައުޓްލެޓް ހުޅުވައިދެއްވީ އެ ކުންފުނީގެ ޑިރެކްޓަރު ހުސެއިން ހުޝާމެވެ. އެ ރަސްމިއްޔާތަށްފަހު އެތަނުން ސައިކަލްތަކާ ބެހޭ މައުލޫމާތު އާއްްމުންނަށް ދިނުން އޮތެވެ.

ޝީޝާ އިން ބުނީ އެ ރަށުގައި ހުޅުވި އައުޓްލެޓުން ވެސް ސައިކަލް ވިއްކާނީ މާލެއާ އެއް އަގެއްގައި ކަމަށެވެ. އަދި އެތަން ހުޅުވުމާ ދިމާކޮށް ކުރިއަށް ގެންދާ ޕްރޮމޯޝަންގައި ސައިކަލްގެ ފުރަތަމަ ސާވިސް ހިލޭ ކޮށްދޭ ގޮތަށް ހަމަޖެހިފައިވާ ކަމަށް ވެސް އެ ކުންފުނިން ބުންޏެވެ.

"އަލަށް ހުޅުވާ ތަނެއް ވީމަ އަޅުގަނޑުމެން އެންމެ ބޮޑު އިސްކަން ދޭނީ ސާވިސްތަކުގެ މައުލޫމާތު ދޭން. އޭގެ އިތުރުން އެތަނުން އަޅުގަނޑުމެން ވިއްކާނީ ހޮންޑާ ޕަވާ ޕްރޮޑަކްޓްސް އާއި ފެން ޕަމްޕާއި އޯލް ޕާޕަސް ޖަނަރޭޓަރު،" ޝީޝާގެ ޗެއާމަން އަހުމަދު ހަސަން މަނިކު ދާދިފަހުން ވިދާޅުވި އެވެ.

އޭނާ ވިދާޅުވީ ކުޅުދުއްފުއްޓަށް ފަހު ލ. އަތޮޅުގައި ވެސް އައުޓްލެޓެއް ހުޅުވަން ވިސްނާފައިވާ ކަމަށެވެ.