ކުޅުދުއްފުށީ އެއާޕޯޓް އަޅަން ހިއްކުމުގެ ތައްޔާރީތަައް ފަށައިފި

ހދ. ކުޅުދުއްފުށީގައި އެއާޕޯޓް އެޅުމަށްޓަކައި، ހިއްކަން ޖެހޭ ސަރަހައްދުގައި އެކަމަށް ބޭނުންވާ ތައްޔާރީތައް ވާން ފަށައިފި އެވެ.

އެއާޕޯޓް އަޅަން ކުޅުދުއްފުށީ ހުޅަނގު ފަރާތު މޫދުން ހަ ހެކްޓަރު އަދި އެރަށު ކުޅިން ނުވަ ހެކްޓަރު ހިއްކަން ވަނީ ނިންމާފަ އެވެ. އެ މަސައްކަތަށް ބޭނުންވާ ހުރިހާ ސާމާނެއް ޖަމާކޮށް، އެމްޓީސީސީގެ އާ ކޮންނަ ބޯޓު މަހާ ޖައްރާފު ވެސް މިހާރު ވަނީ ބަނދަރުކޮށްފަ އެވެ.

ކުޅުދުއްފުށީ ކައުންސިލްގެ ރައީސް އަބްދުލް ލަތީފް ވިދާޅުވީ މޫދުން ހިއްކާ ސަރަހައްދުގައި ބަންޑުވޯލް ޖަހައި ނިންމާފައިވާއިރު ކުޅިން ހިއްކާ ސަރަހައްދުގައި ވެސް ބަންޑުވޯލް ޖަހަން ފަށާފައިވާ ކަމަށެވެ.

ބަންޑު ވޯލަކީ ހިއްކާ ސަރަހައްދު ވަށައިގެން ލާ ވަގުތީ ތޮއްޓެކެވެ.

ކައުންސިލް ރައީސް ވިދާޅުވީ އެއާޕޯޓް އަޅަން ބޭނުންވާ ސަރަހައްދު ހިއްކަން ފަށާނީ މި މަހުގެ 12 ވަނަ ދުވަހު ކަމަށެވެ. ރަސްމީކޮށް އެ މަސައްކަތް ފައްޓަވައިދެއްވާނީ، އެނގިފައިވާ ގޮތުގައި، ރައީސް އަބްދުﷲ ޔާމީނެވެ.

ކުޅުދުއްފުށީ ކުޅި ހިއްކައިގެން އެއާޕޯޓް އަޅާތީ އެތައް ބަޔަކު ދަނީ ކަންބޮޑުވުން ވެސް ފާޅުކުރަމުންނެވެ. އެކަަމަކު އެ ރަށުގެ ގާތްގަނޑަކަށް ހުރިހާ އެންމެން ވެސް އެ މަޝްރޫއުއަށް ތާއީދުކުރެ އެވެ.

ރީޖަނަލް އެއާޕޯޓްސް އިން އަމިއްލަ މީހަކާ ހަވާލުކޮށްގެން ހެދި އީއައިއޭ އިން ދައްކާ ގޮތުން ކުޅި ހިއްކައިފި ނަމަ އެ ރަށުގައި ފެންބޮޑުވުން ފަދަ ތިމާވެށީގެ މައްސަލަތައް ދިމާވާނެ އެވެ. އަދި ކުރިއަށް އޮތް ދުވަސްތަކުގައި އެފަދަ މައްސަލަތައް ބޮޑުވާނެ ކަމަށް ވެސް ލަފާކޮށްފައިވެ އެވެ. ކުޅުދުއްފުށީ މަށިކުޅި އަކީ ރާއްޖޭގެ އުތުރުގައި އޮންނަ މިފަދަ އެންމެ ބޮޑު އަދި ދިރުންތައް އެންމެ ގިނަ ކުޅި އެވެ. އެ ތަނުގައި ތަފާތު އަށް ބާވަތެއްގެ ޓްރޫ މެންގްރޫވް (ކަނޑޫފަލުގައި ހެދޭ ގަސް) ހުންނައިރު، މިއީ ރާއްޖޭން ވަރަށް ނުފެންނަ ބާވަތްތަކެވެ. އޭގެ އިތުރުން އަހަރުގެ އެކި ދުވަސްވަރު އެ ކުޅިއަށް އެކި ވައްތަރުގެ ދޫނި ވެސް ހިޖުރަކުރެ އެވެ.

ކުޅުދުއްފުށީ ކުޅިއަކީ އީޕީއޭއިން "ސެންސިޓިވް އޭރިއާ"އެއްގެ ގޮތުގައި ކަނޑައަޅާފައިވާ ތަނެކެވެ.